Հայ միասեռականների եւ լեսբուհիների ասոցիացիան պահանջում է Սաֆարովին բանտ ուղարկել

PanARMENIAN.Net - Նյու Յորքի Հայ միասեռականների եւ լեսբուհիների ասոցիացիան (AGLA NY) իր մտահոգությունն է հայտնել ադրբեջանցի մարդասպան Ռամիլ Սաֆարովի արտահանձնման ու ներման վերաբերյալ: Ասոցիացիայի հայտարարության մեջ մասնավորապես, ասվում է. «Հունգարիայի կառավարությունը հայտարարել է, որ արտահանձնել է Սաֆարովին, վստահ լինելով, որ նա կշարունակի պատիժը կրել հայրենիքում: Դժվար է հավատալ նման հայտարարությանը, հատկապես եթե հաշվի առնենք Իլհամ Ալիևի շուրթերից հնչող վիրավորանքներն ու սպառնալիքները հայերի հասցեին: Ավելին, հունգարական կողմի հետագա հայտարարություններից տպավորություն է ստեղծվում, որ վարչապետ Վիկտոր Օրբանը միանգամայն կարող էր իմանալ, որ Սաֆարովն ազատ կարձակվի Ադրբեջան ժամանելուն պես: Եվ զարմանալի չէ, որ Սաֆարովն անմիջապես ներում ստացավ, վերականգնվեց զինված ուժերում, մայորի կոչում ստացավ, բնակարան ու 8 տարվա աշխատավարձը, իսկ ադրբեջանական մամուլը նրան հերոս է անվանում:

ԱՄՆ-ն, ՄԱԿ-ն ու մյուս երկրներն ու միջազգային կազմակերպությունները պետք է ստիպեն Ադրբեջանին կատարել Հունգարիայի հետ ձեռք բերված պայմանավորվածությունը և վերադարձնել Սաֆարովին բանտ, որտեղ էլ նա պետք է մնա մինչ կյանքի վերջը: Իսկ Հունգարիայի վարչապետ Օրբանը պետք է պաշտոնանկ լինի»:

2004թ. փետրվարի 19-ին լեյտենանտ Գուրգեն Մարգարյանը Բուդապեշտում գազանաբար կացնահարվեց ադրբեջանցի սպա, ավագ լեյտենանտ Ռամիլ Սաֆարովի կողմից: Երկուսն էլ Բուդապեշտում մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակներում կազմակերպված անգլերեն լեզվի դասընթացներին: 2006թ. ապրիլի 13-ին մարդասպանը Բուդապեշտում դատապարտվեց ցմահ բանտարկության՝ 30 տարվա ընթացքում առանց ներման իրավունքի: Հայաստանի նախագահ Ռոբերտ Քոչարյանի հրամանագրով Գուրգեն Մարգարյանը 2005թ. փետրվարի 19-ին հետմահու պարգևատրվեց «Արիության համար» մեդալով՝ ծառայության ընթացքում դրսևորած արիության ու ինքնազոհողության համար:

Օգոստոսի 31-ին Սաֆարովը Հունգարիայի կողմից արտահանձնվեց Ադրբեջանին, որտեղ անհապաղ ներում ստացավ՝ նրան շնորհվեց մայորի կոչում, նոր բնակարան, վճարվեց 8 տարվա աշխատավարձը: Ի պաստասխան Հայաստանը կասեցրեց դիվանագիտական հարաբերությունները Հունգարիայի հետ:

Մինչդեռ հունգարական կողմը պնդում է, որ Բաքուն հավաստիացումներ է տվել, որ Սաֆարովը կշարունակի կրել պատիժն Ադրբեջանում, ոչ պակաս քան 25 տարի:

Ըստ որոշ տվյալների Սաֆարովն արտահանձնվել է Ադրբեջանի կողմից 2-3 մլրդ եվրոյի պարտատոմսեր գնելու Բաքվի խոստման դիմաց: Պաշտոնական Բուդապեշտը դա հերքում է: