Դեսպան Բալայանը ներկայացրել է ՀՀ-ԵՄ գործակցության խորացման ուղղությամբ արված քայլերը

PanARMENIAN.Net - Հուլիսի 10-ին ԵՄ-ում Հայաստանի մշտական ներկայացուցչությունը՝ Diplomatic World միջազգային ամսագրի հետ համատեղ կազմակերպվել է քննարկում, որի ընթացքում ուշադրության կենտրոնում են եղել ՀՀ և ԵՄ գործընկերության զարգացումը, ինչպես նաև տարածաշրջանային ընթացիկ գործընթացները։

ԵՄ-ում Հայաստանի ներկայացուցչության հաղորդագրության համաձայն՝ հանդիպման գլխավոր բանախոս՝ դեսպան Տիգրան Բալայանը լայնածավալ անդրադարձ է կատարել Հայաստանի կառավարության՝ Եվրոպական միության հետ մերձեցման ուղղությամբ ձեռնարկած գործողություններին։ Նա ներկայացրել է այն հնարավորությունները, որոնք գոյություն ունեն այս համագործակցությունը խորացնելու համար, և մատնանշել է այն խոչընդոտները, որոնց բախվում են կողմերը այդ գործընթացում։

Տարածաշրջանային գործընթացներին անդրադառնալով՝ Բալայանը հատկապես կարևորել է տարածաշրջանային հաղորդակցությունների ապաշրջափակման նշանակությունը՝ այդ համատեքստում ներկայացնելով կառավարության նախաձեռնած «Խաղաղության խաչմերուկ» նախագիծը։

Միջոցառմանը մասնակցել են Եվրոպական միության տարբեր ինստիտուտների ներկայացուցիչներ, վերլուծական կենտրոնների, հասարակական կազմակերպությունների, ակադեմիական ոլորտի և ԶԼՄ-ների ներկայացուցիչներ, որոնք հանդես են եկել կարծիքներով ու հղել հարցեր դեսպան Բալայանին։