Դավիթ Բաբայան. Ղարաբաղյան հիմնահարցում պետք է ձեռնպահ մնալ զգացմունքային հայտարարություններից

PanARMENIAN.Net - Ղարաբաղյան հիմնահարցում կառուցողական և սառնարյուն մոտեցում է անհրաժեշտ, այլ ոչ թե զգացմունքային հայտարարություններ: Այդ մասին PanARMENIAN.Net ի թղթակցի հետ զրույցում հայտնել է Արցախի Հանրապետության նախագահի աշխատակազմի տեղեկատվության գլխավոր վարչության պետ Դավիթ Բաբայանը` մեկնաբանելով «Արաբո» ջոկատի հրամանատար Մանվել Եղիազարյանի հայտարարությունն այն մասին, որ հայկական իշխանություններն Արցախը «վաճառելու են» Ադրբեջանին: Նա նշել է, որ իր համար անհասկանալի է, թե ինչի հիման վրա է կատարվել այդ հայտարարությունը: «Մենք պետք է հասկանանք, որ Ղարաբաղի գաղափարը սուրբ է, և այն չպետք է քաղաքականացվի ինչ-որ մեկի կողմից»,- ընդգծել է նա: Ընդ որում, Արցախի նախագահի աշխատակազմի տեղեկատվության գլխավոր վարչության պետը նշել է, որ ղարաբաղյան հիմնահարցում հայ հասարակությունը պետք է միասնական ճակատով հանդես գա: «Ղարաբաղյան հակամարտության հարցում մենք ունենք միասնություն կոչվածը, սակայն այն պետք է ամրապնդել»,- ասել է նա:

Բաբայանի խոսքով, Արցախի անվտանգությունն ու անկախությունը հայկական պետականության աստիճանաբական զարգացման երաշխիքն է: Դավիթ Բաբայանն ընդգծել է, որ ղարաբաղյան հիմնախնդրին պետք է ավելի շատ ուշադրություն հատկացվի բուհերում: Նրա կարծիքով, հայկական բուհերում պետք է ղարաբաղյան հիմնահարցի վերաբերյալ առանձին առարկա դասավանդվի:

Ավելի վաղ Երևանում կայացած մամլո ասուլիսում Մանվել Եղիազարյանը հայտարարել էր, որ հայկական իշխանություններն Արցախը «վաճառելու են» Ադրբեջանին: Նրա խոսքով, եթե հայկական կողմը շարունակի ջայլամի քաղաքականություն վարել ղարաբաղյան գործընթացում, ապա երեք տարի անց Արցախում ոչ մի հայ չի մնա: