Սիմոնյանը՝ գերիների մասին․ Հրապարակային այդ մասին չենք խոսում

PanARMENIAN.Net - Ազգային ժողովի նախագահ Ալեն Սիմոնյանը, անդրադառնալով ԱՄՆ փոխնախագահ Ջեյ Դի Վենսի այցին և պատասխանելով լրագրողի այն հարցին, թե արդյոք շոշափելի արդյունքներ կան գերիների հարցի հետ կապված, ասել է, որ հրապարակային այդ մասին չեն խոսում:

«Հաճախ այդ հարցը տալիս եք, մենք ասում ենք՝ հրապարակային այդ մասին չենք խոսում, գործն արվում է, այդ ասածից հետո ինչ-որ քանակությամբ մարդիկ վերադառնում են ՀՀ: Որևիցե բան մարտավարության մեջ չի փոխվել»,– նշել է նա, հայտնում է Auroranews.am-ը:

Նա նաև դրական է գնահատել Ադրբեջանի հետ որդեգրված աշխատելաոճը՝ անդրադառնալով գերիների հարցին։

«Շատ դրական եմ գնահատում այն աշխատելաոճը, որը մենք որդեգրել ենք Ադրբեջանի հետ: Կարծում եմ, եթե այս ճանապարհով շարունակենք առաջ ընթանալ, մեր երկու երկրները մոտ ապագայում այլևս խնդիր չեն ունենա»,– ասել է Սիմոնյանը։

ԼՂՀ նախկին նախագահ Արայիկ Հարությունյանը դատապարտվել է ցմահ ազատազրկման: Ցմահ ազատազրկման են դատապարտվել նաև ՊԲ նախկին հրամանատար Լևոն Մնացականյանը և նախկին հրամանատարի առաջին տեղակալ Դավիթ Մանուկյանը, ինչպես նաև Արցախի Հանրապետության ԱԳ նախկին նախարար Դավիթ Բաբայանն ու ԱԺ նախագահ Դավիթ Իշխանյանը: Արցախի Հանրապետության նախկին նախագահներ Արկադի Ղուկասյանն ու Բակո Սահակյանը դատապարտվել են 20 տարվա ազատազրկման:

Մադաթ Բաբայանը և Մելիքսեթ Փաշայանը դատապարտվել են 19 տարվա ազատազրկման, Գարիկ Մարտիրոսյանը՝ 18, Դավիթ Ալահվերդյանը և Լևոն Բալայանը՝ 16, Էրիկ Ղազարյանը, Գուրգեն Ստեփանյանը, Վասիլ Բեգլարյանը՝ 15 տարվա ազատազրկման։