Հայաստանի հավաքականը պատանեկան օլիմպիական խաղերում նվաճել է երեք մեդալ

PanARMENIAN.Net - Օգոստոսի 16-ին ելույթ ունեցավ հունահռոմեական ոճի ըմբշամարտիկ Վարոս Պետրոսյանը (85 ք/կ): Պետրոսյանը 5-րդ տեղի համար պայքարում հաղթեց Ալ-Աբեդին (Իրաք): Այս քաշային կարգում չեմպիոն դարձավ Ռուսլան Օդենցովը (Ռուսաստան): Օգոստոսի 17-ին հանդես են եկել ազատ ոճի ըմբշամարտիկ Արտակ Հովհաննիսյանը և վազորդ Դիանա Խուբեսերյանը: Ազատ ոճի ըմբշամարտիկ Արտակ Հովհաննիսյանը (46 կգ ք/կ) 3 մենամարտ է անցկացրել: Հայ մարզիկը 0:3 հաշվով հաղթել է Աբդելնաեմ Մոհամեդին (Եգիպտոս), 1:3 հաշվով պարտվել Ալդար Բալժինիմաևին (Ռուսաստան), այնուհետև 3-րդ տեղի համար մրցել է Դավիլա Անդրիի հետ (Վենեսուելա): Արտակ Հովհաննիսյանը 1:3 հաշվով հաղթանակ է տարել և բրոնզե մեդալ նվաճել: Եզրափակիչում հանդիպել են Մեհրան Շեյհին (Իրան) և Ալդար Բալժինիմաևը (Ռուսաստան), օլիմպիական չեմպիոն է դարձել Բալժինիմաևը: Նա հաղթել է 0:4 հաշվով:

Սինգապուրում պատանեկան ամառային առաջին օլիմպիական խաղերում օգոստոսի 17-ին ելույթ են ունեցել Հայաստանի լողորդները: 50 մ. ազատ լողաոճում Սերգեյ Պևնևը 52 մասնակիցներից գրավել է 32-րդ տեղը (25.83վրկ) , իսկ 50մ թիկնալողում Անահիտ Բարսեղյանը 22 մարզիկների միջև ծավալվող պայքարում ճանաչվել է 17-րդը (32.79 վրկ):

Օլիմպիական խաղերում Հայաստանի հավաքականը նվաճել է 2 բրոնզե մեդալ` ծանրամարտում և ազատ ոճի ըմբշամարտում: Մեդալակիրներ են դարձել Սմբատ Մարգարյանը (56 ք/կ) և Արտակ Հովհաննիսյանը (46 ք/կ):

Օգոստոսի 18-ին նետաձիգ Վասիլ Շահնազարյանը 1/16 եզրափակիչում մրցել է Կարլոս Ռիվասի հետ և զիջել է դիրքերը 7:1 հաշվով:

Վահան Վարդանյանը բազմամարտի մրցումների եզրափակիչում 18 մասնակիցներից զբաղեցրել է 8-րդ տեղը: Չեմպիոն է դարձել Ճապոնիայի մարզիկ Լյույա Կամոտոն:

Նույն օրը ելույթ է ունեցել նաև վազորդ Դիանա Խուբեսերյանը` 100 մ հեռավորության վազքով: Խուբեսերյանը 7 մասնակիցներից զբաղեցրել է 5-րդ տեղը` 13,03 վրկ արդյունքով:

Ծանրամարտիկ Սմբատ Մարգարյանը (56 ք/կ) և ազատ ոճի ըմբշամարտիկ Արտակ Հովհաննիսյանը (46 ք/կ) նվաճել են բրոնզե մեդալ:

Պատվո պատվանդան է բարձրացել ծանրորդ Գոռ Մինասյանը (+85կգ, Գյումրի): Նա պայքարի մեջ մտավ օգոստոսի 19-ին: Գոռը պոկեց 160կգ, հրեց 190կգ և երկամարտի 350կգ արդյունքով գրավեց երկրորդ տեղն ու արժանացավ արծաթե մեդալի: Նա ընդամենը 1կգ-ով էր հետ մնում իրանցի Ալիռեզա Կազեմինեջադից (155+196): Երրորդը եգիպտացի Հասան Մոհամեդն էր (330կգ):

Ֆուտբոլ- Հայաստանի ֆուտբոլի երիտասարդական հավաքականը 2011թ. Եվրոպայի առաջնության ընտրական մրցաշարի շրջանակներում օգոստոսի 11-ին Երևանի Վազգեն Սարգսյանի անվան հանրապետական մարզադաշտում ընդունել էր Վրաստանի հավաքականին:

Չնայած այն բանին, որ հայ ֆուտբոլիստներն առավելություն ունեին ողջ խաղի ընթացքում և ավելի շատ գոլային պահեր էին ստեղծում, չկարողացան հաղթանակ տանել: 36-րդ րոպեին Հայաստանի հավաքականի դարպասապահ Էդվարդ Հովհաննիսյանն իր տուգանային հարվածով գետնին տապալեց վրացի ֆուտբոլիստին, և խաղի մրցավար Դիմիտար Մեկարովսկին 11-մետրանոց հարված նշանակեց, որն իրագործեց Ջանո Անանիոձեն և բացեց խաղի հաշիվը:

Վրացիները երկրորդ գոլը խփեցին 50-րդ րոպեին, աչքի ընկավ Մատե Վացաձեն: Հայաստանի հավաքականի առաջին գոլը խփեց թիմի ավագ Հենրիխ Մխիթարյանը: 3 րոպե անց Նիկա Կվեկվեսկիրին խաղի հաշիվը դարձրեց 1:3: Հայ ֆուտբոլիստները Վալտեր Պողոսյանի շնորհիվ միայն կարողացան կրճատել խաղի հաշիվը: Հանդիպումն ավարտվեց Վրաստանի երիտասարդական հավաքականի հաղթանակով` 2:3 հաշվով:

Պարտությունից հետո 2011թ. ԵԱ ընտրական մրցաշարի երկրորդ խմբում Հայաստանի երիտասադական հավաքականը 10 միավորով իջել է 5-րդ տեղը, Վրաստանի հավաքականը 12 միավորով 3-րդ տեղում է: Խմբի առաջատարը Շվեյցարիան է (17 միավոր):

Հայաստանի և Վրաստանի հավաքականների պատասխան խաղը կկայանա Թբիլիսիում, սեպտեմբերի 7-ին:

Օգոստոսի 11-ին «Հրազդան» մարզադաշտում Հայաստանի ազգային հավաքականն ընկերական հանդիպում է անցկացրել Իրանի հավաքականի հետ: Դա երկրորդ ընկերական հանդիպումն էր Վարդան Մինասյանի ղեկավարությամբ, առաջին խաղում հայ ֆուտբոլիստները 3:1 հաշվով հաղթել էին Ուզբեկստանի հավաքականին:

Խաղն ակտիվ էին սկսել հայ ֆուտբոլիստները, և արդեն 11-րդ րոպեին գոլ էր խփել Մարկոս Պիզելին: Հայաստանի հավաքականի կազմում առաջին անգամ ելույթ էր ունենում «Ռենդերսի» (Դանիա) ֆուտբոլիստ Յուրի Մովսիսյանը:

Արդեն 37-րդ րոպեին կիսապաշտպան Աղվան Մկրտչյանը հեռահար հարվածով գրավել էր հակառակորդի դարպասը: Երկրորդ խաղակեսում 3 գոլ էին խփել իրանցի ֆուտբոլիստները:

51-րդ րոպեին Մարկոս Պիզելիին 11-մետրանոց հարվածի իրավունք էր տրվել, բայց Լևոն Փաչաջյանը չկարողացավ այն իրագործել: Դրանից հետո իրանցի ֆուտբոլիստները գրոհել են: Գոլերի հեղինակներն էին` Սեյեդ Ադիաղիլին և Սեյեդ Մոհամմեդ Օսենին: 78-րդ րոպեին կարմիր քարտ էր ստացել Ջավադ Նեկունամը, բայց իրանցիները երկրորդ խաղակեսի լրացուցիչ րոպեին 11-մետրանոց հարվածով հաղթել են` 3:1 հաշվով:

Թենիս- Դավիթ Նալբանդյանը Տորոնտոյում ընթացող Rogers Cup-2010-ում առաջին պարտությունն է կրել:Օգոստոսի 13-ին Rogers Cup-2010-ի քառորդ եզրափակիչում Նալբանդյանը հանդիպել էր աշխարհի 4-րդ ռակետ բրիտանացի Էնդի Մարեի հետ:

Խաղը տևել է 1 ժամ 9 րոպե և ավարտվել Մարեի հաղթնակով 6:2, 6:2 հաշվով: Այդ հաղթանակի շնորհիվ բրիտանացի թենիսիստը Նալբանդյանի հետ հանդիպումների հաշիվը դարձրել է 1:2:

ATP (Թենիսի միջազգային ասոցիացիան) հրապարակել է աշխարհի ուժեղագույն թենիսիստների վարկանիշային սանդղակը: Դավիթ Նալբանդյանը Վաշինգտոնում (ԱՄՆ) Legg Mason Tennis Classic-2010 առաջնությունում տարած հաղթանակից և Տորոնտոյում (Կանադա) Rogers Cup-2010 մրցաշարից հետո 1145 միավորով բարձրացել է 37-րդ տեղը: Մինչ այդ նա զբաղեցնում էր 45-րդ տեղը:

Սանդղակը գլխավորում է Ռաֆայել Նադալը (Իսպանիա), նա 10 925 միավոր ունի, Ռոջեր Ֆեդերերը (Շվեյցարիա) 2-րդ տեղում է, իսկ Նովակ Ջոկովիչը (Սերբիա) եզրափակում է լավագույն եռյակը:

Աշխարհի արդեն 37-րդ ռակետ Դավիթ Նալբանդյանը համարյա առանց պայքարի դուրս է եկել Ցինցինատիում ընթացող Western & Southern Financial Group Masters-2010-ի երրորդ փուլ, որի մրցանակային ֆոնդը կազմում է 2.430.000 դոլար: Երկրորդ մրցաշրջանում արգենտինահայ թենիսիստը հաղթել է Ջոն Այզներին:Մեկնարկային ցանցում 5:4 հաշվում Այզները հրաժարվել է խաղը շարունակել, ընդ որում, նա 5:3 միավորով էր խաղում: Խաղը տևել է ընդամենը 36 րոպե:

Մրցումների երրորդ մրցաշրջանում Նալբանդյանը կհանդիպի սերբ Նովակ Ջոկովիչի հետ: Նրանք պաշտոնական խաղերում հանդիպել են 4 անգամ, և սերբը 3:1 հաշվով առավելություն ունի:

Բոքս- Showtime հեռուստաընկերությունն ավարտում է 4 բռնցքամարտիկների մասնակցությամբ թեթևագույն քաշային կարգում մրցաշարի անցկացման նախապատրաստությունը: Մասնակցում են` երկու քաշային կարգերում աշխարհի նախկին չեմպիոն Վիկ Դարչինյանը (Հայաստան), IBF վարկածով չեմպիոն Յոննի Պերեսը (Կոլումբիա), նույն քաշային կարգում աշխարհի նախկին չեմպիոն Ջոզեֆ Ագբեկոն (Գանա) և տիտղոսների հավակնորդ Աբներ Մարեսը (Մեքսիկա), հաղորդում է allboxing.ru-ն` մեջբերելով ESPN.com-ին:

Ի տարբերություն Super Sixi` այդ մրցաշարը տեղի կունենա օլիմպիական համակարգով և կիսաեզրափակիչում Դարչինյանը կհանդիպի Աբներ Մարեսի հետ, Յոննի Պերեսը և Ջոզեֆ Ագբեկոն կանցկացնեն խաղ-ռևանշներ: Այդ երկու մենամարտերը տեղի կունենան մի բռնցամարտի շոուի ժամանակ, որը ենթադրաբար տեղի կունենա նոյեմբերի 6-ին կամ դեկտեմբերի 18-ին, հաստատել է Դարչինյանի և Պերեսի փրոմոութեր Գերի Շոուն:

«Ես պետք է հանդիպեմ Showtime-ի ներկայացուցիչ Քեն Հերշմանի հետ, սակայն մենամարտերը կկայանան,- ասել է Շոուն: - Կարծում եմ, մենք ամեն ինչի մասին պայմանավորվել ենք: Ես պայմանագրերը կստորագրեմ Վախթանգի և Պերեսի անունից»: Ի սկզբանե նախատեսվում էր 6 բռնցքամարտիկների մասնակցություն Super Six-ի նմանությամբ, սակայն WBC և WBO վարկածներով չեմպիոն Ֆեռնանդո Մոնտիելյայի և գերթեթև քաշային կարգում նախկին չեմպիոն Նոնիտո Դոնեյրի փրոմոութեր Բոբ Արումը շահագրգռված չեն այդ հարցում:

ՀՀ սփյուռքի նախարար Հրանուշ Հակոբյանն ընդունել է Գերմանիայից ժամանած WBA, WIBF և WBO վարկածներով կին պրոֆեսիոնալների շարքում գերթեթև քաշային կարգում բռնցքամարտի աշխարհի չեմպիոն Սյուզի Քենտիկյանին և նրա մենեջեր գերմանացի Քրիստոֆ Վեշեին:

Սփյուռքի նախարարը ողջունել էր հյուրերին և ասել, որ շնորհակալ է Գերմանիայի Դաշնային Հանրապետությանը, որ օտարերկրացիներին հնարավորություն է տալիս հաջողությունների հասնել:

Քրիստոֆ Վեշեն, իր հերթին, նշել էր, որ Գերմանիայի քաղաքական էլիտան հետաքրքրված է հայուհի բռնցքամարտիկով: Վեշերը նշել է նաև, որ ինքը` որպես Սյուզիի մենեջեր, շահագրգռված է, որ վերջինս մասնակցի նաև Հայաստանում կազմակերպված ծրագրերին` այդպիսով ամրապնդելով Հայաստան-Գերմանիա կապը:

Քննարկվել են նաև «Հայաստանի կյանքի ծառ» (Lebensbaum Armenien) նախագիծը, որի մասն է կազմում նաև Սյուզի Քենտիկյանը: Առաջարկվել է, որ նախագծում ընդգրկվի ոչ միայն Հայաստանը, այլև ամբողջ աշխարհի հայությունը: Նախարար Հրանուշ Հակոբյանը ողջունել է նաև Սյուզի Քենտիկյանի համար Երևանում բռնցքամարտի մենամարտ կազմակերպելու միտքը: Հանդիպման վերջում ՀՀ սփյուռքի նախարարը հյուրերին հրավիրել է մասնակցելու «Արի տուն 2010» ծրագրի 4-րդ խմբի մեկնարկի համար կազմակերպված միջոցառմանը:

Գերմիջին քաշային կարգում աշխարհի էքսչեմպիոն Կարլ Ֆրոչը (Անգլիա) լավ գիտի, որ իր հակառակորդ Արթուր Աբրահամը (Գերմանիա) ձեռքերը վեր է պահում` այդպես պաշտպանելով գլուխը հակառակորդի հարվածներից, սակայն նրա խոսքերի համաձայն, իր համար դժվար չի լինի Աբրահամի պաշտպանությունը կոտրել և հաղթել նրան: Նրանց մենամարտը տեղի է ունենալու հոկտեմբերի 2-ին` Մոնրեալում (Կանադա), «Super Six» մրցախաղի շրջանակներում:

«Ես արդեն նախատեսված քսանից հինգ շաբաթ անցկացրել եմ մարզաճամբարում: Եվ հիմա արդեն պետք է լավ մարզավիճակում լինեմ: Ամեն ինչ լավ է ընթանում և ես վստահ եմ, որ Աբրահամին կհաղթեմ, - ասել է Ֆրոչը: - Ես չեմպիոնի հոգեբանություն ունեմ: Նա սպասման մեջ է, զուտ եվրոպական պաշտպանություն ունի, բայց եթե իմ հետ պայքարում էլ այդպես գործի, ապա ես փորձելու եմ նրա կողոսկրը ջարդել»:

Անգլիացի մարզիկի խոսքերի համաձայն, Աբրահամը բարդ և դաժան մրցակից է, սակայն ինքը հարգանքով է վերաբերվում նրա հարվածի հզորությանը:

Միջին քաշային կարգում անպարտելի ըմբշամարտիկ, ԱՄՆ-ն ներկայացնող Վանես Մարտիրոսյանը (28-0, 17 նոկաուտ) կարող է հանդիպել լեհ Պավել Վոլակի հետ (27-1, 17 նոկաուտ):

Սպասվում է, որ այդ մարտը տեղի կունենա բռնցքամարտի երեկոյի շրջանակներում դեկտեմբերի 4-ին, գլխավոր իրադարձություն կդառնա WBA վարկածով փոքր միջին քաշային կարգում չեմպիոն Միգել Կոտտոյի (Պուերտո Ռիկո) և Խուլիո Ցեզար Չավեսի (Մեքսիկա) միջև մենամարտը:

Ի սկզբանե նախատեսվում էր, որ Վոլակի հետ կմրցի Չավեսը, սակայն վերջինս հրաժարվել է մարտից հանուն Կոտտոյի հետ մենամարտի:

Շախմատ Չոտովում (Լեհաստան) ավարտվել է մինչև 20 տարեկանների շախմատի աշխարհի առաջնությունը: Օգոստոսի 16-ին կայացել է վերջին 13-րդ տուրը: Հայ շախմատիստներից հաղթանակ է տարել միայն Ռոբերտ Հովհաննիսյանը: Նա հաղթել է Թոմաս Ֆոդորին (Հունգարիա) և 8 միավորով զբաղեցրել 18-րդ տեղը: 10 միավորով չեմպիոն է դարձել Դմիտրի Անդրեյկինը (Ռուսաստան):

Հրայր Սիմոնյանը ոչ ոքի է խաղացել Պավել Պոտապովի հետ (Ռուսաստան) և 7 միավորով 44-րդ տեղում է: Սամվել Տեր-Սահակյանը զիջել է Դանիլա Դվորնիին (Իտալիա) և 7.5 միավորով 33-րդ տեղում է: Վերջին տուրում պարտվել է նաև Անի Խանամիրյանը և 5.5 միավորով զբաղեցրել 57-րդ տեղը: 11 միավորով չեմպիոն է դարձել Աննա Մոզիչուկը (Սլովենիա) :

Օգոստոսի 14-ին Շախմատի ակադեմիայի բակում կայացել է շախմատի առաջին համահայկական օլիմպիադայի բացման հանդիսավոր արարողությունը, որին ներկա էին ՀՀ նախագահ և Հայաստանի Շախմատի ֆեդերացիայի նախագահ Սերժ Սարգսյանը, Շախմատի ակադեմիայի տնօրեն Սմբատ Լպուտյանը և բարձրաստիճան այլ պաշտոնյաներ:

Հրանուշ Հակոբյանը նշել է, որ համահայկական օլիմպիադայում կհաղթեն հայերը և Հայաստանը: «Մեր մրցաշարի նպատակն է զարգացնել Հայաստանի և հայկական սփյուռքի միջև կապերը և տարածել հայկական շախմատային ավանդույթները: Մենք ցանկանում ենք, որպեսզի շախմատը տարածված և սիրված լինի ինչպես տարբեր երկրներում, այնպես էլ Հայաստանում ապրող հայ երիտասարդների մոտ»,- ասել է Հակոբյանը:

Իր խոսքում Սմբատ Լպուտյանը ողջունել է բոլոր մասնակիցներին և ասել, որ Հայաստանը որպես շախմատային երկիր ուրախ է ընդունել ողջ աշխարհի հայ շախմատիստներին, և օլիմպիադան տոն կդառնա բոլոր մասնակիցների համար: Առաջին շախմատային քայլը կատարել է ամենակրտսեր մասնակիցը` 10-ամյա Սամվել Սևյանը Սան Ֆրանցիսկոյից: Մրցաշարը ընթացել է անհատական և խմբակային պայքարում շվեյցարական համակարգով: Մրցակիցները որոշվելու էին վիճակահանությամբ: Օլիմպիադայում ամենաբարձր վարկանիշն ունի Օլիմպիական չեմպիոն Տիգրան Պետրոսյանը:

Համահայկական օլիմպիադան տեղի է ունեցել «Մեկ ազգ, մեկ մշակույթ» փառատոնի շրջանակներում և ավարտվել է օգոստոսի 23-ին: Դրան մասնակցում էին 12 թիմեր 10 երկրներից: Յուրաքանչյուր թիմը ներկայացնում էր 3 պատանի և մեկ աղջիկ, որոնց շարքում` 11 գրոսմայստերներ, 10 միջազգային վարպետներ և ՖԻԴԵ-ի 7 վարպետ: Թիմերը կազմվել են տարածաշրջանային սկզբունքով. Հայաստան և Ռուսաստան (2-ական թիմ), Արցախ, ԱՊՀ, Եվրոպա, Մերձավոր և Միջին Արևելք, Հյուսիսային և Հարավային Ամերիկա (մեկական թիմ):