ԲարՔեմփ Արցախ 2011. Որոնումը միայն Google-ը չի

7 սեպտեմբերի 2011 - 09:20 AMT

PanARMENIAN.Net - Սեպտեմբերի 2-5-ը Շուշիում անցկացվող «ԲարՔեմփ Արցախ 2011» տեղեկատվական տեխնոլոգիաներին նվիրված չկոնֆերանսի ժամանակ տեղեկատվության անվտանգության մասնագետ և բլոգեր Սամվել Մարտիրոսյանն իր շնորհանդեսը ներկայացնելիս պատմեց քիչ հայտնի որոնողական համակարգերի մասին։

Ըստ Սամվել Մարտիրոսյանի՝ հայերի շրջանում ձևավորվել է «եթե որոնում, ապա Google» կարծրատիպը։ «Որոնումը միայն Google-ը չի և միայն Yandex-ը չի»,- նշեց նա։

Սամվել Մարտիրոսյանի խոսքով՝ Google-ը ունի ընդլայնված որոնման հնարավորություններ, որոնցից քչերն են օգտվում, ինչպես օրինակ սոցիալական որոնումը։ Սակայն քանի որ Google-ն այդքան էլ «չի սիրում» Facebook-ին, իր սոցիալական որոնման արդյունքի էջերում հազվադեպ է ցուցադրում Facebook-ից լինքեր։

«Եթե ուզում եք սոցիալական որոնում կատարել, կան հատուկ սոցիալական որոնողական համակարգեր, օրինակ՝ topsy.com-ը, socialmention.com-ը կամ snapbird.org։ Սրանցից Snapbird-ը միայն Twitter-ում է որոնումներ կատարում»,- ասաց Սամվել Մարտիրոսյանը։

Սամվել Մարտիրոսյանը ներկայացրեց նաև աուդիո, վիդեո և PDF ֆայլերի որոնողական համակարգեր։ «Օրինակ FindSounds.com-ում կարելի է որոնել միայն աուդիո ֆայլեր, անգամ հնարավոր է ընտրել ցանկալի ֆորմատը՝ mp3, wav կամ այլ, չափսը և այլ պարամետրեր։ PDF ֆայլերի որոնման հիանալի համակարգ է greatpdf.com-ը»,- պատմեց Սամվել Մարտիրոսյանը։

Խոսելով գործարար որոնումների մասին, նա առանձնացրեց biznar.com-ը, որը կատարում է Դեղին էջեր կայքերի նման որոնում, սակայն խելացի (smart) որոնում՝ դասակարգելով ըստ թեմաների։

Սամվել Մարտիրոսյանը ծանոթացրեց ԲարՔեմփ Արցախ-ի մասնակիցներին ևս մեկ հետաքրքիր որոնողական համակարգին՝ WolframAlpha-ին։

«WolframAlpha-ն խելացի որոնում է կատարում։ Օրինակ եթե որոնում եք Արցախ, այն ոչ թե լինքեր է ձեզ ցուցադրում, այլ ավտոմատ կերպով նյութ է պատրաստում՝ հավաքում և միավորում տեղեկությունները և ցուցադրում մի էջում։ Կան մի շարք այլ համակարգեր, որոնք որոնում են կատարում միաժամանակ մի քանի որոնողական համակարգերում, այդ թվում և WolframAlpha-ում, դրանցից են՝ heapr.com-ը, goofram.com-ը»,- ավելացրեց Սամվել Մարտիրոսյանը։

«ԲարՔեմփ Արցախ 2011» չկոնֆերանսի կազմակերպիչն է «Արցախի կրթական հիմնադրամ»-ը, աջակիցը՝ Արցախի մշակույթի և երիտասարդության հարցերի նախարարությունը։ «ԲարՔեմփ Արցախ-2011»-ը ինտերնետով ապահովում է «Արմինկո» ընկերությունը։

Հղումներ թեմայով.

http://www.wolframalpha.com

http://www.goofram.com

http://www.heapr.com

http://www.topsy.com

http://www.socialmention.com

http://www.biznar.com

http://www.mundu.com

http://www.greatpdf.com

BarCamp

BarCamp-ը միջոցառումներ կազմակերպելու նոր ձևաչափ է, որն առաջին անգամ կիրառվել է 2005թ-ին ԱՄՆ-ում՝ Silicon Valley-ում, և հետո ստացել լայն տարածում ողջ աշխարհում։ BarCamp են անվանում տեղեկատվական տեխնոլոգիաների, Ինտերնետի և նոր մեդիաների թեմաներով չկոնֆերանսները։ Չկոնֆերանս, քանի որ միջոցառումն անցնում է ոչ ֆորմալ մթնոլորտում:

Հայաստանում չկոնֆերանսն առաջին անգամ անցկացվել է 2009թ-ին, որին հաջորդել են «ԲարՔեմփ Երևան» 2010 և 2011-ը։ «ԲարՔեմփ Երևան»-ի հաջող անցկացումից հետո 2010-ին կայացավ նաև «ԲարՔեմփ Արցախը», որին էլ հաջորդեց «ԲարՔեմփ Արցախ 2011»-ը։