Արցախը երբեք եւ ոչ մի պայմանով Ադրբեջանի մաս չի կազմի

Լեռնային Ղարաբաղի Հանրապետության դիրքորոշումը բանակցությունների ձեւաչափի վերաբերյալ անփոփոխ է մնացել` առանց Արցախի մասնակցության որպես բանակցային գործընթացի լիարժեք կողմ ադրբեջանա-ղարաբաղյան հակամարտությունը կարգավորել չի լինի: Դա խոստովանում են նաեւ միջազգային միջնորդները, օրինակ, ԵԱՀԿ Մինսկի խմբի համանախագահները: Ստեփանակերտը պետք է մասնակցի բանակցային գործընթացի բոլոր փուլերին` կարգավորման փիլիսոփայության շուրջ կարծիքների փոխանակումից սկսած մինչեւ կոնկրետ քայլերի եւ պայմանավորվածությունների մշակում ու իրագործում:

Ինչ վերաբերում է ներկայացուցչության մակարդակին, ապա այն պետք է համապատասխանի բանակցային գործընթացի մյուս կողմերի ներկայացվածության մակարդակին, առաջին հերթին Ադրբեջանի: Եթե բանակցությունները գնում են պետությունների ղեկավարների մակարդակով, ապա ԼՂՀ-ն պետք է ներկայացնի երկրի նախագահը, եթե արտգործնախարարների մակարդակով` մեր հանրապետության արտգործնախարարը:

Ադրբեջանը յուրովի է մեկնաբանում միջազգային իրավունքը, սակայն դա բոլորովին չի նշանակում, թե մեկնաբանությունը ճիշտ է: Միջազգային իրավունքում չկա եւ չի կարող լինել տարածքային ամբողջականության սկզբունքի գերակայություն ազգերի ինքնորոշման սկզբունքի հանդեպ: Եվ դրա վառ ապացույցն է Կոսովոյի, Աբխազիայի եւ Հարավային Օսեթիայի անկախության ճանաչումը; Համոզված եմ, որ ադրբեջանա-ղարաբաղյան հակամարտության համապարփակ լուծման միակ մեխանիզմը Արցախի ինքնորոշման փաստի ճանաչումն է:

Ցանկանում եմ կրկնել մեկ անգամ եւս, որ ադրբեջանա-ղարաբաղյան հակամարտության լուծումը անհնար է առանց պաշտոնական Ստեփանակերտի ուղղակի եւ համակողմանի մասնակցության բանակցային գործընթացի բոլոր փուլերում:

Ինչ վերաբերում է նրան, թե ինչն է մեզ համար անընդունելի: ԼՂՀ դիրքորոշումը հետեւյալն է` մեզ համար չի կարող վերադարձ լինել դեպի անցյալ, Արցախը երբեք եւ ոչ մի պայմանով Ադրբեջանի մասը չի լինի: Չի կարող կասկածի տակ առնվել նաեւ ԼՂՀ անվտանգության ապահովումը բոլոր առումներով: Ինչ վերաբերում է առանձին հարցերի, ապա մենք պատրաստ ենք քննարկել դրանք Ադրբեջանի հետ:

Կարծում եմ, մեր ժողովրդի մոտ մշակվել է ղարաբաղյան հակամարտության կարգավորման տրամաբանության համազգային դիրքորոշում: Եվ այստեղ տարաձայնություններ լինել չեն կարող: Մենք երախտապարտ ենք Հայաստանին` ԼՂՀ շահերը բանակցություններում ներկայացնելու եւ պաշտպանելու համար: Սակայն, ինչպես արդեն ասացի, առանց ԼՂՀ անմիջական մասնակցության ղարաբաղյան հակամարտությունը անհնար է կարգավորել: Հիմնականում հենց բանակցությունների ոչ լիարժեք ձեւաչափի պատճառով է, որ ձգձգվում է ղարաբաղա-ադրբեջանական դիմակայությունը: Սակայն դա պաշտոնական Բաքվի մեղքն է, որի ոչ կառուցողական դիրքորոշման պատճառով մեր երկիրը, հակամարտության կողմ լինելով Ադրբեջանի հետ մեկտեղ, չի մասնակցում նրա կարգավորման շուրջ բանակցություններին:

Մեր հանրապետությունը բոլոր պայմաններն ունի կայուն զարգացման համար: Դա եւ բնական պաշարներն են, եւ ամենակարեւորը, մարդկային կապիտալը: Մենք կշարունակենք ամրապնդել մեր անկախ պետականությունը, զարգացնել տնտեսությունը, կառուցել ժողովրդավարական, իրավական եւ սոցիալական պետություն, անընդմեջ բարձրացնելով մեր քաղաքացիների բարեկեցությունը: Համոզված եմ, մեր ժողովուրդն ու նրա պետականությունը խոստումնալից ապագա ունեն: