Սամվել Բաբայանը դատապարտվել է 6 տարվա ազատազրկման

28 նոյեմբերի 2017 - 11:34 AMT

PanARMENIAN.Net - Դատարանը 6 տարվա ազատազրկման է դատապարտել «Իգլայի» գործով անցնող Լեռնային Ղարաբաղի պաշտպանության նախկին նախարար Սամվել Բաբայանին։

Մեղադրող դատախազը պահանջել էր 7 տարվա ազատազրկում։

Բաբայանը մեղադրվում է «Իգլա» տեսակի զենիթահրթիռային համալիր ձեռք բերելու, ինչպես նաև փողերի լվացման մեջ: Մասնավորապես, ըստ մեղադրանքի, նա փորձել է հանցավոր ճանապարհով Ռուսաստանից ստացված՝ օրինական շրջնառությունից դուրս եկած և հատուկ ներկանյութով ներկված եվրո թղթադրամները քիմիական մաքրման ենթարկել՝ հետագայում դրանք Հայաստանում շրջանառության մեջ դնելու նպատակով, հայտնում է «Ազատություն» ռադիոկայանը:

Այս գործով առանցքային մեղադրյալներից համարվող Բաբայանի մարտական ընկերը Սանասար Գաբրիելյան դատապարտվել է 3 տարվա ազատազրկման, Արմեն Պողոսյանը՝ (Ժորիկ մականունով) 2 տարվա, Կարեն Քոչարյանը՝ 2 տարի 6 ամիս պայմանական ազատազրկման, Անդրանիկ Քոչարյանը՝ 2 տարի պայմանական, Ժորա Զաքարյանը՝ 2 տարի պայմանական, Դավիթ Հարությունյանը՝ 2 տարի պայմանական ազատազրկման։

Սամվել Բաբայանը ձերբակալվել է մարտի 22-ին: ՀՀ Ազգային անվտանգության ծառայության հաղորդմամբ, մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում այս պահին ձերբակալված են 3 անձ, այդ թվում՝ ՀՀ քաղաքացի Սամվել Բաբայանը. «Կատարված քննչական գործողությունների և օպերատիվ-հետախուզական միջոցառումների արդյունքում ստացվել են նաև արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը և փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ և նրա պատվերով»։

Դատարանի որոշմամբ կալանավորվել է մարտի 24-ին, մեղադրանք է առաջադրվել ՀՀ Քրեական օրենսգրքի 235 հոդվածի 2-րդ մասի և 235.1. հոդվածի 2-րդ մասի հատկանիշներով:

Հղումներ թեմայով.

Azatutyun.am. Սամվել Բաբայանը դատապարտվեց 6 տարվա ազատազրկման