Ադրբեջանցի զինվորների հոգեվիճակը տեղի՞ է տալիս. Վիրավորվել է Ադրբեջանի ԶՈւ 2 զինվոր

14 նոյեմբերի 2013 - 15:17 AMT

PanARMENIAN.Net - Վիրավորվել են ադրբեջանական ԶՈւ միանգամից երկու զինվորներ, հայտնում է ադրբեջանական «Թրենդ» գործակալությունը ռազմական աղբյուրի վրա հղումով:

Ադրբեջանի ՊՆ N զորամասի զինծառայող Շահմարդանով Մուսեիբ Շահին օղլուն իրեն հրազենային վնասվածք է հասցրել իրեն ամրակցված զենքից, նա ծանր վիճակում տեղափոխվել է հիվանդանոց: Շահմարդանովը զորակոչվել է իսկական ծառայության Զակատալայի շրջանից:

Մեկ այլ միջադեպ է տեղի ունեցել Հայաստանի հետ սահմանագծում: 19-ամյա զինվոր Էլման Սուլեյմանովը, խախտելով անվտանգության կանոնները, կրակ է բացել ծառայողական ինքնաձիգից: Արդյունքում վիրավորվել է Սուլեյմանովի զինակից 19-ամյա Նատիգ Ասադովը, որը տեղափոխվել է հիվանդանոց:

Ադրբեջանի ՊՆ մամլո ծառայությունում հաստատել են այս փաստերը: Երկու դեպքի վերաբերյալ քննություն է անցկացվում:

2013 թ. սկզբից Ադրբեջանի անվտանգության ու պաշտպանության ոլորտում կորուստները հասել են 76-ի, հայտնել է «Դոկտրին» Ռազմական լրագրողական հետազոտությունների կենտրոնը: ՈԿԿ ղեկավար Ջասուր Սումերինլին նշել է, որ նոյեմբերի 1-ի տվյալներով ևս 86 մարդ վիրավորվել է կամ մարմնական վնասվածքներ ստացել:

Մարտական պայմաններում զոհվել է նրանցից ընդամենը 10-ը, 66 ոչ մարտական կորուստներ են: Բացի այդ, անհայտ հանգամանքներում մահացել է Ջ. Նախիջևանսկու անվան ուսումնարանի ուսանողը:

9 մարդ զոհվել է դժբախտ պատահարների արդյունքում (ջրահեղձ են եղել, տանկի տակ են ընկել, հոսանքին են զոհ գնացել), 14-ը զոհվել են ավտովթարներից, 3-ը՝ ուղղաթիռի վթարից, 3-ը՝ անհայտ հանգամանքներում, 2-ը՝ անզգուշության պատճառով, 2-ը՝ քաղաքացիական անձանց կողմից, 6-ը՝ ոչ կանոնադրական հարաբերությունների արդյունքում, 11-ը՝ հիվանդություններից, 16-ը՝ ինքնասպան են եղել:

Զոհվածների մեծ մասը ՊՆ-ին է բաժին ընկնում՝ 59 մարդ: Կորուստները սահմանապահ զորքերում կազմել են 4 մարդ, օդուժում՝ 9 մարդ, պետական պահպանության ծառայությունում՝ 1 մարդ, զորակոչի պետծառայությունում՝ 1 մարդ, ԱԻՆ-ում՝ 2 մարդ:

Հղումներ թեմայով.

http://trend.az