Թուրքիան մտահոգված է վերջին ադրբեջանական դիվերսիաներով շփման գծում, ինչպես նաև դեմ է Լեռնային Ղարաբաղում պատերազմ վերսկսելու Բաքվի ցանկությանն ու վերջին դիվերսիաներին: Այդ մասին Երևանում կայացած մամլո ասուլիսում հայտարարել է Տարածաշրջանային հետազոտությունների կենտրոնի ղեկավար Ռիչարդ Կիրակոսյանը:
Ըստ նրա, Ադրբեջանի գործողությունները խանգարում են թուրքական ծրագրերին տարածաշրջանում, և Անկարան, ինչպես ԱՄՆ-ն, Ռուսաստանն ու Եվրամիությունը, գտնում է, որ միակ սպառնալիքը տարածաշրջանային խաղաղությանն ու կայունությանը Ադրբեջանն է:
Ըստ Կիրակոսյանի, այժմ ճգնաժամ է Անկարայի ու Բաքվի հարաբերություններում, «Մեկ ժողովուրդ՝ երկու պետություն» հայեցակարգը ձախողվել է:
Կիրակոսյանն անդրադարձել է նաև Թուրքիայի ու Ադրբեջանի համագործակցության թեմային ռազմական ոլորտում, նշելով, որ Անկարան դադարել է լինել Բաքվի գլխավոր ռազմական գործընկերը, այժմ դա Իսրայելն է, Պակիստանը և այլ պետություններ:
