Վանաձորի Հովհ. Աբելյանի անվան պետական դրամատիկական թատրոնը դառնում է 80 տարեկան

28 սեպտեմբերի 2011 - 18:37 AMT

PanARMENIAN.Net - 2011 թ. լրանում է Վանաձորի Հովհ. Աբելյանի անվան պետական դրամատիկական թատրոնի հիմնադրման 80-ամյակը: Հոբելյանի առթիվ` ՀՀ մշակույթի նախարարության աջակցությամբ, Հովհ. Աբելյանի անվան պետական դրամատիկական թատրոնի նախաձեռնությամբ կազմակերպվել են մի շարք միջոցառումներ, այդ թվում`սեպտեմբերի 18-ին Ս. Խալաթյանի «Հրադադար» պիեսի առաջնախաղով նշվել է թատրոնի հոբելյանական թատերաշրջանը, բացվել է թատրոնի պատմությանը նվիրված ֆոտոցուցահանդես, ինչպես նաև սեպտեմբերի 26-ից Վանաձորում հայտարարվել է թատերական տասնօրյակ: Շուտով հանդիսատեսի դատին կհանձնվի Շիլլերի «Խարդավանք և սեր» ներկայացումը (բեմադրիչ` Վ. Շահվերդյան), կհրատարակվի թատրոնի 80-ամյա պատմությանը նվիրված գիրք-ալբոմ: Հոբելյանական միջոցառումների շարքում նախատեսվում է նաև թատրոնի երևանյան հյուրախաղերը, հայտնում է ՀՀ մշակույթի նախարարության պաշտոնական կայքը:

Հոկտեմբերի 9-ին Վանաձորի Հովհ. Աբելյանի անվան պետական դրամատիկական թատրոնում տեղի կունենա թատրոնի հիմնադրման 80 ամյակին նվիրված հոբելյանական երեկո, որին կմասնակցեն արվեստագետներ, մշակույթի անվանի գործիչներ և թատերասեր հանրություն: Երեկոյի ընթացքում ՀՀ ազգային ժողովի, ՀՀ մշակույթի նախարարության, մարզպետարանի, քաղաքապետարանի և միությունների կողմից կլինեն հոբելյանական պարգևատրումներ: