Գյումրու նախկին քաղաքապետ Ղուկասյանին հարցաքննության կկանչեն

Գյումրու նախկին քաղաքապետ  Ղուկասյանին հարցաքննության կկանչեն

PanARMENIAN.Net - Գյումրու նախկին քաղաքապետ Վարդան Ղուկասյանը կհրավիրվի հարցաքննության, ասել է Շիրակի մարզի դատախազ Կարեն Գաբրիելյանը:

Ղուկասյանը հարցաքննվելու է «Թումո» կենտրոնի ներկայացրած հաղորդման հիման վրա հարուցված քրգործի շրջանակում: Հաղորդումը «Թումո»-ին տրված Գյումրու քաղաքային զբոսայգում առկա շինությունների մասին է, գրում է «Հայկական ժամանակը»:

Դատախազն ասել է, որ վիճարկվում է Ղուկասյանի կողմից այգում որոշ տարածքների և շինությունների ապօրինի օտարման հարցը: Հարուցվել է քրեական գործ ՔՕ 308 հոդվածի (Պաշտոնեական լիազորությունները չարաշահելը) և 314 հոդված հատկանիշներով (Պաշտոնեական կեղծիքը): Քրեական գործի շրջանակում, ըստ դատախազի, պարզել են նաև, որ Ղուկասյանը տարբեր անձանց շինություններ է օտարել, որոնք գտնվում են Կումայրի արգելոց-թանգարանի կազմում:

Հատկացման իրավաչափությունն ու հիմնավորվածությունը պարզելու համար նշանակվել են դատաշինարարատեխնիկական, դատաապրանքագիտական փորձաքննություններ:

Դիտարկվելու է նաև մի քանի կաթսայատան օտարման օրինականությունը: Ուսումնասիրվում է նաև այն հանգամանքը, որ Մայիսյանի կաթսայատունը բավական ցածր գնով օտարվել է նախկին պատգամավոր Սամվել Ալեքսանյանին, և սարքավորումները տեղափոխվել են վերջինիս պատկանող շաքարի գործարան:

«Տրվելու է իրավական գնահատական, պարզելու ենք՝ իրականում՝ գումարի չափն ինչքան է եղել: Մենք բոլորի անվանումներն ու հասցեներն ունենք, բայց այս պահին օտարման հիմքերը չունենք: Երբ կստանանք, կուսումնասիրենք: Եթե չստանանք, հարցը կդիտարկենք այլ տիրույթում, և կհարուցվի քրգործ»,- ասել է դատախազը:

Վարդան Ղուկասյանի՝ քաղաքապետ եղած տարիներին այլ գործողություններ էլ կան, որոնք ևս դատախազության ուշադրության կենտրոնում են: Մասնավորապես, «Հոկտեմբեր» կինոթատրոնի օտարումը, «Մոսկվա», Գյումրու նախկին «Տրոլեյբուսային պարկ»-ի, «Մայիսյանի» և այլ կաթսայատների օտարումները:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---