Դեսպան. ՀՀ անդամակցումը ԵՏՄ-ին և Ուկրաինայի եվրաինտեգրումը չեն խանգարի Երևան-Կիև հարաբերություններին

PanARMENIAN.Net - Հայաստանի անդամակցումը ԵՏՄ-ին և Ուկրաինայի եվրաինտեգրումը չեն խանգարի Երևանի ու Կիևի հարաբերությունների զարգացմանը, հունիսի 11-ին լրագրողներին է ասել Հայաստանում Ուկրաինայի դեսպան Իվան Կուխտան:

Դեսպանը նշել է, որ Ուկրաինան առաջիկայում մտադիր է ստորագրել ԵՄ հետ ասոցացման համաձայնագրի տնտեսական մասը և ենթադրել է, որ դա տեղի կունենա հունիսի 27-ին Բրյուսելում: Ըստ նրա, հեռանկարում Ուկրաինան մտադիր է դառնալ ԵՄ լիիրավ անդամ:

«Բնականաբար, այդ քայլերից հետո ինչ-ինչ հարցեր կառաջանան Ուկրաինայի և Հայաստանի երկկողմ հարաբերություններում և հարկ կլինի որոշակի փոփոխություններ կատարել երկկողմ նորմատիվ ակտերում, բայց, ես կարծում եմ, որ այդ գործընթացն այնքան էլ երկար չի տևի և հեշտ լուծում կստանա»,-ասել է Կուխտան: Դեսպանն ընդգծեց, որ, չնայած տարբերություններին երկու երկրների կողմնորոշման առումով, Ուկրաինայի նորընտիր նախագահ Պյոտր Պորոշենկոն տրամադրված է զարգացնել, խորացնել ու ընդլայնել կապերը Հայաստանի հետ, հայտնում է «Նովոստի Արմենիան»:

Մարտի վերջում, երբ ՀՀ նախագահ Սերժ Սարգսյանը դրական գնահատեց Ղրիմում հանրաքվեի արդյունքները, ՀՀ-ում Ուկրաինայի դեսպան Իվան Կուխտան հետ կանչվեց Կիև: Նա վերադարձավ Երևան կիրակի օրը: Ինչպես հայտարարեց Ուկրաինայի ԱԳՆ տեղեկատվության քաղաքականության դեպարտամենտի տնօրեն Եվգենի Պերեբիյնիսը, փաստացի այս շաբաթ Իվան Կուխտան ձեռնամուխ եղավ իր պարտականությունների կատարմանը: Ըստ նրա, Ուկրակնայի ԱԳՆ-ն որոշում կայացրեց դեսպանին վերադարձնելու մասին, երբ Հայաստանը շնորհավորեց Պորոշենկոյին Ուկրաինայի նախագահի պաշտոնում ընտրվելու կապակցությամբ:

«Հայկական կողմը ողջունեց Ուկրաինայի նախագահի ընտրությունն ու Ուկրաինայի հետ կառուցողական համագործակցության հույս հայտնեց»,-հայտարարել է Պերեբեյնիսը:

Իվան Կուխտան հայտնեց, որ Գերագույն ռադան կքննարկի ԱՊՀ-ից Ուկրաինայի դուրս գալու հարցը: «Երբ տեղի ունեցավ ուկրաինական ճգնաժամը, Ուկրաինան նախագահում էր ԱՊՀ-ում: ԱԳՆԽ նիստ հրավիրելու նրա բազմաթիվ հորդորները անպատասխան մնացին, ԱԳՆ ղեկավարները չսատարեցին մեզ: Ուստի, բնական է, որ Ուկրաինայի Գերագույն ռադան ու կառավարությունը որոշել են, որ եթե այդ կազմակերպությունն անարդյունավետ է, նման կազմակերպության աշխատանքի արդյունքները ձեռնատու չեն Ուկրաինային»,-ասել է նա: Ըստ դեսպանի, Ուկրաինայի կառավարությունն արդեն ներկայացրել է փաստաթղթերը Գերագույն ռադա ԱՊՀ-ից դուրս գալու վերաբերյալ: «Համապատասխան որոշումը կայացնելու է Ուկրաինայի Գերագույն ռադան»,-ասել է նա: Կուխտան հավելել է, որ Ուկրաինան արդեն հրաժարվել է նախագահությունից ԱՊՀ-ում 2014 թ., և այն փոխանցվել է Բելառուսին:

Մայիսի 29-ին Աստանայում անցկացված Եվրասիական բարձրագույն տնտեսական խորհրդի նիստում Ռուսաստանի, Ղազախստանի ու Բելառուսի նախագահներ Վլադիմիր Պուտինը, Նուրսուլթան Նազարբաևն ու Ալեքսանդր Լուկաշենկոն ստորագրել են Եվրասիական տնտեսական միության ձևավորման մասին համաձայնագիր: Այն կգործի 2015-ի հունվարի 1-ից: Եվրասիական տնտեսական համաժողովի մասին պայմանագրի նախագծում ձևակերպվել է էներգետիկ շուկայի հիմնարար կառուցվածքը, որով կողմերը պայմանավորվել են, որ 2025 թվականից ոչ ուշ կսկսեն գործել նավթի, նավթամթերքի ու գազի ընդհանուր շուկաները: 2016 թվականին նախագահները կհաստատեն այդ շուկաներից յուրաքանչյուրի ձևավորման հայեցակարգը: 2018 թվականին կհաստատվի այդ շուկաների ձևավորման ծրագիրը: Ընդհանուր շուկաների աշխատանքը գործարկելու համար հարկ կլինի հատուկ միջազգային պայմանագրեր ստորագրել: Մինչ 2025 թվականը այդ հարցերը կկարգավորվեն ըստ 2010 թվականին կնքված համաձայնգարերի:

Ղազախստանի նախագահ Նուրսուլթան Նազարբաևն առաջարկել է մինչև հուլիսի 1-ը դիտարկել Հայաստանի` ձևավորվող Եվրասիական տնտեսական միությանը միանալու հարցը: «Եթե հունիս ամսվա ընթացքում բոլոր առևտրային հարցերը լուծվեն»,- ասել է Նազարբաևը: «Համաձայն եմ առաջարկի հետ»,- արձագանքել է ՌԴ նախագահ Վլադիմիր Պուտինը: Բելառուսի նախագահ Ալեքսանդր Լուկաշենկոն ևս ընդգծել է, որ Հայաստանը պետք է կատարի միության անդամներին ներկայացվող պահանջները:

Ավելի վաղ ՀՀ նախագահ Սերժ Սարգսյանն առաջարկել էր ԵՏՄ-ին Հայաստանի միանալու մասին պայմանագիրը ստորագրել մինչև ընթացիկ տարվա հունիսի 15-ը: