Հայոց ցեղասպանության մասին բանաձևի հեղինակներ Ռոբերտ Դոլդը և նորընտիր կոնգրեսականներ Ջեֆ Դենհամն ու Քորի Գարդները կոչ են անում գործընկերներին աջակցել Հայոց ցեղասպանսւթյան մասին բանաձևին:
Ինչպես հայտնում է Ամերիկայի Հայ Դատի հանձնախումբը, գործընկերներին հղած նամակում Դոլդը, Դենհամն ու Գարդները մասնավորապես նշեցին. «Որպես 112-րդ գումարման նոր անդամներ մենք ընտրվել ենք ոչ միայն մեր գործունեությունը անհրաժեշտ հունի մեջ դնելու, այլ նաև այժմյան ստատուս-քվոն փոխելու համար: Այն, որ ԱՄՆ կառավորությունն ունակ չէ պաշտոնապես ճանաչել Հայոց ցեղասպանությունը, խայտառակություն է: Ժամանակն է, որ ԱՄՆ կառավարությունը միանա մեր ընտրողների ձայներին և մնացած աշխարհի ձայներին՝ հակազդելու համար Հայոց ցեղասպանության մշտական ժխտմանը»:
Իր հերթին ANCA գործադիր տնօրեն Արա Համբարյանը նշեց. «Մենք ցանկանում ենք շնորհակալություն հայտնել կոնգրեսականներ Դոլդին, Դենհամին ու Գարդներին նախաձեռնության և այն բանի համար, որ նրանք կոչ են արել գործընկերներին հակազդել Թուրքիայի մերժողական քաղաքականությանը ու ճանաչել Հայոց ցեղասպանությունը»: Դոլդի ու Ադամ Շիֆի նախաձեռնությանը սատարում է 80 կոնգրեսական:
