Սիրիան, ի հեճուկս ԱՊԼ որոշման, աջակցում է իր նախագահինՄինչև 2011-ի հունվարն արաբական աշխարհի ճանաչված առաջնորդն աշխարհիկ Եգիպտոսն էր, որին լսում էին կազմակերպության բոլոր անդամները, ներառյալ Պարսից ծոցի միապետությունները Արաբական պետությունների լիգան (ԱՊԼ) նոյեմբերի 12-ին դադարեցրել է այդ կազմակերպությունում Սիրիայի անդամակցությունը՝ կապված «քաղաքացիական բնակչության իրավունքների ոտնահարման» հետ: ԱՊԼ որոշումը, բնականաբար, արժանացել է ՄԱԿ, ԱՄՆ և Մեծ Բրիտանիայի հավանությանը: ՄԱԿ գլխավոր քարտուղար Պան Գի Մունն այդ միջոցն անվանել է «խիզախ», նշելով, որ միջազգային հանրությունը պատրաստ է «աջակցություն ցուցաբերել» Սիրիայում քաղաքացիական անձանց պաշտպանության գործում: 16 նոյեմբերի 2011 PanARMENIAN.Net - ԱՊԼ, ավելի ճիշտ նրանից մնացած պետությունների քայլը տարակուսանք է հարուցում: Առավել ևս, որ արաբական պետություններին միացել են ոչ միայն ԱՄՆ և մյուսները, ինչը լիովին հասկանալի է, այլ նաև Թուրքիան: Թեև Թուրքիայի ձայնն այս երգչախմբում լիովին օրինաչափ է՝ Էրդողանն ամեն կերպ փորձում է իր երկիրը դուրս բերել համաշխարհային քաղաքականության բարձրագույն լիգա: Եվրոպայի հետ չի ստացվում, ուրեմն նշանակում է պետք է փորձել հարևանների հետ: Ճիշտ է, հետո պարզվում է, որ հարևանների հետ նույնպես չի ստացվում: ԱՊԼ-ում գլխավոր դերակատարները՝ Քաթարը, Բահրեյնը, Սաուդյան Արաբիան, հազիվ թե ընդունում են արաբական գործերին խառնվելու Թուրքիայի փորձերը: Ընդհանրապես ԱՊԼ դիրքորոշումը Եգիպտոսում «հեղափոխությունից» հետո կտրուկ փոխվել է: Մինչև 2011-ի հունվարն արաբական աշխարհի ճանաչված առաջնորդն աշխարհիկ Եգիպտոսն էր, որին լսում էին կազմակերպության բոլոր երկրները, ներառյալ Պարսից ծոցի միապետությունները: Բայց Հոսնի Մուբարաքին գահընկեց անելուց հետո Քաթարը և Սաուդյան Արաբիան որոշեցին կառավարման ղեկը վերցնել իրենց ձեռքը: Ինչ ստացվեց դրանից, երևում է Լիբիայի օրինակով: Ավելին, Սաուդյան Արաբիան ամենաանցանկալի միապետություններից է և մարդու իրավունքների պաշտպանության հարցում նրա դիրքորոշումն ուղղակի անտեղին է: Համաձայնվեք, որ երկիրը, որտեղ գործում է շարիաթ, ուղղակի չի կարող քաղաքակիրթ լինել: Բայց... այնտեղ կա նավթ, միապետները թելադրում են խաղի իրենց կանոնները, իսկ մարդու իրավունքների և ամերիկյան ժողովրդավարության հետ ամեն ինչ կարգին է: Իզուր չէ, որ Բարաք Օբաման նշել է, որ ԱՊԼ որոշումը կուժեղացնի կառավարության դիվանագիտական մեկուսացումը, որը կոպտագույն ձևով խախտում է ժողովրդի առջև իր պարտավորությունները՝ սիստեմատիկ կերպով ոտնահարելով մարդու իրավունքները և ճնշելով բողոքի խաղաղ ակցիաները: Միաժամանակ, ինչպես հաղորդում են թուրքական ԶԼՄ-ները, Թուրքիայի ԱԳՆ ղեկավար Ահմեդ Դավութօղլուն մասնակցելու է Թուրք-արաբական ֆորումի չորրորդ գագաթնաժողովին, որը տեղի է ունենալու Մարոկկոյի մայրաքաղաք Ռաբաթում: Դավութօղլուն Ռաբաթում անցկացնելու է նաև երկկողմանի բանակցություններ: Նիստերում ընդունվելու է համատեղ գործունեության պլան, որը Թուրքիան և ԱՊԼ-ն իրագործելու են առաջիկա երեք տարիներին: Օրակարգի հիմնական կետը գագաթնաժողովում դառնալու է Սիրիայի իրավիճակը: Բայց սիրիացիները բավական բուռն են արձագանքել ԱՊԼ որոշմանը և պետք է նշել, բավական արդարացի: Բաշար Ալ Ասադի կառավարությունը պնդում է արաբական պետությունների արտակարգ գագաթնաժողով գումարելու վրա: Սակայն, ինչպես կարծում են դիտորդները, ԱՊԼ միջոցը հազիվ թե դադարեցնի երկրում բռնության ալիքը, որի զոհ են դարձել ավելի քան երեքուկես հազար մարդ (ՄԱԿ գնահատականներով): Պետք է նշել, որ ՄԱԿ տվյալները հիմնվում են ընդդիմության տեղեկությունների վրա, որն արհեստականորեն ուռճացնում է զոհերի թիվը: Համենայն դեպս այդպես են ասում սիրիացի պաշտոնյաները: Եվ որպես հաստատում, ողջ երկրով տեղի են ունեցել բողոքի բազմահազարանոց ցույցեր ԱՊԼ որոշման դեմ: Ամբոխը ավերել է Սաուդյան Արաբիայի և Քաթարի դեսպանատները, որոնք 22 երկրներից 18-ի թվում քվեարկել են ԱՊԼ-ում Սիրիայի անդամակցությունը դադարեցնելու օգտին: Դամասկոսում քարերով և շշերով զինված շուրջ հազար ցուցարարներ փորձել են գրավել Թուրքիայի դեսպանատունը: Լաթաքիայում հինգ հազար ցուցարարներ գրոհել են թուրքական հյուպատոսարանի վրա և հրկիզել թուրքական դրոշը: Դրանից հետո Թուրքիայի իշխանությունները հանձնարարել են Սիրիայից տարհանել թուրքական դեսպանատան աշխատակիցներին: Դեսպան Օմեր Օնխոնը և թուրքական դիվանագիտական առաքելության այլ ղեկավարներ դեռևս մնում են Դամասկոսում: Թուրքիան և Սիրիան գործընկերային հարաբերություններ ունեին, սակայն վերջին ամիսներին իրավիճակը փոխվել էր: Սեպտեմբերի Թուրքիայի վարչապետ Ռեջեփ Թայիփ Էրդողանը հայտարարել էր Ասադի ռեժիմի դեմ արևմտյան պատժամիջոցներին աջակցելու մասին: Բացի դրանից, Էրդողանը ցուցադրական այց էր կատարել սիրիայի փախստականների ճամբար, որոնք պատսպարվել էին թուրքական տարածքում: Եվ ահա արդեն սիրիացի ընդդիմադիրները փորձում են Թուրքիայում ստեղծել «վտարանդի կառավարություն»: Այնուամենայնիվ ԱՊԼ-ին չի լքում «սիրիական խնդիրները» լուծելու հույսերը, որն իրականում չկա: Նա մտադիր է Սիրիա ուղորդել 500 դիտորդներ, որոնք պետք է հետևեն, որպեսզի սիրիական իշխանությունները չխախտեն քաղաքացիական բնակչության իրավունքները: Դիտորդների շարքում լինելու են արաբական իրավապաշտպան կազմակերպությունների ներկայացուցիչներ, լրագրողներ և զինվորականներ: Սիրիա մեկնելու ամսաթիվը որոշվելու է արաբական երկրների ԱԳ նախարարների հանդիպմանը, որը տեղի է ունենալու չորեքշաբթի օրը Ռաբաթում: Պետք է հիշեցնել, որ «արաբական գարնան հաղթած» երկրներում ամեն ինչ այնպես չի դասավորվում, ինչպես կցանկանային հեղափոխության հեղինակները: Թունիսում արդեն շարիաթ է, Եգիպտոսում զինվորականները չեն պատրաստվում հանձնել իշխանությունը, իսկ Լիբիայում սկսվել է միջցեղային պատերազմ: Եթե այս ամենին հավելել քրդերի հետ Թուրքիայի նոր պատերազմը, ապա պարզ է դառնում, Մերձավոր Արևելքում դեռ երկար ժամանակ խաղաղություն չի լինի: Կարինե Տեր-Սահակյան Ամենաընթերցվողը բաժնում Ինչ է իրենից ներկայացնելու Սաուդյան Արաբիայում կառուցվելիք աշխարհի խոշորագույն շինությունը Վերջին ամսվա զարգացումները Իրադարձություններ, որոնք զարգացել են 1 ամսից էլ քիչ ժամանակում Ինչպես անցավ Eurosatory 2022-ը Բաժնի այլ նյութերը Ալիևը փորձում է ԵՄ-ին համոզել, թե «Զանգեզուրի միջանցք» կոչվածը պետք է Եվրոպային Ամենազգայուն՝ գազի գործոնով Բայրաքթարից պակաս աղմկահարույց, բայց ավելի փորձառու Իրանական ԱԹՍ-ների չբացահայտված պոտենցիալը Հին վիրուսի նոր բռնկումը Ինչ է հայտնի կապիկի ծաղկի դեպքերի աճի մասին | Բագրատ սրբազանն ուղերձ է հղել. Այլընտրանք չկա` կամ այսօր, կամ երբեք Կիրանցեցիները փակել են Հայաստան–Վրաստան միջպետական ճանապարհը Միրզոյանը՝ Բուրիչին. ՀՀ–ն կառուցողական ներգրավված է տարածաշրջանային կապուղիների ապաշրջափակման քննարկումներում Միրզոյանը ստորագրել է Օվիեդոյի կոնվենցիան Իդրամ Ջունիորն ու Կորիզը գործակցության հուշագիր են կնքել Կազմակերպությունները մշակում են ֆինանսական կրթության նոր մրցույթ ԿԽՄԿ աշխատակիցներն այցելել են Բաքվում պահվող Արցախի ղեկավարներին Նրանք կապ են հաստատել ընտանիքների հետ |