Պարտադիր կուտակայինին անցումը ևս 1 տարով կհետաձգվի. ԱԺ-ն 1-ին ընթերցմամբ հավանություն է տվել

11 մայիսի 2016 - 12:45 AMT

PanARMENIAN.Net - Հայաստանի Ազգային ժողովն առաջին ընթերցմամբ հավանություն է տվել «Կուտակային կենսաթոշակի մասին» օրենքում փոփոխություններ կատարելուն, որոնք ենթադրում են մեկ տարով երկարաձգել պարտադիր կուտակային կենսաթոշակային համակարգին անցումը, հայտնում է «Sputnik Արմենիան»:

«Կողմ» է քվեարկել 104 պատգամավոր, ևս 4-ը ձեռնպահ է մնացել։

Փոփոխությունների համաձայն` մասնավոր հատվածի աշխատողների համար պարտադիր վճարումներն ուժի մեջ մտնելու ժամկետը 2017-ի հուլիսի 1-ից կտեղափոխվի 2018-ի հուլիսի 1-ը: Պետական հատվածում աշխատող քաղաքացիների համար այդ վճարումները պարտադիր են 2014-ի հուլիսի 1-ից։

Ավելի վաղ աշխատանքի և սոցիալական հարցերի նախարար Արտեմ Ասատրյանը, ներկայացնելով փոփոխությունների նախագիծը, նման հետաձգումն անհրաժեշտ է համարել հարկային էլեկտրոնային-տեղեկատվական համակարգի և Հարկային օրենսգրքի պարտադիր սոցիալական վճարումների ներդաշնակեցման համար։

Պարտադիր կուտակային թոշակային համակարգը պետք է ուժի մեջ մտներ 2014 թվականի հունվարի 1-ից բոլոր քաղաքացիների համար, ովքեր ծնվել է 1974 թվականի հունվարի 1-ից հետո։ Համակարգի մասնակիցները պարտադիր կերպով պետք է հատուկ ստեղծված հիմնադրամ փոխանցեին աշխատավարձի 5 տոկոսը, նույնքան էլ պետք է ավելացներ պետությունը։

Սակայն թոշակային բարեփոխումները դժգոհություն առաջացրին և զանգվածային ցույցերի պատճառ դարձան։ Ի վերջո, Սահմանադրական դատարանը որոշեց անվավեր ճանաչել օրենքի մի շարք դրույթները, իսկ խորհրդարանը փոփոխություններ կատարեց օրինագծում, որոնց համաձայն` 2014 թվականի հուլիսի 1-ից կուտակային կենսաթոշակային համակարգը պարտադիր դարձավ միայն պետական կազմակերպությունների աշխատակիցների համար։ Այն տարածվում է նաև մասնավոր ընկերությունների աշխատակիցների վրա, ովքեր չեն հասցրել պարտադիր կուտակային համակարգից հրաժարվելու դիմում ներկայացնել։

Հղումներ թեմայով.

Sputnik Armenia. Խորհրդարանն առաջին ընթերցմամբ հետաձգեց անցումը պարտադիր կենսաթոշակային համակարգին

Պարտադիր կուտակային կենսաթոշակային համակարգ

Կենսաթոշակային բարեփոխումների մեկնարկի մասին Հայաստանը հայտարարել էր դեռ 2010-ի հուլիսին: Արդեն 2011-ի հունվարի 1-ից կենսաթոշակային ռեֆորմները մեկնարկեցին կամավոր կուտակային համակարգի ներդրմամբ։

2014-ի հունվարի 1-ից Հայաստանն անցավ պարտադիր կուտակային համակարգի, որը վերաբերում է 1973-ի դեկտեմբերի 31-ից հետո ծնվածներին, որոնք աշխատում են և գրանցված են աշխատավայրում: Մինչև 500 հազար դրամ աշխատավարձ ստացողները վճարումներ կկատարեն իրենց աշխատավարձի 5%-ի չափով, ևս 5%-ն այդ աշխատողների անհատական հաշիվներին կփոխանցի պետությունը։ 500 հազար դրամից ավելի աշխատավարձ ստացողի անհատական կուտակային ֆոնդին պետությունը 25 հազար դրամից ավելի չի փոխանցի:

Պարտադիր բաղադրիչի ներդրումը մեծ աղմուկ էր առաջացրել հասարակության շրջանում, ստեղծվել էին մի շարք քաղնախաձեռնություններ, որոնք մինչև օրս էլ այդ համակարգին դեմ են արտահայտվում ու շարունակում են բողոքել: Համակարգին դեմ էին նաև խորհրդարանական ոչ իշխանական 4 ուժերը, որոնք ԱԺ-ին առաջարկել էին մեկ տարով հետաձգել համակարգի ներդրումն ու շարունակել քննարկումները, քանի որ դա շատ լուրջ փոփոխություն է, իսկ«համակարգը թերի է»: 2013-ի դեկտեմբերի 4-ին հարցով հրավիրված արտահերթին խորհրդարանը դեմ էր քվեարկել կուտակային կենսաթոշակային համակարգի պարտադիր բաղադրիչի կիրառումը մեկ տարով հետաձգելու առաջարկությանը:

Հայաստանի սահմանադրական դատարանը հունվարի 24-ի նիստում որոշել էր կասեցնել «Կուտակային կենսաթոշակների մասին» ՀՀ օրենքի 76-րդ հոդվածի (այն է՝ պատասխանատվությունը պարտադիր կուտակային վճարները չկատարելու կամ ուշացմամբ կատարելու համար) և 86-րդ հոդվածի 3-րդ մասի (այն է՝ ֆոնդի և կառավարչի պարտադիր ընտրություն) գործողությունը մինչև օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ գործի դատաքննության ավարտը։

Մարտի 28-ին մեկնարկած դատական նիստի որոշումը ՍԴ-ն կայացրեց ապրիլի 2-ին՝ «Կուտակային կենսաթոշակների մասին» ՀՀ օրենքի մի քանի դրույթ ՀՀ Սահմանադրության պահանջներին հակասող ու անվավեր ճանաչելով։ 64 էջանոց համախատասխան որոշումը հրապարակել էր ՍԴ նախագահ Գագիկ Հարությունյանը։ Ըստ էության, դիմող կողմի հայցը բավարարվեց։

Դատարանը մինչև 2014-ի սեպտեմբերի 30-ն Աժ-ին և Կառավարությանը ժամանակ տվեց՝ օրենքի որոշ դրույթներ փոփոխելու համար: Մինչ այդ կատարված կենսաթոշակային բոլոր վճարումները պետք է վերանայվեն:

Ապրիլի 17-ին վարչապետը հանձնարարեց շահագրգիռ պետական մարմիններին սեղմ ժամկետում օրենքի նախագիծ պատրաստել, որով մինչև Սահմանադրական դատարանի՝ ապրիլի 2-ի որոշմամբ նախատեսված օրենսդրական փաթեթի ընդունումն Ազգային ժողովը կկասեցնի տույժերի հաշվարկը: Կառավարության առաջարկող օրենքի նախագիծն Ազգային ժողովում սկսեցին քննարկել ապրիլի 28-ին:

Արդեն մայիսի 15-ին խորհրդարանն ամբողջովին ընդունեց «Կուտակային կենսաթոշակի մասին» օրենքում փոփոխություն կատարելու մասին Կառավարության օրինագիծը: Դրանով պարտադիր կուտակային վճարը հաշվարկելու և փոխանցելու պարտավորությունը կրող անձն ազատվում է մինչև օրենքն ուժի մեջ մտնելն ընկած ժամանակահատվածի համար պարտադիր կուտակային վճարը չկատարելու կամ ուշացումով կատարելու համար օրենքով նախատեսված պատասխանատվությունից: Նախագահ Սերժ Սարգսյանն օրենքը վավերացրեց մայիսի 26-ին:

Հունիսի 17-ի արտահերթում Կառավարությունը հավանություն տվեց «Կուտակային կենսաթոշակների մասին» օրենքում փոփոխություններ և լրացումներ կատարելու օրինագծերի փաթեթին: Դրանով նախատեսվում է 2014-ի հուլիսի 1-ից պետական հատվածի աշխատողների համար գործարկել նպատակային սոցիալական վճարի համակարգը, որը մինչև 2017-ի հուլիսի 1-ը մասնավոր հատվածի համար կլինի կամավոր։ Դրա դրույքաչափը նույնպես 5 տոկոս է: Առաջարկվում է սահմանել 500․000 դրամ աշխատավարձի շեմ, որից ավելիի դեպքում սոցվճար չի կատարվելու, այսինքն՝ առավելագույն սոցվճարը բոլորի համար լինելու է 25․000 դրամ՝ կախված աշխատավարձի չափից: Նախագիծը քննարկելու համար գործադիրը ԱԺ արտահերթ նիստ հրավիրեց։

Հունիսի 21-ին խորհրդարանն արտահերթում երեք ընթերցմամբ ընդունեց «Կուտակային կենսաթոշակային համակարգում փոփոխություններ և լրացումներ կատարելու մասին» օրենքի նախագիծը, որով պարտադիր կուտակայինը դարձավ նպատակային սոցվճար։ Քվեարկությանը մասնակցեց միայն ՀՀԿ-ն։ Քվեարկությունը բոյկոտած ԱԺ ոչ իշխանական ուժերը տեղեկացրին, որ դիմելու են Սահմանադրական դատարան` վիճարկելու ստեղծված իրավիճակն ու օրենքի խախտումով տեղի ունեցած քվեարկությունը։