Արցախում մեկնարկել է «Համակարգիչ բոլորի համար» ծրագրի պիլոտային փուլը

PanARMENIAN.Net - Ստեփանակերտում մեկնարկել է «Համակարգիչների մատչելիության բարձրացման» պետական աջակցության ծրագրի պիլոտային փուլը, որն իրականացնում է տնտեսական զարգացման նախարարությունը:

Ծրագիրը Հայաստանում իրականացվող «Համակարգիչ բոլորի համար» ծրագրի տեղայնացված տարբերակն է, որը հնարավորություն կտա ցանկացողներին վարկային մատչելի պայմաններով համակրգիչներ ձեռք բերել Ստեփանակերտի «Նեքստ կոմպյուտերս», «Կոմպմարկետ», «Հորիզոն» եւ «ՍԼՍ կոմպյուտերս» մասնագիտացված խանութներից:

Խանութներում նախատեսվում է մոտ ժամանակներս առանձին վաճառասեղան հատկացնել՝ ծրագրի շրջանակներում վաճառվող համակարգիչների համար, հաղորդում է Karabakh open.info-ն:

«Մեր քաղաքացիները սեղանի համակարգիչ կարող են ձեռք բերել մինչև 250 հազար դրամ արժողությամբ, իսկ նոթբուքեր` մինչև 350 հազար դրամ արժողությամբ: Համակարգիչները տրամադրվում են առանց կանխավճարի, 36 ամիս մարման ժամկետով, ամսական 10 տոկոս տոկոսադրույքով. մնացած 12 տոկոսը վճարվելու է պետության կողմից»,-karabakh-open.info-ի հետ զրույցում նշել է տնտեսական զարգացման նախարարության աշխատակազմի գործարարության խթանման վարչության ՏՏ մասնագետ Առնոլդ Աբրահամյանը:

Մեկ տարվա պիլոտային ծրագրի համար հատկացվել է մոտ 10 մլն դրամ: Ինչ վերաբերում է ծրագրին մասնակցել ցանակցողների քանակին, ապա Ա.Աբրահամյանը վստահեցրեց, որ այն պայմանավորված է ծրագրի համար հատկացված գումարով:

Ծրագրի պիլոտային փուլը հաջող անցնելու դեպքում այն շարունակական բնույթ կկրի, վստահեցրել են տնտեսական զարգացման նախարարությունում: