ՇՄՆ–ն հերքել է միջուկային վառելիքի թափոններ ՀՀ տեղափոխելու մասին ապատեղեկատվությունը

PanARMENIAN.Net - Հայաստանի շրջակա միջավայրի նախարարությունը հերքել է միջուկային վառելիքի թափոններ ՀՀ տեղափոխելու մասին ապատեղեկատվությունը:

«Մամուլում տարածված «Ֆրանսիական Orano ընկերությունը գաղտնի կերպով Հայաստան է տեղափոխում միջուկային վառելիքի թափոններ, որոնք պահվելու են ազգային պարկերից մեկում» վերնագրով հոդվածում ներկայացված տեղեկատվությունն ամբողջությամբ ապատեղեկատվություն է և չի համապատասխանում իրականությանը»,-ասվում է նախարարության հայտարարության մեջ։

Նախարարությունը կոչ է արել բոլորին՝ զերծ մնալ չստուգված ու անհայտ աղբյուրներից տարածվող տեղեկատվության հանրայնացումից և պատասխանատվությամբ մոտենալ հրապարակվող նյութերի հավաստիությանը։

ՀՀ վարչապետ Նիկոլ Փաշինյանը ֆեյսբուքյան իր էջում ևս անդրադարձել է թեմային։

«Հիբրիդային պատերազմ, բան՝ ամեն ինչ հասկացանք։ Բայց եթե որևէ մեկը լրջորեն պետք է հարցնի, թե ճի՞շտ է, որ «Դիլիջան» ազգային պարկում ուրանի թափոններ ենք պահում, այդ հարցնողը կամ ավանակ է, կամ գործակալ, կամ էլ այդ ֆեյք լրատվամիջոցը ստեղծած ռոբասերժիկի ընտանիքի անդամ»,- գրել է նա։

Ավելի վաղ որոշ հայկական լրատվամիջոցներ տեղեկատվություն էին տարածել, թե իբր ֆրանսիական Courrier France 24 պարբերականի հոդվածի համաձայն՝ «ֆրանսիական պետական միջուկային Orano ընկերությունը գաղտնի կերպով սկսել է օգտագործված միջուկային վառելիք տեղափոխել Հայաստան»:

Նման հոդված է հրապարակել ադրբեջանական APA-ն ֆրանսիական Courrier France 24 պարբերականին վկայակոչելով, որի հղումը, սակայն, չկա։ Ռուսալեզու հոդվածը կոչվում է «Ֆրանսիական ընկերությունը ռադիոակտիվ թափոններ է ուղարկում Հայաստան․ Հետազոտություն»։