Ազնավուրի հիշատակի արարողությունն Օպերայից տեղափոխվում է Ազնավուրի հրապարակ

PanARMENIAN.Net - Հոկտեմբերի 5-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնում նախատեսված Շառլ Ազնավուրի հիշատակի արարողությունը տեղափոխվում է Շառլ Ազնավուրի հրապարակ:

12:00-ին ուղիղ հեռարձակում կլինի ֆրանսիայից, 19:00 ին -Շառլ Ազնավուրին նվիրված ֆիլմ-համերգաշար կցուցադրվի, հայտնում է մշակույթի ն ախարարության մամուլի ծառայությունը:

Լեգենդար շանսոնյեի հիշատակի արարողությանը Ֆրանսիայում կմասնակցեն ՀՀ վարչապետ Նկոլ Փաշինյանն ու ՀՀ նախագահ Արմեն Սարգսյանը:

Հայաստանի ազգային հերոս Շառլ Ազնավուրի հուղարկավորության օրը, հոկտեմբերի 6-ըՀայաստանում սգո օր է հայտարարված: Հոկտեմբերի 6-ը սգո օր կլինի նաև Արցախում:

Լեգենդար շանսոնյեն մահացել է հոկտեմբերի 1-ին 94 տարեկանում: Ազնավուրը, որը վերջերս էր վերադարձել Ճապոնիայում համերգային շրջագայությունից, մահացել է իր տանը՝ Ֆրանսիայի հարավ-արևելքում:

Շառլ Ազնավուրը (իսկական անունը՝ Շահնուր Վաղինակ Ազնավուրեան) ծնվել է 1924 մայիսի 22-ին Փարիզում` հայ գաղթականներ Միշա և Քնար Ազնավուրյանների ընտանիքում: Նա ֆրանսահայ նշանավոր երգիչ, երգահան, գրող, կինոդերասան և հասարակական գործիչ է։ 1988-ի սպիտակյան ավերիչ երկրաշարժից անմիջապես հետո հիմնադրել է «Ազնավուրը՝ Հայաստանին» բարեգործական հիմնադրամը։ 2009 թվականի մայիսից Շվեյցարիայում Հայաստանի դեսպանն է, Հայաստանի մշտական դեսպանն է ՅՈւՆԵՍԿՕ-ում:

Ազնավուրը մոտ 1000 երգի հեղինակ է (մի մասը՝ երգահան Ժորժ Կառվարենցի հեղինակցությամբ), այդ թվում՝ բազմաթիվ միջազգային հիթերի՝ «Մաման», «Բոհեմը», «Դեռ երեկ», «Երիտասարդություն», «Պետք է գիտնալ», «Նա», «Երկու կիթառ», «Ինչպես ասում են», «Հավերժական սեր», «Ավե Մարիա» և այլն։ Ցայսօր վաճառվել է Ազնավուրի մոտ 100 միլիոն ձայնապնակ։ Ամերիկյան «Թայմ» հանդեսի հարցման համաձայն Ազնավուրը ճանաչվել է «Դարի արվեստագետ»։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։