Սարգիս Ասատրյան. Ատելություն քարոզելով անիմաստ է խոսել խաղաղության մասին

PanARMENIAN.Net - Ռամիլ Սաֆարովի ներումով ադրբեջանական իշխանությունները վտանգավոր գործընթաց նախաձեռնեցին, որը տանում է դեպի ծայրահեղ ազգայնականության ուժեղացում: Այդ ամսին Երևանում կայացած մամլո ասուլիսում հայտարարել է Ադրբեջանի գծով փորձագետ Սարգիս Ասատրյանը: Ըստ նրա, Ադրբեջանի նմանօրինակ քայլերը սպառնում են ղարաբաղյան խաղաղ կարգավորման բոլոր փորձերին:

«Ատելություն քարոզելով՝ անիմաստ է խոսել խաղաղության մասին»,-ասել է նա:

Ըստ Ասատրյանի, Ադրբեջանում այժմ կա լուրջ գաղափարական վակուում, և երկրում իսլամական ծայրահեղականության հաստատումը, Սաֆարովի հերոսացումը այդ վակուումը լցնելու փորձ է: Ըստ փորձագետի, իսլամիստական տրամադրությունների ուժգնացումն Ադրբեջանում բավականին երկար գործընթաց է, նրանց մեծ մասը մասնակցել է ժամանակին ղարաբաղյան պատերազմին: Նա նշել է, որ թեև ադրբեջանական իշխանությունների նպատակն էր նրանց օգտագործել հայերի դեմ պատերազմում, սակայն, նրանք չէին կարող ազդեցություն չունենանլ ադրբեջանցի երիտասարդների վրա:

2004թ. փետրվարի 19-ին լեյտենանտ Գուրգեն Մարգարյանը Բուդապեշտում գազանաբար կացնահարվեց ադրբեջանցի սպա, ավագ լեյտենանտ Ռամիլ Սաֆարովի կողմից: Երկուսն էլ Բուդապեշտում մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակներում կազմակերպված անգլերեն լեզվի դասընթացներին: 2006թ. ապրիլի 13-ին մարդասպանը Բուդապեշտում դատապարտվեց ցմահ բանտարկության՝ 30 տարվա ընթացքում առանց ներման իրավունքի: Հայաստանի նախագահ Ռոբերտ Քոչարյանի հրամանագրով Գուրգեն Մարգարյանը 2005թ. փետրվարի 19-ին հետմահու պարգևատրվեց «Արիության համար» մեդալով՝ ծառայության ընթացքում դրսևորած արիության ու ինքնազոհողության համար:

Օգոստոսի 31-ին Սաֆարովը Հունգարիայի կողմից արտահանձնվեց Ադրբեջանին, որտեղ անհապաղ ներում ստացավ՝ նրան շնորհվեց մայորի կոչում, նոր բնակարան, վճարվեց 8 տարվա աշխատավարձը: Ի պաստասխան Հայաստանը կասեցրեց դիվանագիտական հարաբերությունները Հունգարիայի հետ:

Մինչդեռ հունգարական կողմը պնդում է, որ Բաքուն հավաստիացումներ է տվել, որ Սաֆարովը կշարունակի կրել պատիժն Ադրբեջանում, ոչ պակաս քան 25 տարի:

Ըստ որոշ տվյալների Սաֆարովն արտահանձնվել է Ադրբեջանի կողմից 2-3 մլրդ եվրոյի պարտատոմսեր գնելու Բաքվի խոստման դիմաց: Պաշտոնական Բուդապեշտը դա հերքում է: