Փաշինյան․ Լաչինի միջանցքի փակման վերաբերյալ Մոսկվայում քննարկման արդյունքը գոհացուցիչ չէ

PanARMENIAN.Net - Վարչապետ Նիկոլ Փաշինյանը Ազգային ժողովում, անդրադառնալով Մոսկվայում կայացած եռակողմ հանդիպմանը, ասել է, որ քննարկման թեմաներից մեկը վերաբերվել ԼՂ-ում հաստատված հումանիտար իրավիաճակին ու Լաչինի միջանցքի ապօրինի փակմանը։

Վարչապետը մասնակցում է Ազգային ժողովի մշտական հանձաժողովների համատեղ նիստում «Հայաստանի Հանրապետության 2022 թվականի պետական բյուջեի կատարման մասին» տարեկան հաշվետվության նախնական քննարկումներին:

Նա նշել է, թե այդ քննարկման արդյունքները գոհացնող չեն, հայտնում է Aysor.am-ը։

«Պիտի արձանագրենք, որ շատ ցավալի իրավիճակ է, Լաչինի միջանցքի փակումը տեղի է ունեցել ռուս խաղաղապահների աչքի առաջ ու ներկայությամբ, ինչը բավականին մտահոգիչ է», - ընդգծել է վարչապետը:

Նա ասել է, թե շարունակելու են քննարկումները ռուս գործընկերների հետ իրադրության կարգավորման ուղղությամբ:

Մոսկովյան քննարկումների թեմաներից մեկն էլ եղել է տարածաշրջանային կոմունիկացիների բացումը։ Վարչապետը նշել է, որ Հայաստանը պատրաստ է դրանց բացմանը, որը պետք է տեղի ունենա նոյեմբերի 9-ի եռակողմ հայտարարության 9-րդ կետով:

Վարչապետն ասել է, որ այս հարցի լուծումը միայն հայկական կողմից կախված չէ, եթե այդպես լիներ՝ հարցը վաղուց լուծված կլիներ:

Մայիսի 25-ին Մոսկվայում տեղի է ունեցել Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի հանդիպումը: Քննարկվել են տարածաշրջանային տրանսպորտային և տնտեսական ենթակառուցվածքների ապաշրջափակմանը վերաբերող հարցեր։ Պայմանավորվածություն է ձեռք բերվել աշխատանքները շարունակել մեկ շաբաթից՝ երեք երկրի փոխվարչապետերի հանդիպման շրջանակում: