Հայաստանի 2014 թվականի պետբյուջեն առանձնանում է ծրագրային մոտեցմամբ

30 հոկտեմբերի 2013 - 16:10 AMT

PanARMENIAN.Net - Որպես կանոն հերթական տարվա պետբյուջեն պետք է օրինաչափ կապ ունենա նախորդ տարվա բյուջեի հետ, ինչը մինչ օրս չէր նկատվում ՀՀ կառավարության բյուջետային պլանավորման դեպքում: Սակայն, զարմանալիորեն Հայաստանի 2014 թվականի պետբյուջեն առանձնանում է ծրագրային մոտեցմամբ:

Դա վկայում է, որ կառավարության թիմը մտադիր է առաջիկա տարիներին, իսկ ավելի ճշգրիտ առաջիկա 3 տարում, որոշակի արդյունքի հասնել և իր կազմում լուրջ կառուցվածքային փոփոխություններ չկատարել: Հոկտեմբերի 30-ին Երևանում կայացած մամլո ասուլիսում նման կարծիք է հայտնել Հայաստանի գործատուների հանրապետական միության նախագահ Գագիկ Մակարյանը: Այդպիսով 2014 թ. պետբյուջեի ծախսերը պետք է շաղկապվեն պետկառույցների առանձին ծրագրերի հետ, որպեսզի գլխավոր փաստաթղթի կատարողականը հնարավոր լինի վերահսկել:

Միաժամանակ Գագիկ Մակարյանը ուշադրությունը հրավիրել է այն հանգամանքին, որ կառավարությունը մտադիր է 2014 թ. 34 մլրդ դրամով ավելացնել բյուջեի մուտքերը՝ ապահովելու համար աշխատավարձերի ու կենսաթոշակների նախատեսված բարձրացումը: Հավանաբար, դա կարվի ստվերային տնտեսության կրճատման հաշվին ու խոշոր տնտեսվարողների համար հարկային բեռի ավելացման հաշվին: 2014 թ. բյուջեում ավելին է նաև պակասուրդի չափը՝ 2013 թ. 110 մլրդ դրամի դիմաց այն նախատեսված է 115,5 մլրդ դրամ: Մտահոգիչ է ՀՀ պետպարտքը, որը աճի դինամիկա ունի, հատկապես ընթացիկ տարվա երրորդ եռամսյակում:

Գագիկ Մակարյանը նշել է, որ 2014 թվականին փոքր ու միջին ձեռնարկատերերի համար հեշտ չի լինի, քանի որ այդ հատվածում պետական քաղաքականությունը կրում է էմպիրիկ ու կլաստերային բնույթ, ոչ թե համակարգված: Ավելին, չլուծված են մնում կոռուպցիայի ու անհավասար մրցակցության հետ կապված շատ խնդիրներ:

Մակարյանը անդրադարձել է նաև պետգնումների թեմային, որը արդյունավետ աշխատանքի դեպքում կարող է ապահովել տեղական արտադրության ու ընդհանուր առմամբ երկրի կայուն զարգացման նվազագույն մակարդակը:

Ըստ 2014 թ. պետբյուջեի նախաբծի, ՀՀ համախառն բյուջեի եկամուտները նախատեսվում են 1 տրլն 134 մլրդ դրամի չափով, ծախսերը՝ 1 տրլն 244 մլրդ դրամի չափով: ՀՆԱ իրական աճը նախատեսված է 5,2 տոկոս, իսկ 12-ամսյա գնաճի ցուցանիշը՝ 4 տոկոսի (±1,5%) սահմանում:

Ուշագրավ

Ըստ ԿԲ-ի՝ Արցախի կուտակային կենսաթոշակային համակարգի գումարներն ապահով ակտիվներում են

Ըստ ֆինանսների նախարարության՝ միջպետական վարկի մնացորդն ուղղվելու է բռնի տեղահանված անձանց աջակցությանը

Խաղողի 65,000 տ ավելցուկ կա. Մթերող ընկերությունները կսուբսիդավորվեն

Կապահովվի խաղողի մթերումների գործընթացի կազմակերպումը

ԵԱԶԲ–ն չի բացառել՝ ՀՀ տնտեսական աճը տարեվերջին կարող է գերազանցել 7․5%-ը

Բանկի զեկույցում նշվում է, որ Հայաստանի տնտեսական ակտիվությունն ավելացել է 10․4 տոկոսով հունվար–օգոստոսին

ԿԲ. Տեղահանված արցախցիների վարկերի մասով անհատական կամ ընդհանուր լուծումներ կառաջարկվեն

Տարհանված քաղաքացիների ֆինանսական սպասարկման հետ կապված կարող են խնդիրներ առաջանալ հիմնականում գրավադրված գույքի (ոսկով գրավադրված վարկերի) ֆիզիկական առկայության մասով