Air Armenia-ն վարձակալած ինքնաթիռները վերադարձրել է տիրոջը. Ասում են` վերանորոգման նպատակով

PanARMENIAN.Net - Air Armenia-ն իր վարձակալած երկու A320-200s աերոբուսները (EK-32039 (cn 1439) և EK-32050 (cn 1450) սեպտեմբերի վերջին վերադարձրել է վարձատուին: Այս մասին գրում է ավիացիայի ոլորտի խնդիրները լուսաբանող Ch-aviation.com կայքը` նշելով, որ հոկտեմբերի 1-ին երկու օդանավն էլ Ամստերդամով տեղափոխվել են Վունսդրեխտ` Նիդերլանդներ:

Կայքը նաև գրում է այն մասին, որ նախորդ ամիս Ռուսաստաի աերոնավիգացիոն ընկերությունը մոտ 1.1 մլն դոլար պարտքի պատճառով հրաժարվել էր սպասարկել ընկերության ինքնաթիռները:

Ch-aviation.com-ը պորտալը հայտնում է, որ հայաստանյան ավիափոխադրողը դեռևս շարոնակում է թռիչքներ իրականացնել, թեև տնօրինում է ընդամենը մեկ ինքնաթիռ ` B737-500: Նշվում է, որ երկու աերոբուսները հետ վերադարձնելու հետ կապված որոշ չվերթներ չեղարկվել են, բայց դեռևս իրականացվում են թռիչքներ դեպի են Ադլեր/Սոչի, Աթենք, Ֆրանկֆուրտ, Կրասնոդար, Մոսկվա(Վնուկովո), Նիժնի Նովգորոդ, Փարիզ, Սամառա ու Սանկտ Պետերբուրգ: Դեպի Եկատերինբուրգ թռիչքներն առայժմ կարծես թե ամբողջովին կասեցվել են:

Air Armenia ավիաընկերության մարքեթինգի բաժնի ղեկավար Սիրական Համբարձումյանը PanARMENIAN.Net ի հետ զրույցում նշեց, որ ինքնաթիռները վերադարձրել են վերանորոգման նպատակով. վարձակալության պայմանագրով այդպես է սահմանված:

Ընկերությունիի լրատվական ծառայությունը նաև հաղորդագրություն է տարածել` հայտնելով, որ սահմանված կարգով ըստ չվացուցակի իրականանում են ընկերության կողմից հայտարարված բոլոր չվերթները:

«Չվացուցակի համաձայն՝ Air Armenia ավիաընկերությունն իրականացնում է ուղևորափոխադրումներ դեպի Ռուսաստանի Դաշնություն և եվրոպական երկրներ:Տեղեկացնում ենք նաև, որ ավիաընկերության երկու օդանավերի պլանային տեխնիկական սպասարկման խնդիրներից ելնելով՝ ժամանակավորապես դադարեցվել է դեպի Ֆրանկֆուրտ իրականացվող չվերթները: Համաձայն չվացուցակի՝ շարունակվում են դեպի Փարիզ և Աթենք կատարվող թռիչները»,- նշված է հաղորդագրության մեջ:

Հոկտեմբերի 3-ին հայտնի էր դարձել, որ Air Armenia-ի չվացուցակում որոշակի փոփոխություններ են կատարվել, որոշ չվերթներ հանվել են, վերադարձվում են արդեն վաճառված տոմսերի գումարները: Պատճառն օդանավների սակավությունն է. այս պահին ավիաընկերությունն ունի ընդամենը 1 սարքին ինքնաթիռ: Ընկերությունից մեկնաբանել էին, թե օդանաերը կանգնած են վերանորոգման. Մեկը` պլանային, մյուսը` չնախատեսված:

Սեպտեմբերի 11-ին «Ռուսաստանի Դաշնությունում օդային երթևեկության կազմակերպման պետական կորպորացիա» ձեռնարկությունը հայտարարություն էր տարածել, ըստ որի սեպտեմբերի 21-ից պետք է դադարեցներ Air Armenia ավիաընկերության աէրոնավիգացիոն սպասարկումը ՌԴ օդային տարածքում:

«Աշխարհում բոլոր ավիաընկերություններն ունեն ֆինանսական խնդիրներ, սակայն մեր շրջանառու միջոցները բավարար են ֆինանսական խնդիրները լուծելու համար, սնանկության մասին խոսք անգամ չկա»: