«Յուվենտուսը» կրկին հետաքրքրվում է Մխիթարյանով

PanARMENIAN.Net - Թուրինի «Յուվենտուսը» հետևում է անգլիական «Մանչեսթեր Յունայթեդում» Հայաստանի հավաքականի կիսապաշտպան Հենրիխ Մխիթարյանի շուրջ ստեղծված իրավիճակին, գրում է 360nobs.com-ը Tuttomercatoweb.com-ի վրա հղումով:

«Յուվենտուսը» փորձել է ձեռք բերել ֆուտբոլիստին դեռ այն ժամանակ, երբ նա խաղում էր Դորտմունդի «Բորուսիայի» կազմում: Հիմա իտալական ակումբը կրկին մտադիր է տրանսֆերային հարցում ուղարկել «կարմիր սատանաներին» 27-ամյա կիսապաշտպանի արժեքի մասին, որին չհաջովեց ամրագրվել նոր թիմում:

«Յուվենտուսը» կարող է փորձել վարձակալել Մխիթարյանին:

«Յունայթեդի» կազմում Մխիթարյանը մասնակցել է ընդամենը 5 խաղի` ընդհանուր առմամբ խաղալով միայն 104 րոպե: Վերջին անգամ նա դաշտ է դուրս եկել սեպտեմբերի 10-ին «Մանչեսթեր Սիթիի» դեմ պրեմիեր լիգայի խաղում:

Ավելի վաղ հայտնի դարձավ, որ Հայաստանի հավաքականի ու «Մանչեսթեր Յունայթեդի» կիսապաշտպան Հենրիխ Մխիթարյանը կարող է լքել ակումբը 2017-ի հունվարին՝ ձմեռային տրանսֆերային պատուհանի ընթացքում:

«Յուվենտուսը» վաղուց է ցանկանում իր շարքերում տեսնել Մխիթարյանին, որոշ տվյալների համաձայն, նա մոտ էր դրան 2015-ին: 2016-ի ամռանը «Յուվեն», ըստ ԶԼՄ-ների, առաջարկել է ֆուտբոլիստի համար £24 մլն (մոտ $35 մլն), սակայն Մխիթարյանը տեղափոխվեց «Մանչեսթեր Յունայթեդ» €42 միլիոնով: