Բաղրամյան 26-ից հուշադրամներ են գողացել

1 փետրվարի 2019 - 10:25 AMT

PanARMENIAN.Net - Արտակարգ դեպք է տեղի ունեցել Երևանի Բաղրամյան 26 հասցեում՝ 4 հատ հուշադրամ են գողացել, հայտնում է Shamshyan.com-ը

ՀՀ վարչապետի աշխատակազմի գործերի կառավարման շահագործման բաժնի պետը ահազանգել է ոստիկանության Երևան քաղաքի վարչության օպերատիվ կառավարման կենտրոն և հայտնել, որ հունվարի 25-ից մինչև հունվարի 30-ն ընկած ժամանակահատվածում Բաղրամյան 26 հասցեում գտնվող ՀՀ կառավարության աշխատակազմի առաջին մասնաշենքի 3-րդ հարկի միջանցքում տեղադրված ցուցափեղկից գողացել են 4 հատ հուշադրամ:

Դեպքի վայր են մեկնել ոստիկանության Արաբկիրի բաժնի օպերատիվ խումբը, ինչպես նաև Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժնի քննիչը:

Փաստի առթիվ քննչական բաժնում նյութեր են նախապատրաստվում: Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ բացահայտելու տեղի ունեցածը:

Հղումներ թեմայով.

shamshyan.com. Արտակարգ դեպք Երևանում. Բաղրամյան 26-ից գողացել են հուշադրամներ. ժամանել են տարածքի ոստիկանապետն ու քննչականի պետը