ՄԻՉԻԳԱՆԻ ՀԱՅԵՐԻ ՑՈՒՅՑԸ ԹՈՒՐՔԱԿԱՆ ՄՇԱԿՈՒԹԱՅԻՆ ԱՍՈՑԻԱՑԻԱՅԻ ԴԵՄ

PanARMENIAN.Net - Դեթրոյթում ապրող ավելի քան 500 հայեր մայիսի 15-ին կազմակերպել էին ցույց, որի նպատակն էր արգելել Թուրքական մշակութային ասոցիացիայի ներկայացուցիչներին այցելել Հոլոկոստի զոհերի հիշատակի կենտրոն, տեղեկացնում է «Երկիր» թերթը: Միչիգանի Թուրքական մշակութային ասոցիացիան Ամերիկայի թուրքական ասոցիցիայի մի մասն է կազմում, որը ԱՄՆ քաղաքական շրջանակներում աշխատանք է տանում ընդդեմ Հայոց ցեղասպանության ճանաչման: Միչիգանի Հայ Դատի հանձնախմբի կազմակերպած ցույցին միացել են շրջանի 12 հայկական կազմակերպություններ, որոնց անդամները բարձրացրել են ամերիկյան եւ հայկական դրոշներն ու բարձրաձայն հիշեցրել Հայոց ցեղասպանության մասին Հիտլերի հայտնի արտահայտությունը: Ցույցի մասնակից Ներսես Կետիկյանը նշել է, որ հավաքի թիրախը թուրքական պատվիրակությունն է, այլ ոչ Հոլոկոստի զոհերի հիշատակի կենտրոնը, որի աշխատակիցներին նա հայտարարել է. «Մենք հարգում ենք ձեր եւ այլ ողջակիզումների պատմությունը, եւ ուր էլ որ թուրքական մշակութային ասոցիացիայի ներկայացուցիչները լինեն, մենք նրանց պիտի փոխանցենք, որ պայքարելու ենք Ցեղասպանության ուրացման եւ պատմության խեղաթյուրման դեմ ու պիտի աշխատենք Հայոց ցեղասպանության միջազգային ճանաչման համար»: