iPad-ի գների վարկանիշով Հայաստանը մոտավորապես Լյուքսեմբուրգի և Նորվեգիայի միջև է

23 սեպտեմբերի 2013 - 17:06 AMT

PanARMENIAN.Net - Ամենաէժան iPad- ները վաճառվում են Մալայզիայում (474 դոլար), Կանադայում (485 դոլար) և ԱՄՆ-ում (499 դոլար): Այդ մասին ասվում է CommSec հետազոտության մեջ, որը ավստրալական Commonwealth բանկի ստորաբաժանումն է:

Այդ ապրանքատեսակի ամենաթանկ պլանշետները վաճառվում են Արգենտինայում (1,1 հազար դոլար), Բրազիլիայում (791 դոլար) և Դանիայում (725 դոլար), հայտնում է Lenta.ru-ն:

CommSec-ը համեմատել է առանց 3G և 16 գիգաբայթ ներկառուցված հիշողությամբ 4-րդ սերնդի iPad Retina պլանշետների արժեքը: Բանկը հետազոտություններ է անցկացնում պլանշետների գների ոլորտում՝ որոշելու համար ավստրալական դոլարի արդարացի արժեքը:

iPad-ների և նման այլ սարքերի վարկանիշի հիմքում այն տեսությունն է, համաձայն որիարժույթի փոխարժեքների նշանակությունները պետք է համապատասխանեն գնողունակության պարիտետին: Դա նշանակում է, որ փոխարժեքով հաշվարկված որոշակի գումարով տարբեր երկրներում կարելի է գնել ապրանքների նույն քանակությունը:

Հայաստանում iPad Retina-ի միջին գինը 261 000 դրամ է՝ մոտ 642 դոլար: Այդպիսով, Հայաստանը CommSec-ի վարկանիշում կարող էր տեղ զբաղեցնել Լյուքսեմբուրգի (641 դոլար) և Նորվեգիայի (655,52 դոլար) միջև: