Մեկ հաղթանակ և մեկ պարտություն. Հայաստանի հավաքականը զիջեց ռուսներին, իսկ երիտասարդականը` պարտության մատնեց Մոնտենեգրոյին

Մեկ հաղթանակ և մեկ պարտություն. Հայաստանի հավաքականը զիջեց ռուսներին, իսկ երիտասարդականը` պարտության մատնեց Մոնտենեգրոյին

Հունիսի 2-9-ի գլխավոր սպորտային իրադարձությունների ամփոփում

Վերջապես կայացավ 2012-ի Եվրոպայի առաջնության ընտրական մրցաշարի Հայաստան-Ռուսաստան խաղը, որը, ցավոք սրտի, հաղթանակ չբերեց Հայաստանի հավաքականին: Չնայած նրան, որ առաջինը հաշիվը բացեցին Վարդան Մինասյանի սաները, Մարկոս Պիզելիի գոլից հետո մեկ րոպե անց Ռոման Բերեզովսկու դարպաս պատասխան գնդակ ուղարկեց Ռոման Պավլյուչենկոն, որն այս խաղում աչքի ընկավ ևս երկու անգամ, ընդ որում երրորդ գոլը խփեց 11-մետրանոցից:

PanARMENIAN.Net - Այս խաղում Հայաստանի հավաքականը ցուցադրեց ավելի հետաքրքիր և գեղեցիկ խաղ, քան առաջին խաղում, բայց կորցրեց 3 միավոր:

Հայ ֆուտբոլիստների գերազանցությունը ռուսների նկատմամբ ստիպված էր ընդունել նույնիսկ Ռուսաստանի հավաքականի գլխավոր մարզիչ Դիկ Ադվոկատը: Նա ասել է, որ մարտին Երևանում նրա թիմն ավելի լավ է խաղացել: «Դե ինչ, շատ գոհ ենք արդյունքից, քանի որ մենք գիտեինք, որ պարտավոր ենք այսօր հաղթել: Մեր խաղը լավագույններից չէր»,- նշել է Ադվոկատը: Իսկ Հայաստանի հավաքականի գլխավոր մարզիչ Վարդան Մինասյանն ասել է, որ երբ հաշիվը 1:1 էր, խաղը հավասար էր, բայց մինչև ռուսների երկրորդ գոլը: «Ընդհանուր առմամբ մեզ չի բավականացնում փորձը: Մեզ համար գլխավորն է շարունակել շարժվել առաջ»,- ասել է Մինասյանը:

Հայաստանի հավաքականի հարձակվող Յուրա Մովսիսյանը Facebook-ի իր էջում շնորհակալություն է հայտնել բոլոր երկրպագուներին, որոնք աջակցել են Հայաստանի հավաքականին 2012-ի Եվրոպայի առաջնության ընտրական մրցաշարում Ռուսաստանի հետ խաղի ժամանակ, որն ավարտվել է 3:1 հօգուտ ռուսական թիմի:

«Ողջ աշխարհը տեսավ, թե ինչի է ընդունակ Հայաստանի հավաքականը, և մենք մեկնել էինք Ռուսաստան միայն հաղթանակի ետևից: Շնորհակալություն բոլորին մաղթանքների և լավ խոսքերի համար»,- գրել է Մովսիսյանը:

Ֆրանսիացի մրցավար Ստեֆան Լաննուան սխալմամբ է տասնմեկմետրանոց հարված նշանակել Հայաստանի հավաքականի դարպասին: Այդ մասին հունիսի 4-ին կայացած Հայաստան-Ռուսաստան ֆուտբոլային հանդիպումից հետո հայտնել է Հայաստանի ընտրանու կապիտան Սարգիս Հովսեփյանը: «Վիրավորական պարտություն է, չէ որ մենք առաջինն էինք գոլ իրացրել և հաշվով առջևում էինք: Նման իրադրություններում պարտվելը միշտ վիրավորական է: Ինչ վերաբերում է պենալտիին, ապա այնտեղ, իհարկե, ոչ մի խախտում չկար: Բոլորն էլ տեսան, մենք արդեն դիտել ենք տեսագրությունը, երևում է, որ ես կանոն չեմ խախտել: Բայց դե տրամադրությունն ամենավատը չէ, պարզապես եթե հաղթեինք, շատ ավելի բարձր կլիներ: Բայց դե ի՞նչ արած:

Ռուսաստանը մեր խմբի գլխավոր ֆավորիտն է», - լրագրողներին է պատմել Հայաստանի հավաքականի պաշտպանը, հաղորդում է ՌԻԱ Նովոստին:

Տվյալ պահին Հայաստանի հավաքականն ունի 8 միավոր, B խմբում նա զբաղեցնում է 4-րդ տեղը, Իռլանդիայի, Ռուսաստանի և Սլովակիայի հավաքականներն ունեն 13-ական միավոր: Հայաստանի հավաքականը հաջորդ խաղն անցկացնելու է սեպտեմբերի 2-ին Անդորրայի հավաքականի հետ:

Երևանում կայացած Հայաստան-Մոնտենեգրո ԵԱ-2013 ընտրական հանդիպման երկրորդ խաղակեսը սառը ցնցուղ էր Մոնտենեգրոյի հավաքականի համար: Չնայած, որ Հայաստանի հավաքականը 10 հոգով էր խաղում, նա կարողացավ խաղն իր ձեռքը վերցնել և արդեն 52-րդ րոպեին կրկին աչքի ընկավ Էդգար Մալաքյանը` դառնալով այս հանդիպման կրկնակի գոլի հեղինակ: Առաջին խաղակեսում հայ ֆուտբոլիստներն առջևում էին 1:0 հաշվով:

Հայաստանի հավաքականը վստահ էր խաղում` շատ լավ վերահսկելով գնդակը, և այնպիսի տպավորություն էր ստեղծվել, որ փոքրամասնությունը մրցակցի հավաքականն էր: Գոլ իրացնելու հոյակապ շանս ուներ Կամո Հովհաննիսյանը, սակայն նրա հարվածից հետո գնդակը Նեմանի Շտեկիչի ձեռքում հայտնվեց: Դրանից հետո տուգանային հարվածով դարպասաձողին հարվածեց թիմի ավագ Արտակ Եդիգարյանը: Հաշիվը մեծացնելու շանս ունեին նաև Մասիս Ոսկանյանը, Էդգար Մալաքյանը, սակայն դա հաջողվեց Հովհաննես Համբարձումյանին: Մեկ րոպե անց աչքի ընկավ Մոնտենեգրոյի թիմի ավագ Ստեֆան Նիկոլիչը` 3:1: Հակառակորդին իր հնարավորությունների հարցում կասկածի տեղիք չթողեց փոխարինման դուրս եկած Վալտեր Պողոսյանը` հաշիվը դարձնելով 4:1:

Մոնտենեգրոյի ֆուտբոլի երիտասարդական հավաքականի մարզիչ Դուշան Վլայսավլևիչը Հայաստանի հավաքականի հետ արտագնա խաղում 4:1 հաշվով կրած պարտությունից հետո խոստովանել է, որ Հայաստանն ավելի լավ խաղ ցուցադրեց, քան իր թիմը:

«Բայց դրա հետ մեկտեղ ես չեմ քննադատում մեր խաղը: Մենք բավական երկար ճանապարհ էինք անցել Անդորրայից մինչև Հայաստան և կես օր կորցրել էինք. խաղի ժամանակ երևում էր, որ մարզիկները հոգնած են: Նրանք շատ դանդաղ էին գործում, և փոխարինման դուրս եկած մարզիկները նույնպես ոչինչ չկարողացան փոխել խաղում», - ասել է Վլայսավլևիչը:

Մոնտենեգրոյի մարզիչը նշել է, որ առաջին գոլն ընդունեցին դարպասապահի սխալից հետո, և թիմը թևաթափ եղավ: Հանդիպումից մեկ օր առաջ՝ նախքան խաղը կայացած մամլո ասուլիսում նա Եվրոպայի 2013 թվականի առաջնության ընտրական մրցաշարի 3-րդ խմբից հաղթող ճանաչվելու հարցում իրենց հիմնական հակառակորդը Չեխիային էր համարում: Հայաստանի ընտրանու հետ խաղից հետո նա ստիպված է խոստովանել, որ Հայաստանի հավաքականն ի զորու է անակնկալներ մատուցել հակառակորդներին:

«Ես գոհ եմ խաղից, մենք կարողացանք նման հաղթանակ տանել տաս հոգով, թեև դեռ աշխատելու տեղ ունենք: Բայց եթե փոքրամասնությամբ կարողացանք այնպես անել, որ խաղի որակը չընկնի, ապա կարող եմ ասել, որ այս ֆուտբոլիստներին մեծ ապագա է սպասում», - Մոնտենեգրոյի հավաքականի հանդեպ հաղթանակից հետո ասել է Հայաստանի ֆուտբոլի երիտասարդական հավաքականի մարզիչ Ռաֆայել Նազարյանը:

Մարզիչը խոստովանել է, որ նման խաղ չէր սպասում իր սաներից: Իսկ ընդմիջմանը նրանց ասել էր, որ պետք չէ միայն պաշտպանվել, և անհրաժեշտ է կարճ փոխանցումներով խաղալ: «Ֆուտբոլիստները պետք է հոգեբանորեն նախապատրաստվեն, ապագան ցույց կտա, թե նրանք ինչի են ընդունակ», - ավելացրել է Նազարյանը, որի ղեկավարությամբ առաջին իսկ խաղում Հայաստանի երիտասարդական ընտրանու ֆուտբոլիստները 4:1 հաշվով ջախջախիչ պարտության մատնեցին Չեռնոգորիայի հավաքականին:

Մոնտենեգրոյի հետ հանդիպումը ԵԱ-2013 ընտրական մրցաշարի շրջանակներում առաջինն էր Հայաստանի երիտասարդական հավաքականի համար, և թիմն իր խմբում 3 միավոր վաստակեց: Նույնքան միավոր ունեն նաև Մոնտենեգրոյի և Չեխիայի հավաքականները:

Հայաստանի ֆուտբոլի երիտասարդական հավաքականի հարձակվող Գևորգ Բադալյանը Մոնտենեգրոյի հավաքականի հետ հանդիպումը գերազանց է գնահատում: «Մենք արեցինք ամեն ինչ, որպեսզի հաղթենք, բոլորն էլ հոյակապ խաղացին և արժանի հաղթանակ տարան: Հակառակորդը թույլերից չէր, պարզապես մենք լավ էինք նախապատրաստվել»,- Մոնտենեգրոյի հանդեպ 4:1 հաշվով վստահ հաղթանակից հետո PanARMENIAN.Net ի թղթակցին է հայտնել Բադալյանը:

Հայաստանի և Մոնտենեգրոյի երիտասարդական հավաքականների խաղում երկու գոլի հեղինակ Էդգար Մալաքյանը խոստովանել է, որ նրանք շատ հավաքված են խաղացել և իրագործել են իրենց առջև դրված նպատակը:

«Մարզիչը շատ լավ կարողացել է տրամադրել մեզ խաղին, մրցակիցը բարձրակարգ ֆուտբոլ էր ցուցադրում և ֆիզիկապես ուժեղ, բայց մենք մեր աշխատանքի և ցանկության շնորհիվ կարողացանք հաղթել»,- ասել է Մալաքյանը PanARMENIAN.Net ի թղթակցի հետ զրույցում:

Գոհար Նալբանդյան, Հասմիկ Բաբայան / PanARMENIAN News
 Ամենաընթերցվողը բաժնում
Մասնագետը՝ առողջ ապրելակերպի մասին
Ինչու են կանայք ընտրում ֆիթնես և բոդիբիլդինգ
Հարմարավետության գոտուց դուրս, քաղաքային աղմուկից հեռու
Լավագույն app-երը՝ առավել զգուշավորների այլընտրանք
 Ուշադրության կենտրոնում
Հռիփսիմե Խուրշուդյանը չի բացառում վերադարձը մեծ սպորտ

Հռիփսիմե Խուրշուդյանը չի բացառում վերադարձը մեծ սպորտ Ծանրամարտիկի խոսքով՝ չի ուզում, որ իրեն որպես որակազրկված մարզուհի հիշեն

 Բաժնի այլ նյութերը
Համաճարակային լուծումներ Ինչպես են մարզասրահները և մարզվողները «ֆորմի մեջ» մնում
Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի
2016-ի 10 կարևորագույն սպորտային իրադարձությունը Օլիմպիական մեդալներն ու կամքի հաղթանակները