Լիբանանում ՀՀ դեսպանությունը շարունակում է աշխատել արտակարգ ռեժիմով

PanARMENIAN.Net - Լիբանանում ՀՀ դեսպանությունը շարունակում է աշխատել արտակարգ ռեժիմով՝ ապահովելով անհրաժեշտ խորհրդատվություն և հյուպատոսական ծառայությունների մատուցումը:

Դեսպանության գործարկած թեժ գծերը շարունակում են գործել՝ +961 3 157 305, +961 3 536 041, հայտնում է ԱԳՆ-ն:

Նախարարությունից նաև հայտնել են, որ Լիբանանի օդային տարածքը բաց է, և շաբաթական երկու անգամ իրականացվել են Բեյրութ-Երևան ուղիղ չվերթներ։

Միաժամանակ պարբերաբար կազմակերպվում են հանդիպումներ Լիբանանում գտնվող ՀՀ քաղաքացիների հետ՝ քննարկելու զարգացումներից բխող հնարավոր մարտահրավերները և անհրաժեշտության դեպքում լրացուցիչ քայլեր ձեռնարկելու հարցերը։

ՀՀ ԱԳՆ-ն ողջունել է նաև Լիբանանում 10-օրյա հրադադարի հաստատումը, որն իրականություն է դարձել ԱՄՆ նախագահի միջնորդական ջանքերի շնորհիվ և կարևոր քայլ է իրավիճակի լարվածության նվազեցման ուղղությամբ: ԱԳՆ-ն հույս է հայտնել, որ այս զարգացումը կնպաստի տարածաշրջանում համապարփակ և տևական խաղաղության հաստատմանը՝ կողմերի տարածքային ամբողջականության հարգմամբ։

Ապրիլի 17-ին ԱՄՆ նախագահ Դոնալդ Թրամփը հայտարարել է, որ արգելել է Իսրայելին հարվածներ հասցնել Լիբանանին՝ ընդգծելով, որ նման գործողություններ այլևս չեն կրկնվի։

Իսրայելը և «Հզբոլլահ» շարժումը հաստատել են իրենց համաձայնությունը տասնօրյա հրադադարին, որը ուժի մեջ է մտել ապրիլի 17-ին՝ ժամը 00:00-ին։