Հայկական ընդդիմության հանրահավաքների սեզոնը բացված է` մարտի 1, թաթար-մոնղոլներ և խորտակված նավեր 1 մարտի 2012 - 21:31 AMT PanARMENIAN.Net - Մարտի 1-ին` երեկոյան 18:00-ին, Երևանի Ազատության հրապարակում 4-ամսյա ընդմիջումից հետո մեկնարկեց ընդդիմադիր Հայ ազգային կոնգրեսի հանրահավաքը, որին, Ոստիկանության տվյալների համաձայն, հավաքվել էր չորս հազար մարդ: Հանրահավաքն ընթանում էր Հայաստանի նորագույն պատմության համար ողբերգական հիշատակի օրը: 2008թ. փետրվարից հայկական ընդդիմությունը` նախկին նախագահ Լևոն Տեր-Պետրոսյանի գլխավորությամբ Երևանի կենտրոնում անցկացնում էր հանրահավաք` այդ կերպ արտահայտելով նախագահական ընտրությունների վերաբերյալ իր դժգոհությունը: Մարտի 1-2 ակցիաների ընթացքում բախումներ էին եղել հանրահավաքի մասնակիցների և ոստիկանության ուժերի միջև: Գլխավոր դատախազության տվյալներով, տուժել է մոտ 200 մարդ, ձերբակալվել 100 և զոհվել 10: Ծափահարություններ «2008թ. մարտի 1-ին ընկած հերոսների» հիշատակին Հանրահավաքը բացել է «Հայկական ժամանակ» թերթի գլխավոր խմբագիր Նիկոլ Փաշինյանը, ով իր խոսքում ասել է, որ պետք չէ լռության րոպեով հարգել 2008թ. մարտյան դեպքերի զոհերի հիշատակը, այլ հարկ է դա անել ծափերով: Այդ խոսքերից և ծափահարություններից հետո ելույթ է ունեցել 2008թ. մարտի 1-ի զոհերից մեկի` Գոռ Կլոյանի հայրը, ով ներկայիս իշխանություններին մեղադրել է նրանում, որ նրանք զավթել են իշխանությունը` իրենց երեխաների արյունը թափելով: Նա նաև մեղադրել է եվրոպական կառույցներին, որ անօրինականության վրա աչք են փակել: Կլոյանի հայրը այս սպանությունները համեմատել է Դինքի սպանության հետ, քանի որ դա ևս չբացահայտված է մնացել: Բոլորին պետք է դատի տալ. բոլորը հավասար են օրենքի առաջ Նիկոլ Փաշինյանը հայտարարել է, որ պետք է դատի տալ նախկին նախագահ Ռոբերտ Քոչարյանին և ներկայիս նախագահ Սերժ Սարգսյանին, խորհրդարանի նախկին խոսնակ Հովիկ Աբրահամյանին, Ոստիկանության նախկին պետ Հայկ Հարությունյանին, Ազգային անվտանգության ղեկավար Գոռիկ Հակոբյանին, ՀՀ գլխավոր դատախաղ Աղվան Հովսեփյանին, ՊՆ ներկայիս նախարար Սեյրան Օհանյանին և որոշ այլ պաշտոնյաների: Բոլորն են հավասար օրենքի առաջ, ոչ ոք առավելություն չունի»,- հայտարարել է նա: Հայոց համազգային շարժման (ՀՀՇ) վարչության նախագահ Արամ Մանուկյանն իր հերթին հայտնել է, որ 4 ամսվա ընթացքում հասցրել է կարոտել հանրահավաքները. «Խոստանում եմ, որ այսուհետ հանրահավաքներն ավելի հաճախակի կլինեն»: Իր խոսքում նա անդրադարձել է 2008թ. մարտի 1-ի հարցին և նշել մեղավորների անպատժելիությունը: Նրա խոսքով` իշխանությունները կանխամտածված կերպով են աջակցում արտագաղթին, աղքատության աճին և ողբերգական դեպքերին բանակում, որպեսզի իրենց ձեռքում պահեն իշխանությունը: ՀԱԿ. Իշխանությունները վախենում են առաջիկա ընտրություններից ՀԱԿ-ի համակարգող Լևոն Զուրաբյանն իր հերթին հայտնել է, որ իշխանություններն առաջիկա ընտրություններին նախանձելի դրության մեջ չեն մոտենում. երկրում ծայրահեղ աղքատություն է, սոցիալ-տնտեսական ճգնաժամ: Նրա խոսքով` ընտրություններում պարտության առջև վախի պատճառով իշխանություններն աննախադեպ քայլի են դիմել` ՀՀԿ համամասնական ցուցակում առաջին համարի տակ գրանցելով երկրի նախագահ Սերժ Սարգսյանին: Ընդ որում, նա ընդգծել է, որ այժմ Հայաստանում կա կազմակերպված ընդդիմություն` ի դեմս ՀԱԿ-ի, որը համակարգում է «ժողովրդի պայքարը վարչակարգի դեմ»: Նա ժողովրդին կոչ է արել ավելի ակտիվ մասնակցել իշխանությունների դեմ պայքարին` դիմելով Կոնգրեսի տարածքային կառույցներ, «զորակոչվել» պայքարին հանուն ազատ և ժողովրդավարական Հայաստանի: «Արտակարգ իրադրության իրավական ռեժիմի մասին» նոր օրենքի մասին «Հանրապետություն» ընդդիմադիր կուսակցության ղեկավար Արամ Սարգսյանը, ելույթ ունենալով Ազատության հրապարակում ՀԱԿ-ի հանրահավաքի ժամանակ, անդրադարձել է դրությանը երկրում` իշխանություններին մեղադրելով ստեղծված սոցիալ-տնտեսական իրադրության մեջ: Այս համատեքստում նա նկատել է, որ բնակչության 80 տոկոսը բացեիբաց խոստովանում է, որ հնարավորության դեպքում կհեռանա երկրից: Սարգսյանից հետո ելույթ է ունեցել Նիկոլ Փաշինյանը, որն անդրադարձել է «Արտակարգ դրության իրավական ռեժիմի մասին» օրենքին, որն ընդունվել է այսօր Հայաստանի Ազգային ժողովում: Նա նկատել է, որ չնայած ընդդիմության բոլոր կոչերին, օրենքը, այնուամենայնիվ, ընդունվել է, և ամենասարսափելին այն է, որ ԱԻ դեպքում բանակի կիրառման մասին օրենքն ընդունվել է հենց մարտի 1-ին: Տեր-Պետրոսյանն անձամբ կկազմի ՀԱԿ-ի ընտրացուցակը Հանրահավաքի վերջում ելույթ է ունեցել Կոնգրեսի ղեկավար Լևոն Տեր-Պետրոսյանը: Նա հաղորդել է, որ Կոնգրեսը որոշում է կայացրել՝ առաջիկա խորհրդարանական ընտրություններում համամասնական ցուցակը վերջնական տեսքի բերելու պարտականությունը դնել իր վրա, «իհարկե, հաշվի առնելով ՀԱԿ-ի քաղխորհրդում քննարկված չափորոշիչներն ու առաջարկները»: Տեր-Պետրոսյանը նշել է նաև, որ անհրաժեշտ է հաղթահարել ժողովրդի մեջ արմատացած հոգեբանական բարդույթը, որ նախագահական ընտրությունները խորհրդարանականից կարևոր են: «Հասարակությանը համոզիչ կերպով պետք է բացատրել խորհրդարանական ընտրությունների կարևորությունը` դրանք դիտելով որպես նախադրյալ հենց նախագահական ընտրություններում հաջողության հասնելու համար: Հաղթելով խորհրդարանական ընտրություններում` ժողովուրդն անհամեմատ կհեշտացնի իր հաղթանակը նախագահական ընտրություններում»,- ընդգծել է նա: Հայաստանում խորհրդարանական ընտրությունները տեղի կունենան 2012թ. մայիսի 6-ին: Ռոբերտ Քոչարյանը «խորտակված նավ է» Տեր-Պետրոսյանն անդրադարձել է նաև Քոչարյանի մասին պտտվող լուրերին: «Քանի դեռ իշխանությունը Սերժ Սարգսյանի ձեռքում է` Ռոբերտ Քոչարյանն այդ մասին երազել անգամ չի կարող»,- մարտի 1-ին հանրահավաքի ժամանակ հայտնել է ՀԱԿ-ի ղեկավար Լևոն Տեր-Պետրոսյանը` հավելելով, որ Ռոբերտ Քոչարյանը «խորտակված», իսկ Սերժ Սարգսյանը «խորտակվող նավ է»: Նա կոչ է արել նաև «Բարգավաճ Հայաստանի» հետ կապված ցանկացած անցուդարձի ետևում չփորձել տեսնել «Ռոբերտ Քոչարյանի ականջները»: ՀԱԿ-ի առաջնորդը, չբացառելով ԲՀԿ և Քոչարյանի կապը, նկատել է, որ դա գնալով ավելի է նմանվում «դավադրությունների տեսության»: Իսկ ինչ վերաբերում է «Բարգավաճ Հայաստանին» Ռոբերտ Քոչարյանի նախագահության օրոք պաշտոնավարած ՀՀ նախկին ԱԳ նախարար Վարդան Օսկանյանի անդամագրմանը, ապա Տեր-Պետրոսյանը դա բացատրել է Օսկանյանի և ԲՀԿ փոխադարձ շահերով: Թաթար-մոնղոլները, Ռոբերտ Քոչարյանն ու Արթուր Բաղդասարյանը Լևոն Տեր-Պետրոսյանի խոսքով` ինքը Ռոբերտ Քոչարյանին երբեք թաթար-մոնղոլ չի անվանել: Նա նման բան չի ասել ոչ թե որովհետև կվիրավորեր Ռոբերտ Քոչարյանին, այլ որովհետև այդպիսով կարող էր վիրավորել հարգարժան թաթար և մոնղոլ ժողովուրդներին, որոնք ժամանակին կարևոր դեր են խաղացել համաշխարհային պատմության մեջ: Նրա խոսքով` ինքը միայն հայտարարել է, որ քոչարյանա-սերժական վարչախմբի ձևավորած տնտեսական համակարգը որևէ կապ չունի ո'չ սոցիալիզմի, ո'չ ֆեոդալիզմի, ո'չ իսկ անվանապես հռչակված կապիտալիզմի հետ և ավելի շուտ հիշեցնում է թաթար-մոնղոլական տիպի խանական համակարգ: Նա հավելել է նաև, որ Արթուր Բաղդասարյանին «դավաճան» չի անվանել` հեգնանքով հիշեցնելով, որ վերջինիս դավաճան է անվանել Հայաստանի երկրորդ նախագահ Ռոբերտ Քոչարյանը: Իսկ ինչ վերաբերում է Արթուր Բաղդասարյանի անսկզբունքայնությանը, ապա, Տեր-Պետրոսյանի խոսքով, այդ մասին դեռևս 2008 թվականին խոսել է Հայաստանում ԱՄՆ գործերի ժամանակավոր հավատարմատար Ռոբին Ֆիլիպսը: Լևոն Տեր-Պետրոսյանը Հայկական հարցի և հայկական դիվանագիտության «հաղթանակների» մասին ՀԱԿ-ի ղեկավար Լևոն Տեր-Պետրոսյանն իր ելույթում մեկնաբանել է նաև Ֆրանսիայի Սահմանադրական խորհրդի որոշումը, որով Հայոց ցեղասպանության ժխտումը քրեականացնող օրինագիծը ոչ սահմանադրական է ճանաչվել: Նրա խոսքով` երբ այդ օրենքն ընդունվեց, ողջ հայ ժողովուրդը ոգեշնչվել էր, իսկ Սերժ Սարգսյանն ու Էդվարդ Նալբանդյանը շնորհակալություն էին հայտնել Ֆրանսիայի իշխանություններին` հայտարարելով, որ դա հայկական դիվանագիտության հաղթանակի արդյունքն է: «Թե ինչպիսի մասնակցություն են դրան ունեցել հայ դիվանագետները, միայն Աստծուն է հայտնի, քանի որ ֆրանսիական կառավարությունը դա արել է այլ դրդապատճառներով` որպեսզի երաշխավորի հայ համայնքի ձայներն ընտրություններում և խոչընդոտի Թուրքիայի անդամակցությանը Եվրամիությանը»,- ընդգծել է Տեր-Պետրոսյանը: Նա հավելել է, որ հայկական հարցը կրկին դարձել է արտաքին ուժերի խաղերի առարկան` դրանից բխող բոլոր հետևանքներով։ Նրա խոսքով` Ֆրանսիայի Սենատի կողմից Ցեղասպանության մասին օրենքի ընդունումից հետո արժեր մտածել, թե ինչպես դա կանդրադառնա Թուրքիայի հետ հարաբերությունների կարգավորման վրա, որոնք «կենսական նշանակություն ունեն Հայաստանի, մեր երկրի ազգային անվտանգության և տնտեսական զարգացման համար»: Տեր-Պետրոսյանն ասել է նաև, որ իշխանությունները պետք է այնպես անեին, որպեսզի այդ «դիվանագիտական հաղթանակը» չնմանվի 1878թ. Բեռլինի և 1920թ. Փարիզի խաղաղության կոնֆերանսներում հայկական դիվանագիտության տարած ավելի փայլուն հաղթանակներին, որոնց հետևանքով նախ բնաջնջվեց ողջ Արևմտյան Հայաստանը, և ապա կորսվեց Հայաստանի Հանրապետության տարածքի ուղիղ կեսը։ Հաջորդ հանրահավաքը` մարտի 30-ին Հայ ազգային կոնգրեսի հաջորդ հանրահավաքը տեղի կունենա մարտի 30-ին: Այդ մասին մարտի 1-ին ընդդիմադիր ՀԱԿ-ի հերթական հանրահավաքի ժամանակ հայտնել է ՀԱԿ-ի ակտիվիստ, «Հայկական ժամանակ» թերթի խմբագիր Նիկոլ Փաշինյանը: Ընդ որում, նա նկատել է, որ եթե անհրաժեշտություն առաջանա, ապա հանրահավաքը կարող է տեղի ունենալ և նշանակված ամսաթվից շուտ: Հանրահավաքից հետո ցուցարարները երթով շարժվել են դեպի Մյասնիկյանի հրապարակ, որպեսզի հարգանքի տուրք մատուցեն 2008թ. մարտի 1-ի զոհերի հիշատակին: Ուշագրավ Նա հավելել է, որ որևէ երկիր չի կարող վիճարկել որևէ այլ երկրի մարտունակ բանակ ունենալու իրավունքը Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը Դեսպանը նաև հրապարակել է Politico-ի հոդվածը «Thales» ընկերության ֆրանսիական ռադարների մասին Ամենաընթերցվողը բաժնում | ԱԳՆ․ Ստացել ենք խաղաղության պայմանագրի նախագծի վերաբերյալ Ադրբեջանի առաջարկները Սա տեքստի 9-րդ խմբագրությունն է Թունյան․ Ադրբեջանից գազ գնելու հարց այս պահին չկա օրակարգում Ըստ նրա՝ Հայաստանի կամ որևէ այլ երկրի համար տարբերություն չկա, թե որտեղից կգնի իր էներգառեսուրսը ՀՀ–ն կգործակցի Իտալիայի հետ ռազմական, ռազմատեխնիկական ոլորտներում․ Կան պայմանավորվածություններ Այցը տեղի է ունեցել ապրիլի 23-25-ը Բողոքի ակցիա՝ Բեռլինում «Ալիևին՝ Հաագա» վանկարկումով Ակցիայի մասնակիցները նաև ծածանել են Արցախի Հանրապետության դրոշը |