Միրզոյանը՝ Հնդկաստան–Պակիստան սրացման մասին․ Պետք է ընդունել ահաբեկչությունից պաշտպանվելու երկրի իրավունքը

PanARMENIAN.Net - Արտաքին գործերի նախարար Արարատ Միրզոյանն ԱԺ-ում կառավարության հարցուպատասխանի ժամանակ անդրադարձել է Հնդկաստանի և Պակիստանի միջև վերջին ռազմական լարվածությանը՝ ներկայացնելով Հայաստանի դիրքորոշումը ահաբեկչության դեմ պայքարի համատեքստում։ Նա հիշեցրել է, որ լարվածությունը սկիզբ է առել ահաբեկչական գործողությունից։

Նա հավելել է, որ պետք է ճանաչենք ահաբեկչությունից պաշտպանվելու երկրի իրավունքը, հայտնում է Արմենպրեսը։

«Տեղի էր ունեցել ահաբեկչություն։ Հայաստանի Հանրապետությունը շատ արագ արձագանքել է, դատապարտել է ահաբեկչությունը, ցավակցել է զոհերի ընտանիքների անդամներին ու հարազատներին և զորակցություն է հայտնել։ Մենք, և, կարծում եմ, իրեն որևէ քաղաքակիրթ համարող պետություն չի կարող ողջունել ահաբեկչությունը, կարող է միայն դատապարտել ահաբեկչությունը։ Եվ մենք, կարծում եմ, որ պետք է ճանաչենք նաև ահաբեկչությունից պաշտպանվելու երկրի իրավունքը։ Մենք այս հարցին այդ պրիզմայով ենք նայում և այդպես ենք ընկալում, այդպիսին է մեր դիրքորոշումը»,–նշել է Միրզոյանը:

Սրացման պատճառ է դարձել ապրիլի 22-ին Հնդկաստանի Ջամմու և Քաշմիր նահանգի Փահալգամ քաղաքի մերձակայքում տեղի ունեցած ահաբեկչական հարձակումը, որի հետևանքով զոհվել է 26 մարդ, այդ թվում՝ Նեպալի մեկ քաղաքացի։ Հնդկաստանի իշխանությունները հայտարարել են, որ ունեն ապացույցներ՝ հարձակման մեջ Պակիստանի միջգերատեսչական հետախուզության ներգրավվածության վերաբերյալ։

Ադրբեջանը դատապարտել է Հնդկաստանին «Պակիստանի դեմ ագրեսիայի համար»։