Զոհրաբյան․ Վեհափառն օգտվել է ցուցմունք չտալու իր իրավունքից

PanARMENIAN.Net - Ամենայն Հայոց կաթողիկոս Գարեգին Երկրորդը հարուցված քրգործի շրջանակում հրաժարվել է ցուցմունք տալուց՝ օգտվելով օրենքով իրեն վերապահված իրավունքից։ Այդ մասին Մայր տաճարի մոտ ասել է փաստաբան Արա Զոհրաբյանը:

«Վեհափառ Հայրապետը հենց այդ օրը հրաժարվել էր ցուցմունք տալուց, քանի որ ուներ այդ իրավունը, ինչից էլ օգտվել է»,- ասաել է նա, հայտնում է Panorama.am-ը:

Նա նշել է, որ որևէ գործողություն չի կատարվել, իսկ Վեհափառի դեմ հարուցված քրեական վարույթը նպատակ է ունեցել խոչընդոտել Եպիսկոպոսաց ժողովի անցկացումն և այդ նպատակին է ծառայել։

Զոհրաբյանը հիշեցրել է, որ հինգ եպիսկոպոսի նկատմամբ հարուցվել է քրեական վարույթ, և այն ժամանակ, երբ Գարեգին Երկրորդը ունեցել է ինքնաթիռի տոմսեր ու պատրաստվել է մեկնել Եպիսկոպոսաց ժողովին, մեկ օր առաջ նրա դեմ գործ է հարուցվել։

Նրա խոսքով՝ դատարանը իրավունք չուներ միջամտելու Եկեղեցու գործերին, ինչը, ըստ նրա, համարժեք է այն իրավիճակին, երբ ամուսիններից մեկը դիմի դատարան և դատական ակտով ամուսնուն պարտավորեցնեն սիրել իրեն։

«Ես շատ բան եմ տեսել, բայց Էս մասշտաբի լկտի անարդարության չեմ հանդիպել»,- հայտարարել է փաստաբանը։

Փետրվարի 14-ին հայտնի դարձավ, որ ՀՀ դատախազությունը քրեական հետապնդում է հարուցել Ամենայն Հայոց կաթողիկոս Գարեգին Բ-ի նկատմամբ Մասյացոտնի թեմի նախկին առաջնորդի գործով դատական ակտը չկատարելու մեղադրանքով, և արգելել է նրա ելքը Հայաստանից: