Էդուարդ Շարմազանով. ԱՊՀ տարածքում կան երկրներ, որտեղ խրախուսվում են ռասիզմի երևույթները

PanARMENIAN.Net - ՀՀ Ազգային ժողովի փոխնախագահ Էդուարդ Շարմազանովը հոկտեմբերի 17-ին Սանկտ Պետերբուրգում մասնակցել է մարդու իրավունքների տեսանկյունից իրավախախտումների կանխարգելմանը և կիբերտարածությունում հանցագործությունների դեմ պայքարին նվիրված ԱՊՀ ՄԽՎ համաժողովին և հանդես եկել ելույթով:

«Այսօրվա համաժողովին քննարկվող հարցը շատ ակտուալ է ԱՊՀ ՄԽՎ անդամ երկրների համար: Չնայած ռասիզմի և քսենոֆոբիայի դեմ ինտենսիվ պայքարին՝ ցավով պետք է նշեմ, որ ԱՊՀ տարածքում կան երկրներ, որտեղ խրախուսվում են ռասիզմի երևույթները», - իր ելույթում ասել է Շարմազանովը՝ նկատի առնելով այն, որ այսօր Ադրբեջանի ռազմական հռետորաբանությունն առավել հաճախակի բնույթ է կրում, մինչդեռ Հայաստանն իր հասարակությանը պատրաստում է խաղաղության:

Այստեղ նա հարկ է համարել մեջբերել Անկախության 21-րդ տարեդարձի կապակցությամբ ՀՀ նախագահ Սերժ Սարգսյանի խոսքերը. «Մենք չպետք է պղտորենք մարդկանց միտքն ու հոգին հակամարդկային գաղափարներով ու այլամերժությամբ և չպետք է զոմբիացնենք երիտասարդներին: Հայաստանում մեծացող երեխաների բարոյական ու հոգևոր պատշաճ նկարագիրն ինձ համար չափազանց թանկ արժե»:

Ի հակադրումն այս տեսակետի՝ այս տարվա գարնանն Ադրբեջանի նախագահը, ելույթ ունենալով կառավարության նիստին, հայտարարեց. «Մեր հիմնական թշնամին աշխարհասփյուռ հայությունն է»:

Շարմազանովի կարծիքով՝ նման ռասիստական և հակամարդկային հայտարարություններն իրենց արտացոլումն են գտնում ԶԼՄ-ներում և համացանցում: «Նաև կցանկանայի նշել, որ հեռուստատեսությունն ու համացանցը հեղեղված են հակահայկական քարոզչությամբ»,-ասել է նա:

2004-ի փետրվարի 19-ին Բուդապեշտում ՆԱՏՕ-ի համատեղ ուսուցման ծրագրի շրջանակում ադրբեջանցի սպա Ռամիլ Սաֆարովը կացնահարեց հայ սպա Գուրգեն Մարգարյանին: Դատարանը մարդասպանին ցմահ ազատազրկման ենթարկեց՝ առաջին 30 տարիներին առանց ներման իրավունքի: ԱԺ փոխնախագահն այս գործում ուշագրավ է համարել այն, որ դեռ դատի ժամանակ ոճրագործի փաստաբանը հայտարարեց, թե «հայի սպանությունն Ադրբեջանում հանցագործություն չի համարվում»:

«Արդյո՞ք կարող է լինել ռասիզմի և քսենոֆոբիայի առավել ցայտուն օրինակ: Իհարկե՝ ոչ: Ինչպես հայտնի է, Ադրբեջանը, գործարքի մեջ մտնելով Հունգարիայի կառավարության հետ, մարդասպանին տուն վերադարձրեց և ներում շնորհեց: Քնած հայ սպային կացնահարածին ներում շնորհելը քսենոֆոբիայի ամենացայտուն օրինակն է:

Պատահական չէ, որ բազմաթիվ երկրներ և միջազգային հեղինակավոր կազմակերպություններ, այդ թվում՝ ՀԱՊԿ գլխավոր քարտուղարն ու ՌԴ ԱԳՆ պաշտոնական ներկայացուցիչը հայտարարել են, որ Սաֆարովին ներում շնորհելը հակասում է միջազգային իրավունքի նորմերին և նպաստում տարածաշրջանում ապակայունության և լարվածության աճին», ասվել է ելույթում:

Ավարտելով ելույթը՝ Էդուարդ Շարմազանովը ևս մեկ անգամ հավաստիացրել է, որ Հայաստանը, ինչպես և ԱՊՀ մի շարք անդամ երկրներ, ընտրել է ժողովրդավարությունն ու հանդուրժողականությունը, այլ ոչ թե քսենոֆոբիայի ճահիճը: