ԵԱՀԿ-ն աջակցում է Հայաստանի զինված ուժերի քաղաքացիական վերահսկողության բարձրացմանը

PanARMENIAN.Net - Հոկտեմբերի 28-ին Հայաստանի Մարդու իրավունքների պաշտպանի գրասենյակում հանրությանը ներկայացվեց ԵԱՀԿ աջակցությամբ իրականացված` ՀՀ զինված ուժերում մարդու իրավունքների իրավիճակի վերաբերյալ ուսումնասիրությունը:

ԵԱՀԿ երևանյան գրասենյակի հովանավորությամբ և Հայաստանի Օմբուդսմենի գրասենյակի օժանդակությամբ` «Հանդուրժողականության կենտրոն» հասարակական կազմակերպության կողմից իրականացված հետազոտության նպատակն է դիտարկել է զինված ուժերում մարդու իրավունքների պաշտպանության իրավական, սոցիալական և հոգեբանական գործոնները:

«Օժանդակելով սույն նախաձեռնությանը` ԵԱՀԿ-ն նպատակ ունի խթանել զինված ուժերի քաղաքացիական ժողովրդավարական վերահսկողությունը: Մարդու իրավունքների պաշտպանությունը բանակում կարևոր է` երաշխավորելու հանրային վստահությունը և բարձրացնելու զինված ուժերի վստահելիությունը և արդյունավետությունը», - ասել է ԵԱՀԿ երևանյան գրասենյակի ռազմա-քաղաքական ծրագրերի պատասխանատու Գժեգոշ Միխալսկին:

Ուսումնաիրության արդյունքները հիմնվում են զինված ուժերի անձնակազմի իրավագիտակցության, առաջնորդելու և ծառայելու հոգեբանական պատրաստվածության, ինչպես նաև անձնակազմի հարաբերությունների վրա ներգործող սոցիալական գործոնների գնահատման վրա, որն իրականացվել է հարցազրույցների և քննարկումների միջոցով: Զեկույցում ներկայացվում են առաջարկներ` անդրադառնալու զինված ուժերում իրավական և հոգեբանական մարտահրավերներին, երաշխավորելու մարդու իրավունքների պաշտպանությունը կարգապահական պատժամիջոցների կիրառման ժամանակ` ինչպես նաև իրավական կենտրոններ ներդնելու միջոցով:

«Զինված ուժերի իրավունքներին անդրադարձող այս նախաձեռնությունը բացառիկ փորձ է, որ հնարավոր դարձավ քաղաքացիական հասարակության, պաշտպանության սեկտորի, Օմբուդսմենի և միջազգային կազմակերպությունների համագործակցության շնորհիվ այն ոլորտում, ուր առկա է հետագա համագործակցության մեծ հեռանկար: Մենք առանձնակի կարևորում ենք այս նախաձեռնությունը և ակնկալում շարունակել համագործակցությունը այս ձևաչափով` խրախուսելու իրավա-կիրառական բարեփոխումներ` հօգուտ զինված ուժերի և հանրության լայն շրջանակների»,- իր հերթին նշել է Հայաստանի Մարդու իրավունքների պաշտպան Արմեն Հարությունյանը:

Օմբուդսմենի գրասենյակի ներկայացուցիչները ուղեկցել են դիտորդներին զորամասեր և աջակցություն տրամադրել` ուսումնասիրելու մարդու իրավունքների հետ կապված խնդիրները:

ԵԱՀԿ գրասենյակը ՀՀ Մարդու իրավունքների պաշտպանի գրասենյակի հետ համաձայնագրի շրջանակներում գործակցում է` տրամադրելու փորձագիտական աջակցություն` հետամուտ զինված ուժերում մարդու իրավունքների պաշտպանությունը խթանման, հաղորդում է ԵԱՀԿ երևանյան գրասենյակի մամուլի և հանրային տեղեկատվության կենտրոնը: