Լարիսա Ալավերդյանը հուսով է, որ մայիսի 6-ի ընտրությունները հասարակության միամտության եզրափակիչ փուլը կլինեն

PanARMENIAN.Net - «Ժառանգության» ընդդիմադիր կուսակցության անդամ Լարիսա Ալավերդյանը հույս է հայտնել, որ մայիսի 6-ին կայացած խորհրդարանական ընտրությունները «սև տեխնոլոգիաների ու հասարակության միամտության եզրափակիչ փուլը կլինեն»:

«Ցանկացած ընտրություն քննություն է ոչ այնքան իշխանությունների, որքան քաղաքացիական հասարակության համար»,-ասել է նա մամլո ասուլիսում:

Ալավերդյանը կարևորել է Հայաստանում քաղաքացիական հասարակության ձևավորումը: «Դա վերևից չի տրվում: Վերևից միայն հրեաներին է երկնային մանանա տրվում»,-նշել է նա հեգնանքով:

Ալավերդյանը նշել է, որ անցած ընտրությունները յուրօրինակ ինքնաբացահայտում էր ընդդիմության համար, ինչի մասին են վկայում նրանց ցույց տված արդյունքները: «Հասարակությունը միշտ ավելի խիստ գնահատական է տալիս ընդդիմությանը, քան իշխանություններին»,-ասել է նա:

Մայիսի 6-ին Հայաստանում տեղի են ունեցել խորհրդարանական ընտրություններ: Համաձայն բոլոր 1982 ընտրատեղամասերի քվեաթերթիկների մշակման արդյունքում ստացած նախնական տվյալների` կուսակցություններն ու բլոկը դասավորվել են հետևյալ կարգով. Հայաստանի Հանրապետական կուսակցություն (ՀՀԿ)` 663 066 (44,05 %), «Բարգավաճ Հայաստան» կուսակցություն (ԲՀԿ)` 454 684 (30,20 %), Ժառանգություն»` 87 095 (5,79 %), Հայ ազգային կոնգրես (ՀԱԿ) ` 106 910 (7,10 %), «Հայ Յեղափոխական Դաշնակցություն» կուսակցություն (ՀՅԴ)` 86 296 (5,73 %), «Օրինաց երկիր» կուսակցություն (ՕԵԿ)` 82 690 (5,49 %), Հայաստանի Դեմոկրատական կուսակցություն (ՀԴԿ)` 5 633 (0,37 %), Հայաստանի Կոմունիստական կուսակցություն` 15 933 (1,06 %), «Միավորված հայեր» կուսակցություն` 3 080 (0,20 %):

ՀՀԿ-ն ընտրությունների արդյունքում 131 տեղ ունեցող Ազգային ժողովում ստացել է տեղերի բացարձակ մեծամասնությունը` 69 տեղ (40 համամասնական և 29 մեծամասնական քվեարկության արդյունքում): «Բարգավաճ Հայաստանը» ստացել է 37 տեղ (28 համամասնական և 9 մեծամասնական), ՀԱԿ-ը` 7 տեղ: Դաշնակցությունն ու «Օրինաց երկիրը»` 6-ական (5-ական համամասնական և 1-ական մեծամասնական), իսկ «Ժառանգությունը»` 5: