Դեսպաններ. Ֆրանսիան կողմ է Հայաստանի մերձեցմանը Եվրամիությանը, իսկ ՌԴ-ն՝ հիացած է ՄՄ-ին ընդառաջ նրա տեմպերով

Դեսպաններ. Ֆրանսիան կողմ է Հայաստանի մերձեցմանը Եվրամիությանը, իսկ ՌԴ-ն՝ հիացած է ՄՄ-ին ընդառաջ նրա տեմպերով

PanARMENIAN.Net - Ֆրանսիան լավ գիտի Եվրամիության հետ հնարավորինս սերտ կապեր ունենալու Հայաստանի ցանկության մասին և միշտ սատարել է նրան այդ ճանապարհին: Հայաստանում Ֆրանսիայի դեսպան Անրի Ռենոն «Հայաստանի ճանապարհը դեպի Եվրոպա. խոչընդոտները և հնարավորությունները» թեմայով քննարկմանը նշել է, որ այսուհետ Ֆրանսիան պետք է առավել վճռական աջակցի Հայաստանին այդ հարցում:

Դեսպանը հիշեցրել է, որ վեց տարի առաջ ԵՄ-ն վեց երկրների, այդ թվում Հայաստանի հետ ստորագրեց Արևելյան գործընկերության ծրագիրը: «Դա բավականին ծավալուն աշխատանք էր, որն իր տրամաբանական ավարտին հասավ գարնանը: ՀՀ նախագահ Սերժ Սարգսյանի հայտարարությունը 2013-ի սեպտեմբերի 3-ին Մաքսային միությանն անդամակցելու մտադրության մասին փոխեց իրավիճակը: Սակայն եվրոպական ուղղությունը շարունակում է մնալ Հայաստանի իշխանությունների ուշադրության կենտրոնում: Անցյալ տարվա նոյեմբերին Վիլնյուսի գագաթնաժողովում ընդունվեցին համաձայնագրեր, որոնք գործակցության նոր ոլորտներ ու եզրեր ստեղծեցին, գերակա համարվեցին դատական համակարգը, մարդու իրավունքները, պայքարը կոռուպցիայի դեմ, լավ կառավարումը և այլն: Անելիքները դեռ շատ են»,- նշել է դեսպանը՝ հիշեցնելով, որ Հայաստանն ու Եվրամիությունը որոշել են վերանայել գործակցության հիմքերը, ինչն ավելի խորը գործակցություն կապահովի: «Հայաստանն ու ԵՄ-ն պետք է դա անեն նոր շունչ հաղորդելու համար Հայաստան-ԵՄ հարաբերություններին, որոնք երբեք էլ չեն դադարել»,- նշել է դեսպանը:

Իր հերթին Հայաստանում Ռուսաստանի դեսպան Իվան Վոլինկինը հայտարարել է, որ ՄՄ-ին Հայաստանի անդամակցության գործընթացըշատ արագ է ընթանում: «Հիմա, երբ մշակվում են ՄՄ-ին Հայաստանի անդամակցության բոլոր ասպեկտները, ակնհայտ է, որ գործընթացը շատ արագ է առաջ գնում, արդեն բազմիցս եմ օգտագործել հետևյալ արտահայտությունը՝ 7-մղոնանոց քայլերով»,- ասել է Վոլինկինը Հայաստանի Հանրային հեռուստատեսությանը տված հարցազրույցում, գրում է «Նովոստի Արմենիան»:

Ըստ նրա, Հայաստանը գիտի՝ ինչպես դա անել, այստեղ շատ լավ մասնագետներ կան, որոնց պետք չէ ամեն մի մանրուք բացատրել: «Նրանք գիտեն, թե ինչ է պետք անել, ինչ օրենսդրական, ենթաօրենսդրական ակտեր ու այլ իրավաբանական փաստաթղթեր ընդունել, ինչը մշակման կարիք ունի և ինչ խորությամբ: Հիմա այդ գործընթացը շատ արագ է գնում և միայն ուրախ կլինեմ, եթե այն ավարտին հասցվի որքան հնարավոր է սեղմ ժամկետում»,- ասել է ՌԴ դեսպանը:

Ոմանք սխալմամբ ասում են, որ սեպտեմբերի 3-ին փոխվեց Հայաստանի արտաքին քաղաքականության ուղղվածությունը: «Կարծում եմ, որ դա այնքան էլ ճիշտ չէ: Ուղղվածությունը չի փոխվել: Հայաստանը միշտ կողմնորոշված է եղել դեպի Ռուսաստանի, նրա գլխավորած ինտեգրացիոն կառույցների հետ, գործակցությունը: Կարծում եմ, որ սեպտեմբերի 3-ին ՀՀ նախագահն ուղղակի հաստատեց այդ ուղղվածությունը՝ Ռուսաստանի հետ բարեկամության, բազմակողմ գործակցության ուղղությունը: Նրա հայտարարությունը եվրասիական ինտեգրացիոն գործընթացներին միանալու վերաբերյալ շատ եմ կարևորում: Այն նոր խթան է Հայաստանի զարգացման համար»,- գտնում է Հայաստանում Ռուսաստանի դեսպանը:

Նա հավելել է, որ այդ օրվանից ի վեր զգալիորեն ակտիվացել է երկու երկրների գործակցությունը: «Աճել են ՌԴ պատվիրակությունների քանակն ու ծավալը՝ քաղաքական, տնտեսական պատվիրակությունների, որոնք ժամանում են լուրջ խնդիրներ քննարկելու համար: Կարծում եմ, որ դա լրջորեն կխթանի Հայաստանի տնտեսության զարգացումը»,-ասել է ռուս դիվանագետը:

Վոլինկինը նշել է, որ ցանկացած քաղաքական գործակցություն պետք է ամրապնդվի նաև տնտեսականով: «Այս իրավիճակում, եթե որոշակի գործակցություն ունենք քաղաքական, ռազմաքաղաքական ոլորտներում, ապա այդպիսի զարգացում պետք է լինի նաև տնտեսական ոլորտում»,- ասել է Վոլինկինը:

Սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում Եվրասիական միության ձևավորմանը մասնակցելու Հայաստանի մտադրության մասին: Հայաստանի այս որոշումը քննադատության ենթարկվեց եվրոպական կառույցների ու փորձագիտական շրջանակների կողմից, որոնք հայտարարեցին, որ Հայաստանը գործնականում խզեց բանակցությունները Եվրոպայի հետ, ինչն անհնար է դարձնում ԵՄ հետ Ասոցացման համաձայնագրի նախաստորագրումը:

Հոկտեմբերի 24-ին Մաքսային միությանը և Միասնական տնտեսական գոտուն Հայաստանի միանալու որոշման նախագիծը հաստատվել է Մինսկում Եվրասիական տնտեսական բարձրագույն խորհրդի նիստին, որին մասնակցել է նաև Հայաստանի նախագահ Սերժ Սարգսյանը: Նիստին ներկա են եղել նաև Ղրղզստանի, Տաջիկստանի և Ուկրաինայի նախագահները: Դեկտեմբերի 24-ին Մոսկվայի գագաթաժողովում Բելառուսի, Ղազախստանի, Ռուսաստանի ու Հայաստանի նախագահների հաստատված «ճանապարհային քարտեզով» նախատեսվում է, որ արդեն մայիսին մենք պետք է պայմանագիր ունենանք ՄՄ-ին Հայաստանի անդամակցության վերաբերյալ հավելվածներով: Այս խնդիրը դրված է 22 աշխատանքային խմբերի առջև, որոնք կազմված են երկրի լավագույն մասնագետներից ու փորձագետներից»,-ասել է վարչապետը հունվարի 23-ի կառավարության նիստում: Նա նշել է, որ «ՄՄ գործընկերները բարձր են գնահատել մեր փորձագետների թիմի աշխատանքը»:

Հղումներ թեմայով.
«Արևելյան գործընկերություն»

«Արևելյան գործընկերություն» ծրագիրը ներկայացվել է Լեհաստանի ԱԳՆ-ի կողմից Շվեդիայի մասնակցությամբ 2008 թ-ի մայիսի 26-ին Արտաքին հարաբերությունների խորհրդին: 2009 թ-ի մայիսի 7-ին Պրահայում (այն ժամանակ Պրահան նախագահում էր ԵՄ-ում) «Արևելյան համագործակցություն» ծրագրի շրջանակներում տեղի ունեցավ հիմնադիր հանդիպում: Այդ նախագծի գլխավոր նպատակը ԵՄ-ի մերձեցումն է նախկին ԽՍՀՄ երկրների` Հայաստանի, Մոլդովայի, Բելառուսի, Ուկրաինայի, Ադրբեջանի, Վրաստանի հետ:

Մաքսային միություն

Մաքսային միությունն իր աշխատանքը սկսել է 2010 թվականին: Սկզբում միությանն անդամկցում էին Ռուսաստանը, Բելառուսն ու Ղազախստանը: Հետագայում միությանն անդամակցելու մտադրության մասին հայտարարեցին նաև Ղրղզստանն ու Տաջիկստանը:

2013-ի սեպտեմբերի 3-ին Մոսկվայում Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարել է Մաքսային միությանը միանալու և հետագայում ԵվրաԱզԷՍ-ի ձևավորմանը մասնակցելու ՀՀ ցանկության մասին: Ռուսաստանի նախագահ Վլադիմիր Պուտինը հավանություն է տվել նախաձեռնությանը՝ պատրաստակամություն հայտնելով աջակցել այդ գործընթացին: Պուտինը հավելել է, որ ՌԵՈւ-ն կարող է մոտ 15 մլրդ ռուբլի ներդնել Հայաստանի երկաթուղային ցանցի զարգացման մեջ:

Պաշտոնական ձևակերպման համաձայն, Մաքսային միությունը Բելառուսի, Ղազախստանի ու Ռուսաստանի առևտրատնտեսական ինտեգրման ձև է․ այն միասնական մաքսային տարածք է նախատեսում, որի սահմաններում փոխադարձ առևտրի դեպքում մաքսային տուրքեր ու տնտեսական բնույթի սահմանափակումներ չեն կիրառվում, բացառությամբ միայն հատուկ պաշտպանիչ, հակադեմպինգային ու հատուցման միջոցների: Ընդ որում մասնակից երկրներն օգտվում են միասնական մաքսային սակագնից և առևտրի կանոնակարգման միասնական միջոցներից երրորդ երկրների հետ: Մաքսային միության միասնական մաքսային տարածքը կազմում են Բելառուսի, Ղազախստանի ու Ռուսաստանի տարածքները, ինչպես նաև այդ պետությունների տարածքներից դուրս գտնվող արհեստական կղզիներ, շինություններ, սարքեր ու այլ օբյեկտներ, որոնց հանդեպ ՄՄ անդամ պետությունները բացառիկ իրավատիրություն ունեն:

 Ուշագրավ
Վարչապետը հանդիպել է Պաշտպանության նախարարության և Զինված ուժերի ղեկավար կազմի հետ
Նալբանդյանն ավելի վաղ համաձայնել էր տեսակապով զրուցելուն
Ըստ ԼՀԿ-ի՝ միջադեպը և դրան հաջորդած մեկնաբանությունները վկայում են կառավարող թիմի անհանդուրժողականության մասին
«Իմ քայլը» խմբակցության ղեկավարն իրենց անունից ներողություն է խնդրել միջադեպի համար