Հայաստանի ԱԳՆ-ն ակտիվ զբաղվում է ՄԱԶԾ Եվրոպական տարածաշրջանային գրասենյակը Բրատիսլավայից Ստամբուլ տեղափոխելու հարցով: Այդ մասին PanARMENIAN.Net-ի թղթակցի հետ զրույցում հաղորդել է ՀՀ ԱԳՆ մամլո քարտուղար Տիգրան Բալայանը: «Մենք տարբեր ուղղություններով աշխատանք ենք տանում այս հարցի շուրջ»,- ասել է նա:
Դրա հետ կապված Բալայանը հավելել է, որ ՄԱԶԾ Եվրոպական տարածաշրջանային գրասենյակի հնարավոր տեղափոխության աննպատակահարմարության մասին Հայաստանի դիրքորոշմանն աջակցում են Կիպրոսը և Սլովենիան:
Հայաստանի քաղաքացիական հասարակությունը նամակով դիմել է ՄԱԿ գլխավոր քարտուղար Պան Գի Մունին՝ իր խորը մտահոգությունը հայտնելով ՄԱԶԾ Եվրոպական տարածաշրջանային գրասենյակը Բրատիսլավայից Ստամբուլ տեղափոխելու մտադրության վերաբերյալ: Այդ մասին հունվարի 19-ին Երևանում հայտնել է «Հանուն մարդու կայուն զարգացման» ՀԿ և ՄԱԿ UNEP ազգային կոմիտեի նախագահ Կարինե Դանիելյանը: Նամակը ստորագրել են Հայաստանի 15 ՀԿ ներկայացուցիչներ:
Նախաձեռնության մասին որոշումը կայացվեց 1,5 ամիս առաջ, երբ նման տեղեկատվություն հայտնվեց: «ՀՀ ԱԳՆ-ն արդեն իսկ պաշտոնական հայտարարությամբ է հանդես եկել, սակայն մենք անհրաժեշտ համարեցինք նույնպես համապատասխան քայլեր ձեռնարկել»,-ասաց նա:
Մասնավորապես, ըստ նրա, նամակում ասվում է. «Մենք գտնում ենք անտրամաբանական այս գրասենյակի տեղափոխումը մի երկիր, որը իրագործել է հայ ժողովրդի Եղեռնը իր իսկ պատմական հայրենիքում, որի սկիզբը դրվեց 1915թ. ապրիլի 24-ին Ստամբուլում: Թուրքիան նաև իրագործել է այլ ազգային փոքրամասնությունների զանգվածային սպանություններ, այդ թվում հույների և ասորիների: Այդ երկիրը 20 տարի շարունակ պահում է շրջափակման մեջ Հայաստանի Հանրապետությունը:
Անտեսելով բոլոր բողոքները՝ Թուրքիան պահպանում է սահմանադրության 301 հոդվածը, որը սահմանափակում է խոսքի ազատությունը և ազգային փոքրամասնությունների ազատ զարգացումը: Ավելին՝ խրախուսում է անհանդուրժողականությունը ազգային փոքրամասնությունների հանդեպ, որի վառ օրինակն է հայտնի հայազգի լրագրող Հրանտ Դինքի սպանութնունը:
Թուրքիան չունի դիվանագիտական հարաբերություններ տարածաշրջանի որոշ պետությունների հետ, ներառյալ այն երկրները, որոնք գտնվում են ՄԱԶԾ Եվրոպական տարածաշրջանային գրասենյակի իրավասության ներքո: Եվ վերջապես, Թուրքիան գտնվում է անկայուն տարածաշրջանում, հաշվի առնելով առկա զինված հակամարտությունները Թուրքիայի հարևան երկրներում, ինչպես նաև հենց Թուրքիայի պարբերական խնդիրները տարածաշրջանի պետությունների հետ:
Մենք վստահ ենք, որ ՄԱԶԳ Եվրոպական տարածաշրջանային գրասենյակի հնարավոր տեղափոխումը Թուրքիա կտրուկ կնվազեցնի նրա գործունեության արդյունավետությունը: Մենք նաև գիտակցում ենք, որ Թուրքիայի ֆինանսական աջակցությունը ՄԱԶԾ-ին ունի կարևոր նշանակություն, բայց ՄԱԿ-ը միշտ գերադասել է արդարադատության, մարդու իրավունքների և արդարության գաղափարները մնացած առաջնայնություններից, ներառյալ ֆինանսականը»:
Ըստ Կարինե Դանիելյանի տվյալների, գրասենյակը Ստամբուլ տեղափոխելու անթույլատրելիության մասին են ահազանգել Կիպրոսն ու Սլովենիան, մտահոգված է նաև Ռուսաստանը:
Հայաստանում հույս ունեն, որ ՄԱԿ-ը հավատարիմ կմնա իր սկզբունքներին և չի նախընտրի ավելի մեծ ֆինանսավորումը` նախատեսված Եվրոպական տարածաշրջանային գրասենյակի համար:
