Կազմվել է EURO-2012 ընտրական մրցումներին մասնակցելու Հայաստանի հավաքականի խաղացանկի օրացույցը

PanARMENIAN.Net - Վիճակահանության արդյունքներով Հայաստանի հավաքականը խաղալու է հետեւյալ խաղացանկով`

03.09.10 Հայաստան - Իռլանդիա 07.09.10 Մակեդոնիա - Հայաստան 08.10.10 Հայաստան - Սլովակիա 12.10.10 Հայաստան - Անդորա 26.03.11 Ռուսաստան-Հայաստան 04.06.11 Հայաստան- Ռուսաստան 02.09.11 Անդորա - Հայաստան 6.09.11 Սլովակիա - Հայաստան 07.10.11 Հայաստան - Մակեդոնիա 11.10.11 Իռլանդիա - Հայաստան

Հայաստանի ֆուտբոլի հավաքականի գլխավոր մարզիչ Վարդան Մինասյանը գտնում է, որ EURO-2012 ընտրական մրցաշարի «B» խմբի խաղացանկը հաջող է Հայաստանի հավաքականի համար: «Հենց այդպիսի խաղացանկով մենք կցանկանայինք խաղալ ընտրական մրցաշարում»,- ասել է Մինասյանը PanARMENIAN.Net ի թղթակցի հետ զրույցում` մեկնաբանելով EURO-2012 ընտրական մրցաշարի վիճակահանությունը: Հայաստանի հավաքականի գլխավոր մարզիչը նշել էր, որ մարզչական շտաբն առաջին հանդիպումը կցանկանար անցկացնել Իռլանդիայի հավաքականի հետ:

Վիճակահանությամբ այդպես էլ դասավորվել է: «Մարտին մենք կհանդիպենք Ռուսաստանի հավաքականի հետ` հավասար պայմաններում, քանի որ երկու երկրների մրցախաղերն էլ մեկնարկելու են մարտին, - ասել է Մինասյանը: - Առաջին խաղերը կանցկացնենք տանը եւ եթե սկիզբը լավ լինի` այդպես էլ կշարունակենք»:

Հայաստանի ֆուտբոլի կանանց հավաքականը մարտի 26-ին կմեկնի Սլովենիա, որտեղ մարտի 27-ին կանցկացնի 2011 թ. Աշխարհի գավաթի կանանց ընտրական մրցախաղը` Սլովենիայի հավաքականի հետ: Հավաքականը Սլովենիայից կմեկնի Պորտուգալիա, որտեղ մարտի 31-ին կխաղա դաշտի տերերի հետ: Հայաստանի ֆուտբոլի կանանց ազգային հավաքականի մարզիչների կենտրոնակայանը Վաղարշակ Ասլանյանի գլխավորությամբ հավաքական է հրավիրել 18 ֆուտբոլիստների:

Մարտի 22-ին Հայաստանի ֆուտբոլի ֆեդերացիայի նախագահ Ռուբեն Հայրապետյանը հանդիպել է թիմերի նախագահների եւ գլխավոր մարզիչների հետ, ովքեր հանդես են գալու Հայաստանի Առաջին եւ Բարձրագույն լիգաներում: Հանդիպման ընթացքում որոշվել է, որ 2010 թ. Հայաստանի բարձրագույն լիգայի 8 թիմերը խաղալու են միեւնույն ֆիրմայի գնդակով:

Մարտի 23-24-ին տեղի ունեցան 2010 թ. Հայաստանի գավաթի 1/4 եզրափակիչ խաղերը: «Գանձասարը» նույնանուն մարզադաշտում (Կապան) ընդունել է «Ուլիսին», 47-րդ րոպեին հաշիվը բացել է Արսեն Ավետիսյանը: «Ուլիսը» կարողացավ հաշիվը հավասարեցնել միայն 78-րդ րոպեին: Տասնմեկ մետրանոց տուգանային հարվածով գոլը խփել է Արտեմ Ադամյանը: Մրցախաղն ավարտվել է ոչ ոքի` 1:1:

«Փյունիկը» Մարկոս Պիզելիի գոլի շնորհիվ հաղթել է «Իմպուլս» (Դիլիջան) թիմին` 1:0 հաշվով: «Շիրակը» Գյումրու «Քաղաքային» մարզադաշտում ընդունել է «Բանանցին»: Մրցախաղն ավարտվել է Երեւանի ակումբի հաղթանակով, հաշիվը` 1:0: Մրցախաղի միակ գոլը խփել է «Բանանցի լեգեոներ Դարկո Լովրիչը` 61-րդ րոպեին:

«Միկան» ընդունել է «Կիլիկիային» եւ հաղթել 3:0 հաշվով: Տասնմեկ մետրանոց հարվածով առաջին գոլը 21-րդ րոպեին խփել է իսպանացի կիսապաշտպան Ուլիսես Մոնտենեգրոն: «Միկայի» երկրորդ գոլը 37-րդ րոպեին խփել է Էդիլսոն Ժունիորը: Դա բրազիլացու առաջին պաշտոնական խաղն էր երեւանյան ակումբի կազմում: Խաղի վերջնական արդյունքը որոշել է Վիգեն Համբարձումյանի գոլը, որը խփել է 88-րդ րոպեին` տուգանայինից:

Պատասխան խաղերը տեղի կունենան ապրիլի 6-ին եւ 7-ին: Կիսաեզրափակիչում կհանդիպեն այս հանդիպումների հաղթողները: Խաղերը տեղի կունենան ապրիլի 13-14-ին եւ 20-21-ին: Հայաստանի գավաթի եզրափակիչ խաղը տեղի կունենա մայիսի 9-ին:

Մարտի 24-ին Դոնեցկի «Մետալուրգը» Ուկրաինայի գավաթի 1/2 եզրափակչում խաղացել է «Շախտյորի» (Դոնեցկ) դեմ: Հայաստանի հավաքականի կիսապաշտպան Հենրիխ Մխիթարյանի թիմը հաղթել է 2:1 հաշվով եւ մայիսի 16-ին խաղալու է Ուկրաինայի գավաթի եզրափակչում «Տավրիայի» դեմ:

Նույն օրը Բելառուսի «ԲԱՏԵ»-ն, որի կազմում հանդես է գալիս Հայաստանի հավաքականի հարձակվող Հովհաննես Գոհարյանը, Բելառուսի գավաթի կիսաեզրափակչում հանդիպել է «Շախտյորի» (Սոլիգորսկ) հետ եւ հաղթել 2:1 հաշվով: Այս թիմերի միջեւ պատասխան խաղը տեղի կունենա մարտի 28-ին:

Շախմատ. Եվրոպայի կանանց եւ տղամարդկանց շախմատի 11-րդ անհատական առաջնությունում խաղարկվում էին Աշխարհի գավաթի 22 ուղեգրեր: Մարտի 17-ին առաջնությունն ավարտվեց եւ 10 մասնակիցներ արդեն շահել են ուղեգրերը, որոնց թվում է նաեւ հայ շախմատիստ Արման Փաշիկյանը: Նա 8 միավոր էր հավաքել եւ զբաղեցրել 10-րդ տեղը:

Ֆրանսիական Նիցցա քաղաքում շարունակվում է արագ շախմատի եւ կույր շախմատի «Ամբեր» մրցախաղը: Մարտի 24-ին նախավերջին` 10-րդ մրցախաղում հայ գրոսմայստեր Լեւոն Արոնյանը խաղացել է Ալեքսանդր Գրիշչուկի (Ռուսաստան) հետ: Արոնյանը հաղթել է կույր շախմատի խաղում, իսկ արագ շախմատի խաղն ավարտվել է ոչ ոքի: Այս մենամարտերի արդյունքներն են` 1,5:0,5 հօգուտ Արոնյանի:

10-րդ խաղից հետո հայ գրոսմայստերը 9,5 միավորով գրավում է 9-րդ տեղը: Մրցախաղի առաջատարը Մագնուս Կարլսենն է (Նորվեգիա), որը 13,5 միավոր ունի: «Ամբերի» վերջին խաղում Արոնյանի հակառակորդն է լինելու Լենյեր Դոմինգեսը (Կուբա):

Աշխարհի գավաթը տեղի կունենա հուլիսի 11-12-ին Աբու-Դաբիում (ԱՄԷ):

Բռնցքամարտ. Հայ բռնցքամարտիկ Վիկ Դարչինյանի եւ ֆիլիպինցի Նոնիտո Դոնեյրայի գործակալները մոտ են երկրոդ անգամ ռեւանշ անցկացնելու համաձայնությանը:

Սպասվում է, որ բանակցությունների հաջող ավարտի դեպքում խաղ-ռեւանշը կայանալու է օգոստոի 7-ին Լոս Անջելեսում (ԱՄՆ): Կրկնակի մարտի անցկացման համար Դոնեյրան մտադիր է մայիսի 15-ին անցկացնել նախավարժանքային մենամարտ:

WBC/WBA վարկածներով չեմպիոն Վիկ Դարչինյանի եւ WBA վարկածով ժամանակավոր չեմպիոն Նոնիտո Դոնեյրայի առաջին հանդիպումը կայացել է 2007թ.-ի հուլիսին եւ ավարտվել 5-րդ ռաունդում` Դոնեյրայի նոկաուտով:

Մեկ այլ հայ բռնցքամարտիկ Արթուր Աբրահամի մարզիչ Ուլի Վեգներն ասել է, որ իր սանը պատրաստ է հաղթել Անդրե Դիրելին, որի հետ կհանդիպի «Super Six World Boxing Classic» մրցաշարի շրջանակներում: «Դիրելն իրոք շատ ուժեղ բռնցքամարտիկ է,-հայտարարել է Վեգները fightnesw.com-ին: - Նրա հանկարծահաս հարձակումները շատ վտանգավոր են, ուստի Արթուրը պետք է հետեւողականորեն կատարի իր ծրագիրը, որը մենք բարելավել ենք վերջին շաբաթներին, եւ այդ դեպքում նա կհաղթի»:

Մարզիչը նշել է նաեւ, որ մենամարտի տեղափոխումը մարտի 6-27-ը, օգտակար եղավ Արթուրի համար: «Երբ մենք մարզվում էինք Փալմ Սփրինգսում, Արթուրը ոչ մի կերպ չէր կարողանում լավագույն մարզավիճակ ձեռք բերել: Նա ուղղակի չէր հասցնում հանգստանալ: Նրան մշտապես մեծ թվով ընկերներ էին այցելում: Նրանք շատ հաճելի այցելուներ էին, սակայն այդ ամենն այնքան էլ համատեղելի չէ մենամարտին պատրաստվելու հետ»,-ասել է Վեգները:

Նա նշել է, որ երբ նրանք տեղափոխեցին մարզական ճամբարը Քինբաում, Աբրահամն ավելի կենտրոնացավ մենամարտի վրա: «Սկզբում ես դժգոհ էի մենամարտի հետաձգումից, սակայն, ճիշտն ասած, դա լավ անդրադարձավ նաեւ մեզ վրա: Քինբաումում Արթուրը կարողացավ կենտրոնանալ նախապատրաստման վրա եւ բարելավել իր մարզավիճակը»,-ասել է Վեգները:

Թենիս. Մարտի 22-ին Թենիսի միջազգային ասոցիացիան (ԹՄԱ) հրատարակել է աշխարհի ուժեղագույն թենիսիստների նոր վարկանիշը:

Արգենտինահայ թենիսիստ Դավիթ Նալբանդյանը 300 միավորով զբաղեցնում է 161-րդ տեղը: Փետրվարի վարկանիշի համեմատ 2 հորիզոնականով զիջել է դիրքերը:

Առաջին տեղում է Ռոջեր Ֆեդեռերը (Շվեյցարիա), երկրորդում` Նովակ Ջոկովիչը (Սերբիա): Իսպանացի Ռաֆայել Նադալը չորրորդ տեղում է, Էնդի Մարրեյը` երրորդը:

Մարտի 24-ին առաջին շրջանում հաղթել է Լուկաշ Կուբոտին (Լեհաստան)` 6;3, 6;2 հաշվով:

Երրորդ շրջան դուրս գալիս արգենտինահայ թենիսիստը կմրցի Վիկտոր Տրոիցկու հետ, ով առաջին ռաունդը բաց էր թողել: Նալբանդյանն ու Տրոիցկին երեք անգամ խաղացել են եւ առաջատարը Նալբանդյանն է` 2:1 հաշվով:

Հանդբոլ. Հայաստանի հանդբոլի կանանց հավաքականը մարտի 18-21-ն Իսրայելում մասնակցել է «Չելենջ տրոֆի» միջազգային մրցաշարին, որին մասնակցել են նաեւ Իսրայելի, Կիպրոսի եւ Մալթայի հավաքականները:

2-րդ փուլում հայ հանդբոլիստուհիները 9:32 հաշվով զիջել են Իսրայելի հավաքականին: Ինչպես հայտնում է Հայաստանի հանդբոլի ֆեդերացիան, Հայաստանի հավաքականի դարպասները պաշտպանել է 16-ամյա Նելլի Ֆիդանյանը, որը փոխարինել է վնասվածք ստացած Աստղիկ Գյուրջինյանին: Իսկ Կիպրոսի հավաքականը 2-րդ փուլում 29:10 հաշվով հաղթել է Մալթայի հավաքականին:

Վերջին փուլում Հայաստանի հավաքականը 21:12 հաշվով պարտության է մատնել Մալթայի հավաքականին եւ զբաղեցրել 3-րդ տեղը: Եզրափակչում հանդիպել են Իսրայելի եւ Կիպրոսի հավաքականները, հաղթել է Իսրայելի հավաքականը:

Հայաստանի հանդբոլի ֆեդերացիայի մամլո ծառայությունը PanARMENIAN.Net ի թղթակցին հայտնել է, որ Արմինե Անտոնյանը 23 գնդակներով դարձել է մրցաշարի լավագույն ռմբարկուն եւ մտել մրցաշարի խորհրդանշական հավաքականի մեջ: