5-րդ գումարման ԱԺ-ում լինելու է առնվազն երկու իշխանական բևեռ, այսինքն` երկիշխանություն: Այս տեսակետն այսօր լրագրողների հետ հանդիպմանը հայտնեց «Ժառանգություն» կուսակցության անդամ, առաջին ՄԻՊ Լարիսա Ալավերդյանը՝ հավելելով, որ ամենայն հավանականությամբ սկզբնական փուլում ԲՀԿ-ն ՀՀԿ-ի հետ կոալիցիա չի կազմի:
«ԲՀԿ-ի տեղը լինեի` կպահեի այսպես կոչված «այլընտրանքը»: Ինքն էլ է իշխանություն, բայց այլընտրանք է: Չեմ կարծում, որ այլընտրանք-գործող իշխանություն խաղն ավարտված է», - իր խոսքում նշեց Լարիսա Ալավերդյանը: :
Նա նաև նշեց, որ ԱԺ ընտրությունների ընտրական գործընթացը դրական է գնահատում՝ հավելելով, որ բլոգերների ազատ աշխատանքը «դրական փաստ է», իսկ «դիտորդների դերակատարությունը` գերդրական»:
«Ավելանում է այն մարդկանց քանակն, ովքեր որոշում են միջամտել ընտրություններին, բայց չնայած դրան` դիտորդների աշխատանքի որակը միևնույն է թույլ է մնում», - ասաց բանախոսը:
Ալավերդյանի կարծիքով` պետք է աշխատել քաղաքացիական հասարակության զարգացման ուղղությամբ, քանի որ ուրույն է «քաղաքացիական հասարակության ներդրումը ընդիմությանն ու իշխանությանը պարտադրելու, որ ունենանք մաքուր, արդար և թափանցիկ ընտրություններ»:
Իսկ անդրադառնալով իր ապագա գործունեությանը, Ալավերդյանը նշեց, որ իրեն տեսնում է «բարձրագույն ուսումնական ոլորտում»:
«Հաճույքով եմ ընդունել Արմեն Դարբինյանի (Ռուս-հայկական Սլավոնական համալսարանի ռեկտոր) հրավերքը: Ինձ համար ուսումնական, մինչև անգամ՝ դպրոցական մանկավարժությունը, վերին աստիճանի հաճելի զբաղմունք է»- ասաց բանախոսը:
