Նախարար․ Հրազդանի Firebird AI-ի «ԱԲ գործարանը» շուտով կգործարկվի

29 հուլիսի 2026 - 11:15 AMT

PanARMENIAN.Net - Բարձր տեխնոլոգիական արդյունաբերության նախարար Մխիթար Հայրապետյանն այցելել է Firebird AI ընկերության՝ Հրազդանում կառուցվող արհեստական բանականության տվյալային կենտրոն, որտեղ ծանոթացել է «ԱԲ գործարանի» շահագործման նախապատրաստական աշխատանքներին։

ԲՏԱ նախարարը ֆեյսբուքյան իր էջում տեղեկացրել է, որ գործարանի գործարկումը նախատեսվում է առաջիկա օրերին։

«Այն, ինչ ամիսներ առաջ անհնարին էր թվում, այսօր արդեն իրականություն է. Firebird AI ընկերության՝ Հրազդան քաղաքում գտնվող «ԱԲ գործարանն» օրեր անց կգործարկվի»,- գրել է նա։

Նախարարին շրջայցի ընթացքում ուղեկցել է Firebird AI ընկերության համահիմնադիր Ալեքսանդր Եսայանը։

Շրջայցի ընթացքում քննարկվել են նաև նախագծի հետագա զարգացման փուլերը։ Մխիթար Հայրապետյանը նշել է, որ Firebird-ի իրականացրած այս ռազմավարական նախագիծը կարևոր նշանակություն ունի Հայաստանի տեխնոլոգիական զարգացման և միջազգային մրցունակության բարձրացման տեսանկյունից՝ ձևավորելով նոր հնարավորություններ գիտահետազոտական համայնքի, ստարտափների, բարձր տեխնոլոգիական ընկերությունների և պետական հատվածի համար։

«ՀՀ կառավարության և Firebird ընկերության համատեղ համագործակցության շնորհիվ Հայաստանը տեխնոլոգիաների սպառողից վերածվում է աշխարհին արհեստական բանականության բարձր տեխնոլոգիական արդյունք և լուծումներ առաջարկող երկրի, որը պատրաստ է սահմանել ապագայի խաղի կանոնները»,- ասվում է հաղորդագրությունում:

Նախագծի առաջին փուլով նախատեսվել է 500 մլն դոլարի ներդրում, իսկ հետագա փուլերում ընդհանուր ներդրումների ծավալը կհասնի մոտ 5 մլրդ դոլարի։