Կոտրված ափսեներ ու պայթող փուչիկներ. «Երկիր ծիրանին» ավագանու առաջին նիստին չի մասնակցել

PanARMENIAN.Net - «Երկիր Ծիրանի» խմբակցության անդամները չեն մասնակցել Երևանի ավագանու առաջին նիստին:Քաղաքապետարանի շենքի դիմաց հրավիրած ասուլիսում խմբակցության ղեկավար Զարուհի Փոստանջյանը հայտարարել է, որ օրակարգում հետաքրքիր հարց չկա:

«Հարցերը, որ ներկայացված են, հետաքրքրում են միայն հանցագործ խմբին: Երդման արարողության հետ կապված կազմակերպչական հարցեր են: Հավանաբար, հանրային գումարների մասին է խոսքը: Երբ որոշում կլինի, մենք դրա վերաբերյալ մեր անելիքների մասին կտեղեկացնենք»,- հայտարարել է Փոստանջյանն ու հավելել, որ կազմակերպչական ծախսերի համար քաղաքի բյուջեից մեկ դրամ ծախսելու իրավունք չունեն քաղաքային իշխանությունները, մեջբերում է Panorama.am-ը:

Մինչ քաղաքապետարան մուտք գործելը նրանք կարմիր փուչիկներ են պայթեցրել, որոնց վրա գրված էր ՀՀԿ, ափսեներ կոտրել, որոնց վրա պատկերված էին ՀՀ նախագահի ու քաղաքապետի լուսանկարները:

Փոստանջյանը նշել է, որ Երևանի քաղաքային բյուջեն իրենց մշտադիտարկման ներքո է լինելու. «Մենք ամեն րոպե հետևելու ենք՝ ճիշտ են օգտագործվում միջոցները, թե՝ ոչ»:

Ավագանու «Երկիր Ծիրանի» խմբակցության ղեկավարը կլինի Փոստանջյանը, իսկ քարտուղարը՝ Մնացական Պարակշիևը:

Փոստանջյանի խոսքով, իրենք քաղաքային իշխանությունների հետ շփվելու են միայն դատարանների ու պաշտոնական գրագրությունների միջոցով:

Մայիսի 14-ին կայացած Երևանի ավագանու ընտրությունների արդյունքներով, «Երկիր Ծիրանի» կուսակցությունը ստացել էր քվեների մոտ 7.5, իշխող Հանրապետականը՝ 69.5, ԵԼՔ դաշինքը՝ 20.4 տոկոսը:

Ավագանու մանդատները բաշխվել էին հետևյալ համամասնությամբ` Հայաստանի Հանրապետական կուսակցություն` 46 մանդատ, «Ելք» կուսակցությունների դաշինք` 14 մանդատ, «Երկիր Ծիրանի» կուսակցություն` 5 մանդատ: