Թուրքիայի արևելյան շրջաններում, որտեղ հոկտեմբերի 23-ին հզոր երկրաշարժ տեղի ունեցավ, հազարավոր մարդիկ երկրորդ գիշերն են անցկացրել բաց երկնքի տակ, սառը եղանակի պայմաններում:

Փրկարարները շարունակում են մարդկանց որոնումները:

Թուրքիայի վարչապետի տեղակալ Բյուլենտ Առինչը հայտարարել է, որ 7,2 մագնիտուդով ստորգետնյա ցնցման արդյունքում զոհվել է 279 մարդ, 1300 մարդ վնասվածք է ստացել, հիմնականում Վան և Էրկիս քաղաքներում:

Բազում մարդիկ անհայտ կորած են համարվում և զոհերի թիվը կաճի:

Ամենից շատ տուժել է Էրկիս քաղաքը 75 հազար բնակչությամբ, որտեղ փլուզվել է 820 շենք: Շենքերի մեծ մասը բազմաբնակարան տներ էին:

Ըստ փրկարարների, փլատակների տակ մնացած մարդկանց ողջ մնալու շանսերը նվազում են: Վարչապետ Ռեջեփ Թայիփ Էրդողանի գրասենյակի տվյալներով, երկրաշարժի գոտում փլուզվել է 970 շենք:

Ըստ պաշտոնական տվյալների, զոհվածների քանակը հասնում է 300, սակայն, ավելի վաղ «Ալ Արաբիա» հեռուստաալիքը հաղորդագրություն էր տարածել 500-1000 զոհվածների մասին:

Մի շարք երկրներ, այդ թվում Հայաստանը, Ռուսաստանն ու Իսրայելը օգնություն են առաջարկել թուրքական իշխանություններին, սակայն Իսրայելի օգնությունից Անկարան հրաժարվել է: