Էրդողանը «գերմանացի գործակալ է» անվանել Թուրքիայում ձերբակալված Die Welt-ի թղթակցին

4 մարտի 2017 - 10:43 AMT

PanARMENIAN.Net - Թուրքիայի նախագահ Ռեջեփ Թայիփ Էրդողանը գերմանացի գործակալ է անվանել Թուրքիայում ձերբակալված թուրքական ծագումով գերմանաբնակ Die Welt թերթի թղթակից Դենիզ Յուջելին՝ հավելելով, որ նա մեկ ամիս թաքնվել է ԳԴՀ հյուպատոսությունում:

Դենիզ Յուջելն ունի Թուրքիայի և Գերմանիայի քաղաքացիություն: Նրան ձերբակալել են Ստամբուլում փետրվարի 14-ին: Թուրքիայի իշխանությունները կասկածում են նրան ահաբեկչական կազմակերպությանն անդամակցելու մեջ:

«Նա որպես ՔԱԿ (Քրդստանի աշխատավորական կուսակցության) ներկայացուցիչ և գերմանացի գործակալ մեկ ամիս թաքնվել է Գերմանիայի հյուպատոսությունում: Մեկ ամիս շարունակ մենք պահանջել ենք հանձնել նրան մեզ, որպեսզի նա դատարանի առջև կանգնի, բայց դա չարվեց: Ես ասել եմ Անգելա Մերկելին՝ երբ մենք պահանջում ենք արտահանձնել ահաբեկիչներին, դուք հղում եք անում անկախ ու անաչառ դատարանին, իսմ մենք վստահում ենք մեր դատարանին: Հետո Յուջելին մեզ հանձնեցին և դատարանը կալանավորեց նրան»,- ասել է Էրդողանը՝ ելույթ ունենալով Ստամբուլում: Նրա ելույթը հեռարձակվել է NTV հեռուստաալիքով, հայտնում է ՌԻԱ Նովոստին:

Գերմանիայի «Կանաչների կուսակցության» ղեկավար Ջեմ Օզդեմիրը հանդիմանել է ԳԴՀ կառավարությանը՝ Թուրքիայի հետ հարաբերություններում անվճռականության և ավելորդ զիջողականության համար: Ըստ Օզդեմիրի, ԱԳՆ ղեկավարը չափից շատ է լռել, նա պետք է օգտագործի բոլոր հնարավորությունները, որպեսզի Յուջելին ազատ արձակեն:

Ընթերցեք նաև. Գերմանիայում 2 քաղաք արգելել է թուրք նախարարներին քարոզել հօգուտ Էրդողանի

Հղումներ թեմայով.

Ria.ru. Эрдоган назвал арестованного журналиста Юджеля немецким агентом

AFP. Turkey's Erdogan says Germany 'aiding' terror'