Ուկրաինայի Ռադայի մի խումբ պատգամավորներ միացել են Ցեղասպանության ճանաչման որոշման նախագծին

26 ապրիլի 2016 - 13:45 AMT

PanARMENIAN.Net - Ուկրաինայի խորհրդարանի մի խումբ պատգամավորներ միացել են Հայոց ցեղասպանությունը ճանաչող որոշման նախագծին: Հայ ժողովրդի ցեղասպանությունը ճանաչելու օրենսդրական նախաձեռնությունը պատկանում է Ուկրաինայի ժողովրդական պատգամավոր Վիտալի Բարվինենկոյին, հայտնում է genocide.org.ua-ն:

Նախաձեռնությանը միացել են Ուկրաինայի ժողովրդական պատգամավորներ Վադիմ Նովինսկին` «Ընդդիմադիր դաշինք», Ալեքսանդր Պրեսմանը` «Վերածնունդ» կուսակցության պատգամավորական խմբի անդամ, Դավիթ Մարգարյանը` «Պյոտր Պորոշենկոյի դաշինք», ինչպես նաև Նիկոլայ Կնյաժիցկին, Իրինա Եֆրեմովան, Իգոր Բրիչենկոն, Անատոլի Դիրիվը, Գենադի Կրիվոշեյան, Ալեքսանդր Կիրշը, Իգոր Կոտվիցկին, Վադիմ Պիդբերեզնյակը, Վալերի Լունչենկոն «Ժողովրդական ճակատից»:

Ուկրաինայի Հայերի միության ղեկավար Վիլեն Շատվորյանն ասել է. «Մենք շատ երախտապարտ ենք պատգամովրներին արդարությանը հավատարիմ լինելու համար»:

2013թ. հունիսի 6-ին Գերագույն ռադայում գրանցվեց Հայոց ցեղասպանության ճանաչման մասին որոշման նախագիծը, որի նախաձեռնողներն էին պատգամավորներ Վիլեն Շատվորյանն ու Արսեն Ավակովը:

Հղումներ թեմայով.

Genocide.org.ua. В Верховной Раде группа народных депутатов Украины присоединилась к Проекту Постановления о признании Геноцида армян

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: