Հայաստանի հավաքականն արծաթե մեդալներ նվաճեց 3-րդ դիվիզիոնի տափօղակով հոկեյի Աշխարհի առաջնությունում

PanARMENIAN.Net - 3-րդ տեղի համար խաղում ՀԱՀ-ը պարտության է մատնել Մոնղոլիայի հավաքականին և նվաճել բրոնզե մեդալներ: Առաջնության լավագույն դարպասապահ է ճանաչվել Դևիդ Բերգերը (ՀԱՀ), լավագույն պաշտպան և հարձակվող են ճանաչվել հայ հոկեիստներ Դավիթ Թագվորյանը և Հակոբ Ավետիսյանը, իսկ լավագույն խաղացող` Կիմ Կվանգ-Հոն (Հյուսիսային Կորեա):

Հայաստանի տափողակով հոկեյի հավաքականի գլխավոր մարզիչ Դուգլաս Դե Չեզարեն PanARMENIAN.Net ի թղթակցի հետ զրույցում ասաց, որ իր սաները եզրափակչում ցույց չտվեցին իրենց բոլոր խաղարկային որակները: "Չնայած, որ թիմը երիտասարդ է, այն շատ հաջող ելույթ ունեցավ: Կարծում եմ` մենք մեծ ձեռքբերումներ կունենանք և կկարողանանք բարելավել խաղարկային որակները",- գտնում է Հայաստանի հավաքականի գլխավոր մարզիչը:

Հայաստանի հավաքականի պաշտպան Պետրոս Ժամկոչյանը PanARMENIAN.Net ի թղթակցի հետ զրույցում ասաց, որ առաջնությունը շատ ջերմ մթնոլորտում է անցել: "Չէինք սպասում, որ Հայաստանում այդպիսի ակտիվ ու լավ երկրպագուներ կան: Դա մեզ ուժ տվեց,- ասաց Ժամկոչյանը:- Եզրափակչում մենք հոգնած էինք, բայց արեցինք ամեն ինչ, որպեսզի հաղթեինք: Հաջորդ տարի կփորձենք ոսկե մեդալներ նվաճել և երկրորդ դիվիզիոն անցնել": Իսկ հարձակվող Մանուկ Բալյանի խոսքով, որպեսզի հոկեյը Հայաստանում զանգվածային բնույթ ստանա, հարկավոր է հոկեյի շատ դպրոցներ և սահադաշտեր կառուցել: "Մենք արդեն 5 տարի զբաղվում ենք հոկեյով, և կարծում ե, որ կկարողանանք հաջողության հասնել, քանի որ մեր թիմի մարզիկները երիտասարդ են ու տաղանդավոր",- նշեց Բալյանը:

Արդեն մեկ օր անց` ապրիլի 19-ին, Հայաստանի սփյուռքի նախարար Հրանուշ Հակոբյանը հանդիպեց Հայաստանի տափողակով հոկեյի հավաքականի հետ: Հանդիպման ընթացքում Հակոբյանը շնորհավորեց հոկեիստներին հաջողության առթիվ և նոր ձեռքբերումներ մաղթեց: "Ձեր շնորհիվ հոկեյը սիրելի դարձավ Հայաստանում: Ցավում եմ, որ արծաթե մեդալներ եք նվաճել, բայց ամենակարևորը, որ դուք կամք ունեք և կարող եք շատ բանի հասնել",- ասաց նախարարը:

Նույն օրը հոկեիստներին ընդունեց նաև ՀԱՕԿ նախագահ Գագիկ Ծառուկյանը: Նա շնորհավորեց հոկեիստներին հոյակապ ելույթի առթիվ: "Մենք չէինք սպասում, որ Հայաստանի հավաքականը կարող է այդպես լավ խաղալ, բայց մեր հոկեիստներն ապացուցեցին, որ հոկեյը` որպես սպորտաձև, կա Հայաստանում և աստիճանաբար զարգանում է",- ասաց Ծառուկյանը:

Շախմատ. ՖԻԴԵ-ի (շախմատի միջազգային Ֆեդերացիա) նախագահ Կիրսան Իլյումժինովը Օլիմպիադայի բողոքարկման հանձնաժողովի անդամ է նշանակել Հայաստանի շախմատի Ֆեդերացիայի պատվավոր նախագահ և ՖԻԴԵ-ի պատվավոր փոխնախագահ Վանիկ Զաքարյանին: 2010 թվականի շախմատի Օլիմպիադան տեղի կունենա Խանտի-Մանսիյսկում սեպտեմբերի 19-ից հոկտեմբերի 4-ը: Իսկ օգոստոսի 2-17-ը Լեհաստանի Խոտովա քաղաքում տեղի կունենա աշխարհի մինչև 20 տարեկան պատանիների և աղջիկների առաջնություն, որին կմասնակցի 168 երկիր, այդ թվում նաև Հայաստանը: Շախմատի աշխարհի պատանեկան առաջնությունում Հայաստանը կներկայացնեն Ռոբերտ Հովհաննիսյանը և Անի Խանամիրյանը: Հայ գրոսմայստերներ Լիլիթ Մկրտչյանն ու Էլինա Դանիելյանը կմասնակցեն ապրիլի 25-ից մայիսի 8-ը ՌԴ Նալչիկ քաղաքում կայանալիք "Գրան պրի" մրցաշարի 3-րդ փուլին:

Թենիս. Արգենտինահայ թենիսիստ Դավիթ Նալբանդյանը Monte-Carlo Rolex Masters-2010 մրցաշարի “Մաստերս” սերիայի 1/4 եզրափակիչում հանդիպեց աշխարհի երկրորդ ռակետ, սերբ Նովակ Ջոկովիչի հետ: Ջոկովիչը 6:2, 6:3 հաշվով հաղթանակ տարավ: Արգենտինահայ թենիսիստ Դավիթ Նալբանդյանը բաց կթողնի Barcelona Open Banc Sabadell-2010 (Բարսելոնա) և Internazionali BNL d'Italia-2010 (Հռոմ) առաջնությունները: Նալբանդյանը ձախ ոտքին ծնկից ներքև ընկած ջլի պատռվածքի պատճառով չի մասնակցի Barcelona Open Banc Sabadell-2010 (Բարսելոնա) և Internazionali BNL d'Italia-2010 (Հռոմ) առաջնություններին: Նրա փոխարեն Բարսելոնայի առաջնությանը կմասնակցի Էկվադորից թենիսիստ Նիկոլաս Լապենտին:

Ֆուտբոլ. Հայաստանի ֆուտբոլի հավաքականը 2011թ. Եվրոպայի առաջնության ընտրական մրցաշարի երկրորդ խմբում մայիսի 20-ին Տալլինում կհանդիպի Էստոնիայի հավաքականի հետ: Առաջին խաղը երկրորդ խմբում այդ թիմերի միջև տեղի է ունեցել 2009թ. նոյեմբերի 14-ին Վ.Սարգսյանի անվան հանրապետական մարզադաշտում; Խաղն ավարտվել է 1:1 հաշվով: Հայաստանի հավաքականի գոլը խփել է Հենրիխ Մխիթարյանը: Երկրորդ խմբում Հայաստանի հավաքականը 7 միավորով զբաղեցնում է 5-րդ տեղը, իսկ էստոնացիները 9 միավորով 3-րդ տեղում են: Խմբի առաջատարը Շվեյցարիայի հավաքականն է` 16 միավորով: ԵՎՐՈ-2012 ընտրական մրցաշարի B խմբի խաղացանկում տեղի են ունեցել որոշակի փոփոխություններ: Հայաստանի ֆուտբոլի ֆեդերացիան և Ռուսաստանի ֆուտբոլային միությունը պայմանավորվել են տեղափոխել Հայաստան-Ռուսաստան և Ռուսաստան-Հայաստան հանդիպումների անցկացման վայրերը: Այսպիսով, 2011թ. մարտի 26-ին կկայանա Հայաստան-Ռուսաստան հանդիպումը, իսկ 2011թ. հունիսի 4-ին` Ռուսաստան-Հայաստան հանդիպումը: Բ խմբի մնացած խաղերում փոփոխություն չկա: Հանգստյան օրերին կայացավ Հայաստանի ֆուտբոլի առաջնության 4-րդ փուլը: “Միկա” ՖԱ-ը Գյումրիի քաղաքային մարզադաշտում կարոցացել է պարտության մատնել “Շիրակին” 1:0 հաշվով: 53-րդ րոպեին գոլ է խփել Վիգեն Համբարձումյանը: Իսկ առաջնության նորեկ Դիլիջանի “Իմպուլսը” 1:0 հաշվով հաղթանակ է տարել “Կիլիկիայի” նկատմամբ: Գոլի հեղինակ է դարձել Ռոմեո Ջենեբյանը: Ընթացիկ առաջնությունում շարունակում է վստահ ելույթ ունենալ 2009-ի Հայաստանի չեմպիոն “Փյունիկը”, որն իր 3-րդ հաղթանակը տարել է “Ուլիսի” նկատմամբ: “Գանձասար”- “Բանանց” հանդիպումն ավարտվեց “Բանանցի” հաղթանակով 1:2 հաշվով: 4-րդ փուլից հետո մրցաշարային աղյուսակը 10 միավորով գլխավորում է “Փյունիկը”, որից 1 միավորով ետ է մնում “Միկան”, իսկ “Բանանցը” 7 միավորով 3-րդ տեղում է: Իսկ ապրիլի 20-ին և 21-ին կայացան Հայաստանի Գավաթի կիսաեզրափակիչ հանդիպումները: "Փյունիկ" - "Ուլիս" խաղում Հայաստանի 2009թ. գավաթակիր "Փյունիկը" 1:0 հաշվով հաղթանակ տարավ: Իսկ "Բանանց" - "Միկա" խաղն ավարտվեց հօգուտ "Բանանցի"` 2:0: Այդպիսով, ինչպես և 2009 թվականին, եզրափակչում կհանդիպեն "Փյունիկն" ու "Բանանցը": Նախորդ անգամ Հենրիկ Մխիթարյանի գոլի շնորհիվ "Փյունիկը" հաղթանակ տարվա և նվաճեց Հայաստանի Գավաթը:

Լող. Ապրիլի 21-ից 23-ը Երևանում` Դավիթ Համբարձումյանի սպորտդպրոցում ընթանում է Հայաստանի լողի բաց առաջնությունը: Մրցաշարին մասնակցում են 110 լողորդներ և լողորդուհիներ Երևանից ու Գյումրիից, ինչպես նաև սահմանափակ հնարավորություններով 5 լողորդներ: "Առաջնության ավարտից հետո մեր լողորդները կպատրաստվեն միջազգային մրցաշարերին: Պատանիները կմասնակցեն Եվրոպայի առաջնությանը, իսկ մեծահասակների աշխարհի առաջնությունը կկայանա Դուբայում",- PanARMENIAN.Net ի թղթակցին հայտնեց Հայաստանի Լողի ֆեդերացիայի նախագահ Իգոր Սաֆարյանը:

Ձյուդո. Ապրիլի 22-25-ը Վիեննայում (Ավստրիա) ընթանում է ձյուդոյի Եվրոպայի առաջնությունը, որին մասնակցում են 3 հայ ձյուդոիստներ: Գլխավոր մարզիչ Արթուր Գևորգյանի ղեկավարությամբ Եվրոպայի առաջնության ժամանակ ելույթ կունենան 2009 թվականի աշխարհի առաջնության բրոնզե մեդալակիր Հովհաննես Դավթյանը (60 կգ ք/կ), 2010թ. Աշխարհի գավաթի մրցանակակիր Արմեն Նազարյանը (66 կգ ք/կ) և Արտյոմ Բաղդասարյանը (73 կգ ք/կ): Նազարյանն իր ելույթն ավարտել է 7-րդ տեղում, իսկ Դավթյանը` 5-րդ: