Ռուսաստանը շահագրգռված է ՌԴ-ին փոխանցված հայկական ձեռնարկությունների հնարավորինս արագ գործարկման հարցում
Հայաստանի նախագահ Ռոբերտ Քոչարյանն այսօր ընդունել է Ռուսաստանի Դաշնության տրանսպորտի նախարար, տնտեսական եւ գիտատեխնիկական համագործակցության հարցերով հայ-ռուսական միջկառավարական հանձնաժողովի համանախագահ Իգոր Լեւիտինին, հաղորդում է ՀՀ նախագահի մամլո ծառայությունը: Ռոբերտ Քոչարյանը տնտեսական համագործակցության հարցերով միջկառավարական հանձնաժողովը համարել է հայ-ռուսական հարաբերություններում կարեւորագույն մեխանիզմ, որը միշտ աչքի է ընկել գործունեության արդյունավետությամբ: Զրուցակիցները քննարկել են երկկողմ համագործակցության ծրագրերը, առանձնահատուկ ուշադրություն են հատկացրել էներգետիկայի, տրանսպորտային հաղորդակցության զարգացման խնդիրներին: Վրացական երկաթուղու աբխազական հատվածի վերագործարկման առնչությամբ նշվել է, որ ներկայումս ուսումնասիրվում են երկաթուղու վիճակը եւ վերականգնման համար անհրաժեշտ հանգամանքները, նաեւ` երկաթուղու շինարարությանը եռակողմ` Ռուսաստան-Վրաստան-Հայաստան մասնակցության հնարավորությունները: Ըստ Ռոբերտ Քոչարյանի, երկաթուղու գործարկումով կբացվեն համագործակցության եւ զարգացման նոր հնարավորություններ: Կողմերն անդրադարձել են նաեւ «Գույք պարտքի դիմաց» ծրագրի շրջանակում Ռուսաստանին փոխանցված հայկական ձեռնարկությունների վերագործարկման խնդրին: Իգոր Լեւիտինի խոսքերով, ռուսական կողմը եւս շահագրգիռ է ձեռնարկությունների հնարավորինս արագ գործարկումով եւ այդ նպատակով ստեղծվել է հատուկ աշխատանքային խումբ:
