Ֆարմանյան. Իմպիչմենտով հեռացրեք Նիկոլին՝ ի՞նչ ընտրություն, ի՞նչ հունիս

PanARMENIAN.Net - Ազգային ժողովի նախկին պատգամավոր Սամվել Ֆարմանյանը ընդդիմությանը կոչ է արել իմպիչմենտով հեռացնել վարչապետ Նիկոլ Փաշինյանին:

Ըստ նրա՝ հայտնի չէ, թե ինչ կլինի մինչև հունիս՝ «ի՞նչ է մնալու երկրից»:

«Ժամ առաջ, րոպե առաջ պետք է Նիկոլին հեռացնել վարչապետի պաշտոնից: Նա այս օրհասական իրավիճակում ավելի մեծ սպառնալիք է Հայաստանի գոյության ու հայ ժողորդի անվտանգության համար, քան մեզ մոտեցող սարսափելի ցունամին: Ադրբեջանն ու Թուրքիան, կարծես, ներքաշվում են Իրանի դեմ գործողություններում՝ դրանից բխող հավանական սցենարներով:

Ընդդիմությու՛ն, իրար գլուխ եկեք, շատ արագ վարչապետի ընդունելի միասնական թեկնածու առաջադրեք ու ԱԺ-ում իմպիչմենտի միջոցով հեռացրեք Նիկոլին: Ի՞նչ ընտրություն: Ի՞նչ հունիս: Մինչև հունիս ի՞նչ է մնալու՝ երկրից, ձեզնից... Հայաստանն անտեր էլ չէ՝ դարպասները ներսից բացված են:

Արագ համախմբվեք բոլորով, ձևավորեք ազգային համերաշխության կարող ու «ձվերով» կառավարություն. թող Հայաստանը գոնե գոյության շանս ստանա:

Անիծյալ լինեք, եթե անգամ նման օրհասական իրավիճակում թացը չորից չեք տարբերելու ու նիկոլից ավելի նիկոլ եք լինելու»,-գրել է նա:

Հայաստանի Հանրապետական կուսակցությունը հայտարարել է քաղաքական երկխոսություն և կոնսուլտացիաներ մեկնարկելու մեր նախաձեռնության մասին` նշելով, որ խորապես մտահոգված է վերջին շրջանում երկրում արձանագրվող բացասական զարգացումների նոր դրսևորումներով։

ՀՀԿ-ն կոչ է արել բոլոր ընդդիմադիր ուժերին, քաղաքացիական հասարակությանը և յուրաքանչյուր քաղաքացու՝ «վեր կանգնել կուսակցական և խմբային նեղ շահերից և միավորվել իմպիչմենտի սահմանադրական գործիքակազմի շուրջ: