Ծանրամարտ. Մայիսի 17-23-ը Վալենսիայում (Իսպանիա) ընթանում է Եվրոպայի ծանրամարտի պատանիների առաջնությունը: Հայ ծանրորդներից առաջինը մեկնարկեց Սմբատ Մարգարյանը (56կգ ք/կ) և դարձավ Եվրոպայի չեմպիոն: «Պոկում» վարժությունում Մարգարյանը հավաքեց 105 կգ, իսկ «հրում» վարժությունում ծանրորդը կարողացավ պահել 135-կիլոգրամանոց ծանրաձողը: Երկամարտի արդյունքում նա հավաքեց 240 կգ և նվաճեց չեմպիոնի տիտղոսը: Եվրոպայի մեծահասակների առաջնությունում, որն անցնում էր ապրիլի 2-11-ը Մինսկում, 17-ամյա Մարգարյանը բարձրացրեց 255 կգ և նավճեց արծաթե մեդալ:

Այս շաբաթ Հայաստանի Ազգային վիճակագրական ծառայությունը հրապարակեց 2010 թվականի հունվար-ապրիլ ամիսների տվյալները: Հայաստանում ՀՆԱ-ի աճը 2010-ի հունվար-ապրիլ ամիսներին կազմել է 7.2 տոկոս: Ինչպես հայտնում է Հայաստանի Ազգային վիճակագրական ծառայությունը, ՀՆԱ ծավալը կազմել է 777.6 մլրդ դրամ: Միևնույն ժամանակ, հաշվետու փուլում արտահանումը կազմել է 289.8 մլրդ դրամ` 2009-ի հունվար-ապրիլ ամիսների համեմատ աճելով 64.3 տոկոսով, իսկ ներկրումը կազմել է 1.1 մլրդ դրամ` մեծանալով 24.4 տոկոսով: Եթե հաշվի առնենք, որ բյուջեում ամրագրված տնտեսական աճը 2010թ. համար նախատեսված էր 1,2 տոկոսի չափով, իսկ գնաճը տոկոսի 4±1,5 չափով , ապա, ելնելով դրանից, կառավարությունը որոշել է վերանայել իր մակրոտնտեսական կանխատեսումները, առավել ևս, որ հակաճգնաժամային միջոցառումները դրական արդյունք են տալիս:

Հայաստանում քաղաքական շաբաթը սկսվել է Թուրքիայի վարչապետ Ռեջեփ Թայիփ Էրդողանի` Իրան, այնուհետև Ադրբեջան կատարած այցի նկատմամբ հայ խորհրդարանականների արձագանքից: PanARMENIAN.Net ի թղթակցի հետ զրույցում «Բարգավաճ Հայաստան» կուսակցության խորհրդարանական խմբակցության քարտուղար Արամ Սաֆարյանը, մեկնաբանելով Իրանի խաղաղ միջուկային ատոմի շուրջ ստորագրված համաձայնությունը Թուրքիայի, Բրազիլիայի և Թուրքիայի ԱԳՆ ղեկավարների միջև ասել է, որ պետք չէ զարմանալ Թուրքիայի և Իրանի համագործակցության վրա, քանի որ այդ երկու երկրներն արդեն մի քանի հարյուրամյակ խոշոր ռազմավարական գործընկերներ են` մրցակիցներ տարածաշրջանում: Նրա խոսքերով, Անկարայի և Թեհրանի հարաբերություններում գերիշխում է համագործակցության միտումը, քանի որ երկրները միմյանց կարիքն ունեն: Անդրադառնալով Թուրքիայի վարչապետ Ռեջեփ Թայիփ էրդողանի այցին Ադրբեջան` Արամ Սաֆարյանն ասել է, որ Հայաստանի դիրքորոշումը Թուրքիայի վերաբերյալ միանշանակ է: «Անկարան պետք է ավելի հավասարակշիռ քաղաքականություն ցուցաբերի Հարավային Կովկասում և չղեկավարվի Ադրբեջանի շահերով»,- ասել է Սաֆարյանը:

Ով ասես, որ չի պատրաստվում լուծել ղարաբաղյան հիմնախնդիրը, որը, ինչպես մենք բազմիցս գրել ենք, լուծվել է 1994 թվականին: Երբեմն թվում է, թե ամեն մի քաղաքական գործիչ, ով որևէ առնչություն ունի Հարավային Կովկասի հետ, պարզապես իր պարտքն է համարում կարգավորման հարցի վերաբերյալ իր տեսակետը հայտնել: Օրերս «փայլեց» Վրաստանի ԱԳ նախարար Գրիգոլ Վաշաձեն, որը հայտարարեց, թե Հարավային Կովկասում իրադրությունը կարող է պայթել ցանկացած պահի:

Հայաստանը արդեն մի քանի տարի ողջ աշխարհի հետ նշում է «Թանգարանների գիշերը» և մարդկանց համարյա բոլոր թանգարանները մինչև ուշ գիշեր անվճար այցելելու տոն է նվիրում, ընդ որում թանգարաններն իրենց այցելուներին հնարավորություն են տալիս դիտել անսովոր ցուցադրություններ, ներկայացումներ և նույնիսկ ֆիլմեր Հայաստանի տարբեր մշակութային անկյուններում:

Չհասցրեցին մարել «Մոսկվա» կինոթատրոնի ամառային դահլիճի տեղում եկեղեցու կառուցման մտադրության հետ կապված կրքերը, ինչպես հասարակության մեջ սկսեցին լուրեր շրջանառվել նոր շինարարության դեմ հերթական ստորագրահավաքի մասին: «Մե՛նք ենք այս քաղաքի տերը» նախաձեռնությունը հայտարարություն է տարածել «Ուսանողական այգու» վերացման վտանգի վերաբերյալ: Ինչպես նշվում է PanARMENIAN.Net- ի ստացած հայտարարության մեջ, «այգում սկսվել է լայնածավալ շինարարություն, որը չի համաձայնեցվել տվյալ միջավայրում բնակվող, ուսանող և ստեղծագործող քաղաքացիների հետ և սպառնում է հանրային հանգստի գոտին վերածել հերթական բետոնապատ տարածքի: Այստեղ ակնհայտորեն մասնավոր շահը վեր է դասվել հանրային շահից»:

Ֆիքսված հեռախոսակապի նոր օպերատորների մուտքը հայկական շուկա չի հանգեցնի «ԱրմենՏել» ընկերության ֆիքսված հեռախոսակապի սակագների նվազման: Այդ մասին մայիսի 5-ին կայացած մամլո ասուլիսում հայտնեց «ԱրմենՏել» ընկերության գլխավոր տնօրեն Իգոր Կլիմկոն: «Ֆիքսված հեռախոսակապի սակագները որոշվում են Հանրային ծառայությունների կարգավորման հանձնաժողովի կողմից, և ես կապ չեմ տեսնում նոր օպերատորների հայտնվելու ու սակագների նվազման միջև»,- ասաց Կլիմկոն: Նա հաղորդեց նաև, որ «ԱրմենՏել» ընկերությունը պայմանագիր է կնքել ֆիքսված հեռախոսակապի երկու նոր օպերատորների հետ և ողջունել նրանց մուտքն այդ շուկա: