Պոլ Գոբլը կարծում է, որ ապագայում իր անունը հիշատակվելու է միայն Ղարաբաղը Մեղրիով փոխանակելու ծրագրի առիթով

PanARMENIAN.Net - «Գիտեմ, որ իմ մահվանից հետո պատմական գրքերում իմ անունը հիշատակվելու է միայն մեկ հարցի կապակցությամբ: Դա մեկ պարբերությունում արտահայտված, 1992 թվականի հունվարին գրված եւ ԱՄՆ նախկին պետքարտուղարին ներկայացված գաղափարն է, այսպես կոչված «Գոբլի ծրագիրը»: Այդ մասին ասել է Ադրբեջանի Դիվանագիտական ակադեմիայի Հետազոտական կենտրոնի ղեկավար, հայտնի ամերիկացի քաղաքագետ Պոլ Գոբլը պատասխանելով հարցին, թե «Արդյոք զբաղվում ե՞ք Դուք այսօր Լեռնային Ղարաբաղի հակամարտության կարգավորման հարցով, եւ արդյոք դուք ունեք նոր առաջարկներ»: Նրա խոսքերով, այն ժամանակ նա գտնում էր, որ այդ հակամարտությունը, գաղթականների եւ ստիպված վերաբնակների խնդիրները հասել են այնպիսի կրիտիկական կետի, որ անհրաժեշտ է դիտարկել բոլոր հնարավորությունները. «2008 թվականը 1992-ը չէ, այդ պատճառով անցկացվող քաղաքականությունը եւ ընդունվող որոշումները պետք է տարբերվեն նրանցից, որոնք կային 1992-ին: Ես ինձ համար որոշում են ընդունել, որ քանի դեռ աշխատում եմ Ադրբեջանում, չեմ մեկնաբանելու ձեր երկրի քաղաքականությունը», հաղորդում է ադրբեջանական ԱՊԱ գործակալությունը: