ԲՏԱ նախարարն ու Meta-ի պատվիրակները քննարկել են գործակցության խորացումը

3 հոկտեմբերի 2025 - 11:01 AMT

PanARMENIAN.Net - Հոկտեմբերի 2-ին նախարար Մխիթար Հայրապետյանը հյուրընկալել է Meta ընկերության պատվիրակությանը՝ քննարկելու փոխգործակցության խորացման ուղիները՝ թվային քաղաքականության բնագավառում։

Հանդիպման առանցքում հայտնվել են արհեստական բանականության (ԱԲ) տեխնոլոգիաների ներուժն՝ ուղղված հասարակության և տնտեսության առաջխաղացմանը, ինչպես նաև երեխաների առցանց պաշտպանությանն ուղղված իրազեկման ծրագրերի կարևորությունը։

Քննարկման ընթացքում հատուկ շեշտադրվել է Հայաստանի և Meta-ի միջև կառուցողական երկխոսության շարունակականության և զարգացման կարիքը։

Կողմերը կարևորել են պարբերաբար հանդիպելու անհրաժեշտությունը՝ նպատակ ունենալով համատեղ արձագանքել թվային էկոհամակարգում ի հայտ եկող նոր մարտահրավերներին և մշակել գործնական քայլեր, որոնք կզորացնեն դիմադրողականությունն ու կխթանեն վստահությունը առցանց հարթակներում։

Հայրապետյանը վերահաստատել է Հայաստանի հանձնառությունը՝ խորացնելու համատեղ աշխատանքը համաշխարհային տեխնոհսկաների հետ՝ ընդգծելով, որ նման գործընկերությունը առանցքային է երկրի համապարփակ թվային վերափոխման ռազմավարության իրականացման մեջ։

«Meta»-ի ներկայացուցիչները, իրենց հերթին, հաստատել են իրենց պատրաստակամությունը շարունակելու երկխոսությունը և կիսվելու փորձով՝ նպաստելով Հայաստանի թվային առաջընթացին և ԱԲ էկոհամակարգի ձևավորմանը։

Հանդիպման ավարտին կողմերը համաձայնության են եկել համատեղ մշակել հետագա գործողություններ՝ ուղղված Հայաստանի թվային միջավայրի կայունության և առավել անվտանգ ու նորարարական առցանց միջավայրի ստեղծմանն ուղղված աշխատանքների իրականացմանը։